ၾႆးမႆႈႁိူၼ်းၵူၼ်းဝၢၼ်ႈ ပွၵ်ႉၸိင်ႇပၢၼ်း လင်ၼိုင်ႈ ယွၼ်ႉၾႆးၾႃႉသျွတ်ႉသေ မႆႈၶူဝ်းၶွင်ၼႂ်းႁိူၼ်းယေး ဢမ်ႇ တၼ်းလႆႈသင်။
ဝၼ်းတီႈ 15/11/2018 ယၢမ်းႁူဝ်ၶမ်ႈ 6 မူင်းပၢႆၼၼ်ႉ ၾႆးမႆႈႁိူၼ်း တေႃႇယီႇမျိၼ်ႉ ဢၼ်ပိုတ်ႇႁၢၼ်ႉၶၢႆၶူဝ်းၵုၼ်ႇ မီး ၼိူဝ်သဵၼ်ႈတၢင်းသပႄႇ တီႈပွၵ်ႉၸိင်ႇပၢၼ်း ႁိမ်းလုမ်းပလိၵ်ႈၸႄႈမိူင်း ၼႂ်းၸႄႈဝဵင်းတူၼ်ႈတီး ၸိုင်ႈတႆး ပွတ်း ၸၢၼ်းၼၼ်ႉသေ ၵူၼ်းမၢတ်ႇၸဵပ်းလူႉတၢႆၸွမ်းၾႆးတႄႉ ဢမ်ႇမီး ဝႃႈၼႆ။
ၼၢင်းသႅင်ႁွမ် ၸုမ်းၶၢဝ်ႇၽူႈတွႆႇႁွၵ်ႈ ဢၼ်ႁွတ်ႈၽႅဝ်ဢွင်ႈတီႈႁိူၼ်းၾႆးမႆႈၼၼ်ႉ လၢႆးငၢၼ်းဝႃႈ “ လႆႈႁူႉဝႃႈ ယွၼ်ႉၾႆး သျွတ်ႉလႄႈမႆႈ။ လႆႈမႆႈၵႂႃႇတင်းလင် ဢမ်ႇတၼ်းလႆႈၶူဝ်းၶွင်သင်။ ၵႃႈၶၼ်လွင်ႈလူႉသုမ်းတႄႉ တေမီးမွၵ်ႈ 60 သႅၼ် ပျႃး။ ၵူၼ်းလႄႈသတ်း ဢၼ်လႆႈမၢတ်ႇၸဵပ်း လူႉတၢႆယွၼ်ႉၾႆးတႄႉ ဢမ်ႇမီး” ဝႃႈၼႆ။
တေႃႈလဵဝ် တူဝ်ၸဝ်ႈႁိူၼ်းတႄႉ ၾၢႆႇပလိၵ်ႈၶဝ် ၵုမ်းၶင်တူဝ်ဝႆႉသေ တေပၼ်တူတ်ႈတၢမ်ႇ ၸွမ်းၼင်ႇမၢႆမီႈ ဝၢၼ်ႈမိူင်း မီးၼၼ်ႉ ဝႃႈၼႆ။
ယူႇတီႈၸုမ်းၶႄၾႆးၶဝ် လႆႈဢဝ်ရူတ်ႉၵႃး မႃးၸွႆႈႁူတ်းၶႄၾႆးၵႂႃႇ ဝႃႈၼႆ။
ဝၢႆးသေ ၾႆးမႆႈၵႂႃႇယဝ်ႉၼၼ်ႉ ၸွမ်ၽွင်းလူင်မိူင်းတႆး ၻွၵ်ႊတိူဝ်ႊလိၼ်းထုတ်ႉလႄႈ ၸုမ်းလူင်ပွင်ၸိုင်ႈမိူင်းတႆး ၵႂႃႇသူႇ ၸႂ်းၵူၼ်းၺႃးၾႆးမႆႈယွၼ်ႉႁူင်းၾႆးမိၼ်တူၵ်းသႂ်ႇ ၼႂ်းပၢင်ပွႆး မိူဝ်ႈၶမ်ႈ ဝၼ်းတီႈ 14 ဢၼ်ယူတ်းယႃတူဝ်ဝႆႉ တီႈႁူင်းယႃ ၸဝ်ႈၸၢမ်ႇထုၼ်း ၼၼ်ႉသေ ပွၵ်ႈၶိုၼ်းလႄႈ ၶဝ်ႈမႃးဝႄႉတူၺ်း ႁိူၼ်းၾႆးမႆႈၼၼ်ႉထႅင်ႈ ဝႃႈၼႆ။