ၾႆးမႆႈႁိူၼ်းၵူၼ်းဝၢၼ်ႈလင်ၼိုင်ႈ တီႈဝၢၼ်ႈၼႃးလူင် ၸႄႈဝဵင်းႁူဝ်ပူင်း ၼၢင်းယိင်းဢွၼ်ႇၵေႃႉၼိုင်ႈ လႆႈလူႉတၢႆၸွမ်းၼႂ်း ၾႆး။

ဝၼ်းတီႈ 01/06/2019 ၼၼ်ႉ ၼၢင်းၶမ်းပႅင်း ဢႃယု 15 ပီ ထႅမ်ႁႅင်းၾူၼ်း တီႈမေႃႈၵဵပ်းၾႆး (ပႅတ်ႇထရီႊ) သႅင်လႅတ်ႇ တီႈ ႁိူၼ်းဝၢၼ်ႈ ၼႃးလူင် ၸႄႈဝဵင်းႁူဝ်ပူင်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း။ ၾူၼ်းတႅၵ်ႇသေ လႆႈဢဝ်ၾႆးမႆႈ ႁိူၼ်း မၼ်း ၼၢင်းလႆႈလူႉတၢႆၵႂႃႇၼႂ်းႁိူၼ်းၼၼ်ႉ ဝႃႈၼႆ။

ၽူႈမီးပုၼ်ႈၽွၼ်းပလိၵ်ႈယေး ၸႄႈဝဵင်းႁူဝ်ပူင်း လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၼၢင်း ထႅမ်ႁႅင်းၾူၼ်းတီႈမေႃႈၵဵပ်း ၾႆး သႅင်လႅတ်ႇၼၼ်ႉ။ ယွၼ်ႉဝႃႈ ၾူၼ်းၼၼ်ႉမႆႈႁႅင်းသေ ဢဝ်တႅၵ်ႇ ပဵၼ်ၾႆးလၢမ်းမႆႈ တီႈၼွၼ်းမၼ်းၼၢင်းလႆႈမႆႈ ပႃးႁိူၼ်း ၵႂႃႇ” ဝႃႈၼႆ။

ၵူၼ်းယူႇႁိမ်းၵိၼ်ၸမ် ၼႅတ်ႈဢွၼ်ၵၼ်ၶႄႁူတ်းၾႆးမွတ်ႇသေ လႆႈထူပ်း ႁၼ်ၼၢင်းၶမ်းပႅင်း ထုၵ်ႇၾႆးမႆႈမၢတ်ႇၸဵပ်းသေ လႆႈလူႉတၢႆဝႆႉ။ ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်း ၾၢႆႇပလိၵ်ႈ လႆႈပိုတ်ႇလိူင်ႈ တီႈႁူင်းပလိၵ်ႈၸႄႈဝဵင်းႁူဝ်ပူင်း မတ်ႉတႃ 285/304 သေ ၵူတ်ႇထတ်းလွင်ႈပိူင်ပဵၼ်မၼ်းၵႂႃႇ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 7 လိူၼ်မေႊၼၼ်ႉၵေႃႈ ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇၼၼ်ႉ ၾႆးၾႃႉသျွတ်ႉ ယွၼ်ႉ ထႅမ်ႁႅင်းၾူၼ်းဝႆႉသေ ႁဵတ်းႁႂ်ႈၾႆးမႆႈႁိူၼ်း၊ မႆႈပႃး ၽူႈၸၢႆး ဢႃယု 30 ပီပၢႆၵေႃႉၼိုင်ႈလႄႈ ၼၢင်းယိင်းၵေႃႉၼိုင်ႈ လႆႈလူႉ တၢႆၸွမ်းၾႆး ဝႃႈၼႆ။