ၾႆးၾႃႉသျွတ်ႉသေ ႁုပ်ႇမႆႈ ႁိူၼ်းၵူၼ်းဝၢၼ်ႈလင်ၼိုင်ႈ တီႈဝၢၼ်ႈႁူၺ်ႈႁိူဝ်း ၸႄႈဝဵင်းလၢင်းၶိူဝ်း လွင်ႈၵူၼ်းမၢတ်ႇ ၸဵပ်း လူႉတၢႆ ဢမ်ႇမီး။

ဝၼ်းတီႈ 3/7/2019 ယၢမ်းဝၢႆးဝၼ်း ၾႆးမႆႈႁိူၼ်းလုင်းလူင်လီ ဝၢၼ်ႈႁူၺ်ႈႁိူဝ်း ပွၵ်ႉပုင်းထုၼ် ၸႄႈဝဵင်းလၢင်းၶိူဝ်း ၸိုင်ႈတႆး ပွတ်းၸၢၼ်း ယွၼ်ႉၾႆးၾႃႉသျွတ်ႉလႄႈ ၾႆးလုၵ်ႉႁုပ်ႇမႆႈႁိူၼ်းတၢင်းလင် ဝႃႈၼႆ။

ၸၢႆးတဵင်းၸေႃႇဢူး ၸုမ်းၶႂႆႇၶႃပႄလႅင် လၢတ်ႈတီႈၽူႈတွႆႇႁွၵ်ႈဝႃႈ “ၾႆးၾႃႉသျွတ်ႉၶႃႈဢေႃႈ။ တီႈႁိူၼ်းၼၼ်ႉ မီးၵူၼ်းထဝ်ႈ ပႂ်ႉႁိူၼ်းဝႆႉၵေႃႉလဵဝ်ၵူၺ်းၶႃႈ။ ၵူၺ်းၵႃႈ ၵူၼ်းထဝ်ႈတႄႉ ဢမ်ႇပဵၼ်သင် တၼ်းပၢႆႈလွတ်ႈယူႇၶႃႈ။ ၵူၼ်းဝၢၼ်ႈ ဢွၼ်ၵၼ် ၸွႆႈၶႄသေ ၾႆးၸင်ႇတေမွတ်ႇၵႂႃႇၶႃႈ။ ယွၼ်ႉဝႃႈ ဝၢၼ်ႈႁူၺ်ႈႁိူဝ်းၼႆႉသမ်ႉယူႇၾၢႆႇပုၼ်ႉ ၼမ်ႉတဵင်းဝႆႉလႄႈ ၵႃးႁူတ်းၼမ်ႉ ၾၢႆႇ ၶႄၾႆးႁဝ်းၶႃႈ ဢမ်ႇၸၢင်ႈၵႂႃႇထိုင်လႆႈၶႃႈ” ဝႃႈၼႆ။

ႁိူၼ်းလုင်းလူင်လီ ဝၢၼ်ႈႁူၺ်ႈႁိူဝ်း ဢၼ်ၾႆးလႆႈမႆႈၵႂႃႇၼၼ်ႉ ပဵၼ်ႁိူၼ်းမႆႉ၊ ၵင်ႈၽႃလၢႆး၊ သိူဝ်ႇမႆႉပႅၼ်ႈလႄႈ မုင်းလဵၵ်းဝႆႉ ဝႃႈၼႆ။

ၸၢႆးတဵင်းၸေႃႇဢူး လၢတ်ႈဝႃႈ “ ၸဝ်ႈၶွင်ႁိူၼ်းတႄႉလၢတ်ႈၼႄဝႃႈ တင်းမူတ်းလႆႈလူႉသုမ်းၵႂႃႇမွၵ်ႈ 337,500 ပျႃးၼႆၶႃႈ။ ၶႃႈႁဝ်းလႆႈၵဵပ်းၶေႃႈမုလ်းသဵၼ်ႈသၢႆမၢႆသေ တၢင်ႇယွၼ်းဝႆႉပၼ် တီႈၸုမ်းၶႂႆႇၶႃပႄလႅင်ႁဝ်းဝႆႉယဝ်ႉၶႃႈ လွင်ႈၶူဝ်းၶွင်၊ ၽႃႈ ႁူမ်ႇ၊ ၶွင်ၸႂ်ႉတိုဝ်းၼႂ်းႁိူၼ်းယေး ၸဵမ်ၸိူဝ်းၼႆႉ တႃႇၵမ်ႉထႅမ်ပၼ်ၼၼ်ႉ သင်ဝႃႈ ၶူဝ်းၶွင်ၽႅဝ်မႃးၸိုင် ၶႃႈႁဝ်းတေၵႂႃႇ ၵမ်ႉ ထႅမ်ပၼ်ၶႃႈ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၶဝ် လႆႈပိုတ်ႇလိူင်ႈၸွႆးတြႃးၸဝ်ႈၶွင်ႁိူၼ်းဝႆႉ ယွၼ်ႉဝႆႉမဝ်မၢင် လွင်ႈၽိုၼ်းၾႆး ဝႃႈၼႆ။