မိူင်းတႆးပွတ်းႁွင်ႇ တီႈဝဵင်းမူႇၸေႊ ပွၵ်ႉၸွၼ်ႊၸူဝ်ႇၼၼ်ႉ ႁွင်ႈၶၢတ်ႈ 2 လင် ၵူၼ်းၶၢတ်ႈယူႇမီး 12 မေႃႈၶဝ်ႈၺႃးၽေး ၾႆးမႆႈ ၵႃႈၶၼ်လူႉသုမ်းၵႂႃႇၸွမ်းၾႆး ၼပ်ႉဢၢၼ်ႇႁူဝ်သိပ်းသႅၼ်ပျႃး။

ဝၼ်းတီႈ 15/05/2019 ယၢမ်းဝၢႆးဝၼ်း မွၵ်ႈ 2 မူင်း ၾႆးမႆႈႁိူၼ်းလုင်းၸၢမ်ႇၺဵင်း လၢမ်းမႆႈပႃးႁိူၼ်းလုင်းၶမ်းထႅၵ်ႉ ဢၼ် တိတ်းၸပ်းၵၼ် တီႈပွၵ်ႉၸွၼ်ႊၸူဝ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ယွၼ်ႉၾႆးၾႃႉသျွတ်ႉ တီႈမေႃႈတူမ်ႈႁုင်လႄႈ မေႃႈၼမ်ႉမႆႈ ဝႃႈၼႆ။

ၸၢႆးလဵၵ်ႉ ၵူၼ်းၼုမ်ႇမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်ႁိူၼ်းၵင်ႈၽႃလၢႆး မုင်းလဵၵ်းလႄႈမႆႈၵႂႃႇမူတ်း။ ဢမ်ႇတၼ်း လႆႈသင်။ ယွၼ်ႉၶၢဝ်းမႆႈၼႆႉ ၾႆးၵႆႉမွတ်ႇ။ တေမႃးၶၢဝ်းလႂ် ဢမ်ႇလမ်းႁူႉ။ ၶဝ်တင်ႈဝႆႉၶဝ်ႈ၊ တင်ႈဝႆႉၼမ်ႉမႆႈ ၾႆးသမ်ႉမွတ်ႇ ၵႂႃႇ၊ သမ်ႉဢမ်ႇပိၵ်ႉၾႆးမႅၼ်ႈလႄႈ ၽိူဝ်ႇၾႆးမႃး ၾႆးမႆႈၶႅမ်ႈသိုပ်ႇမႆႈပႃးႁိူၼ်းၵႂႃႇ” ဝႃႈၼႆ။

ႁိူၼ်းဢူးၸၢမ်ႇၺဵင်းၼႆႉ ႁဵတ်းဝႆႉ ႁွင်ႈထႅဝ်သေ ၶၢတ်ႈပၼ်ၵူၼ်းမိူင်း မိူင်းမၢၼ်ႈထုင်ႉလိၼ်ပဵင်းၶဝ် ၸိူဝ်းမႃး ႁဵတ်းၵၢၼ် တီႈမူႇၸေႊ။ ဢၼ်လႆႈပၼ်ၶၢတ်ႈဝႆႉတႄႉ မီး 4 ႁွင်ႈ။ လိူဝ်ၼၼ်ႉ တီႈႁိူၼ်းလုင်းၶမ်းထႅၵ်ႉၵေႃႈ ပဵၼ်ဝႆႉႁွင်ႈၶၢတ်ႈ မီး 8 ႁွင်ႈ။ ႁွင်ႈၶၢတ်ႈၸိူဝ်းၼႆႉၵေႃႈ မႆႈပႃးၵႂႃႇ ၸွမ်းၾႆးမူတ်း ဝႃႈၼႆ။

တီႈဝဵင်းမူႇၸေႊၼႆႉ ယွၼ်ႉၾႆးၾႃႉ ၵႆႉမႃးၵႆႉမွတ်ႇလႄႈ ၵူၼ်းမိူင်း ၵမ်းၵမ်းမီးပၼ်ႁႃၸွမ်း လွင်ႈၾႆးၾႃႉသျွတ်ႉ ဝႃႈၼႆ။

ယၢမ်းလဵဝ် မိူင်းႁူမ်ႈတုမ်ပတ်းပိုၼ်ႉပႃးမိူင်းတႆး တႄႇဢဝ်ႁူဝ်လိူၼ် May ၼႆႉမႃး ၾၢႆႇၵၢၼ်ႁႅင်းၾႆးၾႃႉၶဝ် ၵႆႉတတ်းၾႆး 24 ၸူဝ်ႈမူင်း၊ ၾႆးၶႂ်ႈၶၢတ်ႇ/မွတ်ႇ ဢမ်ႇယွမ်း 12 ၸူဝ်ႈမူင်း။

မိူဝ်ႈဝၼ်းတီႈ 10/06/2019 ၼၼ်ႉၵေႃႈ ၾႆးမႆႈတီႈႁၢၼ်ႉၶၢႆၼမ်ႉမၼ်း ပွၵ်ႉဝဵင်းသႃႇ ၸႄႈဝဵင်းၼမ်ႉၶမ်း လူႉသုမ်းၵႂႃႇၶၼ် ငိုၼ်း ဢမ်ႇယွမ်း မွၵ်ႈ 70 သႅၼ်ပျႃး။ လိူဝ်ၼၼ်ႉ ဝၼ်းတီႈ 07/05/2019 ၼၼ်ႉၵေႃႈ ၾႆးမႆႈတီႈႁၢၼ်ႉၶၢႆၾူၼ်း တီႈႁိမ်း ၵၢတ်ႇ ပွၵ်ႉ 5 ၸႄႈဝဵင်းၵူတ်ႉၶၢႆ မီးၵူၼ်းလႆႈလူႉတၢႆၵႂႃႇ ၸွမ်းၾႆး 2 ၵေႃႉ ဝႃႈၼႆ။