ၾႆးမႆႈဝတ်ႉ/ဝိႁၢရ် ပၢင်ပီႉ တီႈဢိူင်ႇၼႃးမွၼ် ၸႄႈဝဵင်းမိူင်းပၼ်ႇၼၼ်ႉ ၸွမ်းၼင်ႇမီးၶၢဝ်ႇလိုဝ်းဝႃႈ ၶွင်ႇသီႇဢဝ် ၶိုၼ်း ၸိုင်ႈတႆး ၽဝ်ဝႃႈၼႆသေ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး ပၢၵ်ႈပႅတ်ႈ ဝႃႈဢမ်ႇၸႂ်ႈ။

ဝၼ်းတီႈ 07/11/2018 ယၢမ်းၵၢင်ၶိုၼ်း 11 မူင်းၼၼ်ႉ ၾႆးမႆႈဝတ်ႉဝိႁၢရ် ၸၢဝ်းပဢူဝ်း တီႈဝၢၼ်ႈမႆႉပူၵ်ႇပၢင်ပီႉ ဢိူင်ႇ ၼႃးမွၼ် ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။ ၸဝ်ႈသၢင်ႇလႆႈလွၼ်ႇ ပႃး 2 တူၼ်။ မီး ၶၢဝ်ႇလိုဝ်းဝႃႈ ပဵၼ်ၶွင်ႇသီႇဢဝ်ၶိုၼ်းၸိုင်ႈတႆးၵေႃႉၽဝ် ဝႃႈၼႆ။

ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ RCSS/SSA တီႈလုမ်းၵပ်းသၢၼ်တူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ သိုၵ်းႁဝ်း ၵႂႃႇၸုတ်ႇဝတ်ႉဢၼ်ဝႃႈၼၼ်ႉ ဢမ်ႇၸႂ်ႈ ယႃႇဝႃႈတေၽဝ်လႃႈ တင်းႁဝ်းၶႃႈ မိူၼ်ၼင်ႇ ႁဵတ်းဝတ်ႉမႂ်ႇႁႃႉ ၵျွင်းမႂ်ႇ ႁႃႉ ႁဝ်းယင်းၶဝ်ႈႁူမ်ႈလူႇတၢၼ်းၸွႆႈယူႇ။ သမ်ႉထႅင်ႈ လွင်ႈၼိုင်ႈၵေႃႈ ပဵၼ်ၽႃသႃ၊ သႃသၼႃ လွင်ႈဝတ်ႉဝႃး၊ ပုတ်ႉထ ၽႃသႃ ႁဝ်း ႁဝ်းၵေႃႈပဵၼ်ၵူၼ်းယုမ်ႇယမ်ပုတ်ႉထၽႃသႃ ႁဝ်းတေႁဵတ်းႁိုဝ်ၵႂႃႇႁဵတ်းလႃႇ လွင်ႈၼႆႉ” ဝႃႈၼႆ။

ဝၢႆးသေ RCSS တင်း PNLO ပဵၼ်ပၢင်တိုၵ်းၵၼ် မိူဝ်ႈပူၼ်ႉမႃး တီႈတၢင်းဝၢၼ်ႈမႆႉပူၵ်ႇပၢင်ပီႉ ဢိူင်ႇၼႃးမွၼ်ၼၼ်ႉသေ ဝၢႆးၼၼ်ႉမႃး တပ်ႉသိုၵ်းလူင်ပွင်ၸိုင်ႈမၢၼ်ႈ ၶဝ်ႈၵႂႃႇပၵ်းသဝ်းတင်ႈတပ်ႉဝႆႉ တီႈႁိမ်းဝတ်ႉပဢူဝ်း တီႈဝၢၼ်ႈမႆႉပူၵ်ႇ ပၢင် ပီႉၼၼ်ႉဝႆႉ တေႃႇထိုင် ယၢမ်းလဵဝ် ဝႃႈၼႆ။

ၸဝ်ႈသိုၵ်း ၸၢႆးဢူး သိုပ်ႇလၢတ်ႈဝႃႈ “ ပေႃးပဵၼ်ၶၢဝ်ႇမႃးၼိုင်ႈဢၼ် လွင်ႈၾႆးမႆႈဝႃႇ သင်ဝႃႇ ၸိူင်ႉၼၼ်ႉတႄႉ ႁိူၼ်း ၵူၼ်းသေဢမ်ႇဝႃႈ ဝတ်ႉမုၼ်ၸဝ်ႈသေဢမ်ႇဝႃႈ မၼ်းၵေႃႈ ၸင်ႈပဵၼ်ယူႇ ၸင်ႈမႆႈယူႇ လွင်ႈၵူၼ်းမဝ်မၢင် တႆႈၾႆး တဵၼ်းႁႃႉ ၽေးသေမဵဝ်းမဵဝ်းႁႃႉ လႆႈၾႆးမႆႈၵႂႃႇၸိူင်ႉၼၼ်ႉၵေႃႈ ၸင်ႈပဵၼ်လႆႈယူႇ။ မိူဝ်ႈပူၼ်ႉမႃး တီႈၸိူဝ်းၼၼ်ႉ ႁဝ်း တင်း PNLO ပဵၼ်ပၢင်တိုၵ်းၵၼ်သေ သမ်ႉၼႄးဝႃႈပဵၼ် သိုၵ်းႁဝ်းၽဝ်ၼႆ မၼ်းဢမ်ႇထုၵ်ႇပဵၼ်။ ၵွပ်ႈပိူဝ်ႈမၼ်း ၵေႃႈ ဢမ်ႇမီးလၵ်ႉထၢၼ်သၢၵ်ႈသႄႇသင်။ ၵဵဝ်ႇလူၺ်ႈလွင်ႈ သိုဝ်ႇၶၢဝ်ႇမီႊတီႊယိူဝ်ႊ ၵႆႉသႄႇၵႆႉယူင်းပၼ် ႁႂ်ႈၶိူဝ်းၼိုင်ႈလႄႈ ၶိူဝ်းၼိုင်ႈ ႁၼ်ၽိတ်းၵၼ်ၼႆႉ မၼ်းဢမ်ႇလီ မၼ်းၸၢင်ႈပဵၼ်ပၼ်ႁႃၸၢဝ်းၶိူဝ်း တင်းသွင်ၾၢႆႇ။ ၽႂ်ၵေႃႉႁၵ်ႉၶိူဝ်းၽႂ် မၼ်းဢၼ်ဝႃႈၼၼ်ႉ မႅၼ်ႈယူႇ ၵူၺ်းၵႃႈ ႁၵ်ႉၶိူဝ်းၸဝ်ႈၵဝ်ႇသေ ႁႂ်ႈၵႂႃႇၸင်းၶိူဝ်းပိူၼ်ႈၼၼ်ႉ ယႃႇႁႂ်ႈလႆႈပဵၼ်၊ ႁဝ်းလႄႈ တင်း ပီႈၼွင်ႉပဢူဝ်းၼႆႉ ယူႇမႃးၸွမ်းၵၼ် ပီႈယၢဝ်းၶၢဝ်းႁိုင်ၶႃႈယဝ်ႉ” ဝႃႈၼႆ။

ၸွမ်းၼင်ႇႁွင်ႈၵၢၼ်ပိုၼ်ၽၢဝ်ႇ RCSS/SSA (တႆးလွတ်ႈလႅဝ်း) ဢွၵ်ႇဝႆႉဝႃႈ ပိူင်ပဵၼ်လွင်ႈၾႆးမႆႈဝတ်ႉမုၼ်ၸဝ်ႈ ၸၢဝ်း ပဢူဝ်း တီႈဝၢၼ်ႈမႆႉပူၵ်ႇပၢင်ပီႉၼႆႉ ယွၼ်ႉၸဝ်ႈသၢင်ႇဢွၼ်ႇ ၸပ်းတဵၼ်း ဝႆႈၽြႃး ဢမ်ႇမီးၽႂ်ပႂ်ႉ တူၺ်း သေ ၾႆးတဵၼ်း ဢၼ်ၸပ်းဝႆႉၼၼ်ႉ လႆႈမႆႈဝတ်ႉဝိႁၢရ်မႃး မိူဝ်ႈယၢမ်းၵၢင်ၶိုၼ်း 11 မူင်း” ဝႃႈၼႆ။

ဝၼ်းတီႈ 16/10/2018 ယၢမ်းၵၢင်ၼႂ် မွၵ်ႈ 5:45 မူင်းၼၼ်ႉ သိုၵ်း PNLO တင်း သိုၵ်း RCSS/SSA လႆႈ ပဵၼ် ပၢင်တိုၵ်း ၵၼ် တီႈလွႆၵွင်းမူး ၾၢႆတူၵ်းဝၢၼ်ႈမႆႉပူၵ်ႇ ဢိူင်ႇၼႃးမွၼ် ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆး ပွတ်း ၸၢၼ်း။

သိုၵ်း PNLO တင်း သိုၵ်း RCSS/SSA ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၼင်ႇၵၼ် သေဢမ်ႇၵႃး ပဵၼ်ၼႂ်းလုၵ်ႈၸုမ်းၼႂ်း PPST ထႅင်ႈလူးၵွၼ်ႇ ဝႃႈၼႆ။