သိုၵ်းဢူၺ်းလီပွတ်းႁွင်ႇ တင်း သိုၵ်း RCSS ပဵၼ်ပၢင် တိုၵ်းၵၼ်ႁၢဝ်ႈႁႅင်း တၢင်းဝၢၼ်ႈႁူမ်ႈ ဢိူင်ႇၼႃးမၢၵ်ႇၶေႃ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ပၢင်တိုၵ်းပဵၼ် မိူဝ်ႈၼႆႉ ဝၼ်းတီႈ 02/11/2018 ယၢမ်းၵၢင်ဝၼ်း 11 မူင်းပၢႆ။
ၸၢႆးၶမ်းဢွင်ႇ ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ထိုင် ယၢမ်းၵၢင်ဝၼ်းတဵင်ႈၼႆႉ ၵူၼ်းၼႂ်းပိုၼ်ႉတီႈတၢင်းဝၢၼ်ႈၼႃးမၢၵ်ႇၶေႃပွင်ႇမႃးဝႃႈ တိုၵ်ႉပဵၼ်ပၢင်တိုၵ်းၵၼ်ယူႇ။ ပၢင် တိုၵ်းတႄႉတႄႇပဵၼ်မိူဝ်ႈၼႂ်ၵႆႈၼႆႉ” ဝႃႈၼႆ။
ၵူၼ်းၼုမ်ႇသီႇပေႃႉတႄႉ လၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈဝႃႈ “ ၵူၼ်းပၢႆႈၽေးသိုၵ်းမႃးမီးတီႈၵျွင်းၼႃးမၢၵ်ႇၶေႃ 300 ပၢႆပဵၼ်ၵူၼ်းဝၢၼ်ႈၼႂ်းလူင်၊ ဝၢၼ်ႈတႃႈလူင်လႄႈဝၢၼ်ႈႁူဝ်ၼႃး ၼႂ်းဢိူင်ႇၼႃးမၢၵ်ႇၶေႃ” ဝႃႈၼႆ။
ပၢင်တိုၵ်းၼႆႉ ပဵၼ်တၢင်းဝၢၼ်ႈႁူမ်ႈ ၾၢႆႇတူၵ်းဝၢၼ်ႈၼႃးမၢၵ်ႇၶေႃ ယၢၼ်ၵႆ မွၵ်ႈ 4 လၵ်း။ ပဵၼ် ၾၢႆႇၸၢၼ်းဝၢၼ်ႈ တႃႈလူင်။ ဢိူင်ႇၼႃးမၢၵ်ႇၶေႃ တင်း ဢိူင်ႇၼမ်ႉလၼ်ႈၼႆႉ ယၢၼ်ၵၼ် 16 လၵ်း မီးၾၢႆႇၸၢၼ်းဝဵင်းသီႇပေႃႉ ဝႃႈၼႆ။
လိူဝ်ၼၼ်ႉ မိူဝ်ႈဝႃး ဝၼ်းတီႈ 01/11/2018 ယၢမ်းႁူဝ်ၶမ်ႈ မွၵ်ႈ 5 မူင်း ၵူၼ်းမိူင်းပၢႆႈၽေးသိုၵ်း တၢင်းၼႂ်းဢိူင်ႇ ဝၢၼ်ႈသၢင်း ဝၢၼ်ႈၼႃး၊ ဝၢၼ်ႈၵွင်းဝဵင်း၊ ဝၢၼ်ႈၶုမ်ႇ၊ ဝၢၼ်ႈပဵင်းသႃႇ(ဝၢၼ်ႈၵွင်း)လႄႈ ဝၢၼ်ႈမႂ်ႇ ႁူဝ်ၵူၼ်း 328 ၵေႃႉ လႆႈဢွၼ်ၵၼ်ပၢႆႈၽေးမႃးသွၼ်ႈဝႆႉတီႈဝတ်ႉဝိႁၢရ်လူင်ဢိူင်ႇတႃႈတေႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
ၵူၼ်းပၢႆႈၽေးသိုၵ်း ၵေႃႉၼိုင်ႈ ဢၼ်ႁွတ်ႈၽႅဝ်ဝႆႉတီႈ ဝတ်ႉဝိႁၢရ်လူင်ဢိူင်ႇတႃႈတေႈ လၢတ်ႈတီႈၽူႈတွႆႇႁွၵ်ႈဝႃႈ “ လႆႈႁၼ်သိုၵ်း တင်းသွင်ၾၢႆႇတူင်ႉၼိုင်ၵႂႃႇႁၢဝ်ႈႁႅင်း ယွၼ်ႉၼၼ်လႄႈ ႁဝ်းၶႃႈၵူဝ်ပဵၼ်ပၢင်တိုၵ်းၵၼ်သေ ၸင်ႇငိူင်ႉ ဝႄႈပၢႆႈဢွၵ်ႇမႃး” ဝႃႈၼႆ။
ၼႂ်းဝူင်ႈဝၢင်ႈၼႆႉ တပ်ႉသိုၵ်းဢူၺ်းလီပွတ်းႁွင်ႇလႄႈ တပ်ႉသိုၵ်းၸိုင်ႈတႆး RCSS ပဵၼ်ပၢင်တိုၵ်းၵၼ်ၶိူဝ်းယႂ်း။ မိူၼ်ၼင်ႇၼႂ်းၸႄႈဝဵင်းၼမ်ႉတူႈ၊ လႃႈသဵဝ်ႈ၊ သီႇပေႃႉလႄႈ ၵူၼ်းမိူင်းပၢႆႈယၢၼ်ႁိူၼ်းယေး ပၢႆႈၽေးသိုၵ်းသွၼ်ႈယူႇ ၸွမ်းဝတ်ႉဝႃးၽႃသိူဝ်ႇ မီး 2 ႁဵင်ပၢႆ။
ၵူၼ်းမိူင်းၵုမ်ႇပၢႆႈၽေးသိုၵ်းၵူၺ်းလႄႈ ဢွၼ်ၵၼ်မႆႈၸႂ်မၢၵ်ႇၶဝ်ႈတဝ်ႈၼမ်ႉတႃႇပီတေမႃးၵူၺ်းယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ