ၸုမ်းသိုၵ်းဢူၺ်းလီပွတ်းႁွင်ႇ မႃးတူင်ႉၼိုင်ယူႇႁိမ်းႁွမ်းဝၢၼ်ႈ ၵူၼ်းဝၢၼ်ႈတႃႈတေႈ ၵမ်ႈၽွင်ႈ မႆႈၸႂ် လွင်ႈသိုၵ်း လွင်ႈသိူဝ်သေ ငိူင်ႉဢွၵ်ႇဝၢၼ်ႈမႃး ၶၢဝ်းတၢင်း ႁိမ်းလိူၼ်ၵေႃႈပႆႇႁတ်း ပွၵ်ႈမိူဝ်းဝၢၼ်ႈၶိုၼ်း။
ၵူၼ်းဝၢၼ်ႈတႃႈတႄႈ တႄႇငိူင်ႉပၢႆႈ မိူဝ်ႈႁူဝ်လိူၼ်ၻီႊသႅမ်ႊပိူဝ်ႊ ပီ 2021 ၼႆႉမႃး ႁၢၼ်ႉတေႃႇထိုင် ဝၼ်းတီႈ 15 ၼႆႉ ပႆႇႁတ်းပွၵ်ႈဝၢၼ်ႈၶိုၼ်း။ ယၢမ်းလဵဝ် မႃးယူႇၸွမ်းသူၼ်မၢၵ်ႇမူင်ႈ ႁိူၼ်းပီႈၼွင်ႉ တီႈဝၢၼ်ႈတူင်ႈၸၢင်ႉ ၸႄႈဝဵင်းသီႇပေႃႉ ႁူဝ်ၵူၼ်း မွၵ်ႈ 70 ပၢႆ။ ပဵၼ်ၶၢဝ်းၵတ်းလႄႈ ယၢပ်ႇၽိုတ်ႇ ယူႇလၢႆၸိူဝ်ႉလၢႆလွင်ႈ။
ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ဢၼ်ၵိုတ်းဝႆႉတႄႉ တေမီး 75 ၵေႃႉၼႆႉၶႃႈ။ ပႆႇႁတ်းမိူဝ်းၶိုၼ်းၶႃႈ။ ။ ၸိူဝ်းၵိုတ်းတႄႉ (1) ၵူဝ်ပၢင်တိုၵ်း၊ (2) ၵူဝ်ပိူၼ်ႈၵဵပ်းလုၵ်ႈလၢင်းၶဝ်ၵႂႃႇႁဵတ်းသိုၵ်း ၼၼ်ႉၶႃႈၼႃႇ။ ၸိူဝ်းမီး လုၵ်ႈၸၢႆး 2-3 ၵေႃႉ ၸိူဝ်းၼႆႉဢေႃႈ”– ဝႃႈၼႆ။
ထုင်ႉတႃႈတႄႈၼႆႉ မီးၾၢႆႇႁွင်ႇဝဵင်းသီႇပေႃႉ ႁၢင်ႇယၢၼ် မွၵ်ႈ 7 လၵ်း၊ မိူဝ်ႈၵူႈပွၵ်ႈ ၸုမ်းဢူၺ်းလီသိုၵ်းပွတ်းႁွင်ႇ ယူႇၾၢႆႇ ႁွင်ႇၼမ်ႉတူႈ၊ သိုၵ်း RCSS သမ်ႉယူႇၼႂ်းဝၢၼ်ႈ၊ ယၢမ်းလဵဝ် တႄႉ ၸုမ်း RCSS ငိူင်ႉဢွၵ်ႇ ထွၼ်ထွႆ မူၵ်းသွၼ်ႉႁၢႆတူဝ်ဝႆႉ၊ ၸုမ်းဢူၺ်းလီသိုၵ်းပွတ်းႁွင်ႈသမ်ႉ ၶူၼ်ႉသွၵ်ႈလမ်းႁႃ – ၵဵပ်းသိုၵ်းမႂ်ႇ ။
ၵူၼ်းဝၢၼ်ႈ ၵမ်ႈၼမ်ၵေႃႈ ဢမ်ႇမီးလွင်ႈ ယုမ်ႇ ယမ်ၼိူဝ် ၸုမ်းဢူၺ်းလီသိုၵ်းပွတ်းႁွင်ႇလႄႈ တႃႇပွၵ်ႈၶိုၼ်းဝၢၼ်ႈၵေႃႈ ၵိၼ်းၸႂ်ဝႆႉ – ၼႆ ၵူၼ်းတႃႈတႄႈ ဢၼ်ႁွတ်ႈဝႆႉ သီႇပေႃႉၼၼ်ႉလၢတ်ႈၼင်ႇၼႆ။
