မုၵ်ႉၸုမ်းၼၢင်းယိင်းၸိုင်ႈတႆး SSWO ၸတ်းႁဵတ်းပွႆးလိုဝ်ႈပၢင်သွၼ် ၵၢၼ်ယုၵ်ႉမုၼ်းၼမ်ႉၵတ်ႉ ၽူႈဢွၼ်ႁူဝ် ၼၢင်း ယိင်းၼုမ်ႇ ၸုပ်ႈထီႉ 3 တီႈလုမ်းဢုပ်ႉပိူင်ႇ ငဝ်ႈငုၼ်းပႃႇတီႇမႂ်ႇသုင်ၸိုင်ႈ ဝဵင်းမႂ်ႇဝၢၼ်ႈႁႆး ၸႄႈဝဵင်းၵေးသီး ၸိုင်ႈတႆး ပွတ်းၸၢၼ်း မီးၽူႈယႂ်ႇၵူၼ်းလူင်ငဝ်ႈငုၼ်းလႄႈ ၵေႃႇမတီႇ ၶဝ်ႈႁူမ်ႈၸွမ်းတင်းၼမ်။

ပၢင်သွၼ်ဢၼ်လႆႈတႄႇပိုတ်ႇမိူဝ်ႈဝၼ်းတီႈ 08/07/2018 ၼၼ်ႉ ပိုတ်ႇသွၼ်ႁဵၼ်း ၶၢဝ်းတၢင်း  3 လိူၼ် သေလႆႈၸတ်းပၢင်လိုဝ်ႈပၢင်သွၼ်ၵႂႃႇ မိူဝ်ႈဝၼ်းတီႈ 05/10/2018 ယၢမ်းၵၢင်ၼႂ် 8 မူင်း ။

ပၢင်သွၼ်ၼႂ်းၶၢဝ်းတၢင်း 3 လိူၼ်ၼၼ်ႉမီး  လုၵ်ႈႁဵၼ်း  28 ၵေႃႉ မႃးႁဵၼ်းဢဝ်သေ မီးမေႃသွၼ်   4 ၵေႃႉလႆႈပူင်သွၼ်ပၼ်။ လုၵ်ႈႁဵၼ်း ပဵၼ်ၼၢင်းယိင်းၼုမ်ႇ ဢႃယု 18 တေႃႇထိုင် 25 ပီ။ ပဵၼ်ၵူၼ်း ပိုၼ်ႉတီႈ သီႇပေႃႉ၊ မိူင်းယႆ၊ ၵေးသီး ၸိူဝ်းၼႆႉ ဝႃႈၼႆ။

ၵဵဝ်ႇၵပ်းပၢင်သွၼ်ၼႆႉ မီးၽႃသႃၵၢၼ်ႁဵၼ်း မိူၼ်ၼင်ႇ ပၢႆးၵူၼ်းမိူင်းလီ၊ သုၼ်ႇလႆႈသုၼ်ႇပဵၼ်ၵူၼ်း။ သုၼ်ႇလႆႈသုၼ်ႇ ပဵၼ်ၼၢင်းယိင်း။ ပိူင်ၶွတ်ႇၽွတ်ႈပိူင်လူင်ပွင်ၸိုင်ႈ လွင်ႈယူႇသၢင်ႈၵိၼ်သဝ်း။ ငဝ်ႈၶၢမ်ႇပိုၼ်ႉသိင်ႇဝႅတ်ႉလွမ်ႉပိုၼ်ႉ ထၢၼ် ၶွမ်းၽိဝ်ႊတိူဝ်ႊ၊ ၾၢႆႇသဵၼ်ႈမၢႆၵူႈလွင်ႈလွင်ႈ၊ ပၢႆးၵၢၼ်ႁဵၼ်းမေႃသွၼ် ၸဵမ်ၸိူဝ်းၼႆႉ။

မေႃသွၼ်ၼၢင်းႁိူၼ်းၶမ်း ၵေႃႉပဵၼ်ၽူႈၼမ်းၼႂ်းမုၵ်ႉၸုမ်းၼၢင်းယိင်းၸိုင်ႈတႆး SSWO လၢတ်ႈဝႃႈ “ 1) ၶႂ်ႈႁႂ်ႈၼၢင်း ယိင်းၼုမ်ႇႁဝ်း လႆႈၶဝ်ႈႁူမ်ႈႁဵတ်းၵၢၼ်မိူင်း။ 2) တႃႇႁႂ်ႈၸိူဝ်းၶဝ်ဢၼ်မႃး ႁဵၼ်းဢဝ်ၼင်ႇဢၼ်မေႃယဝ်ႉ တင်းသဵင်ႈ ၶိုၼ်းသိုပ်ႇမိူဝ်းသွၼ်ပၼ်ၼႂ်းပိုၼ်ႉတီႈတူဝ်ၵဝ်ႇ။ 3) တႃႇႁႂ်ႈပဵၼ်သိၵ်ႈၶူဝ်လႆ ဢၼ်တေယၢင်ႈၸူးၼႂ်းၵၢၼ်မိူင်းလႄႈ ၵၢၼ်ၸိူဝ်ႉၸၢတ်ႈ” ဝႃႈၼႆ။

ယိူင်းဢၢၼ်းဢၼ်လႆႈၸတ်းႁဵတ်းပၢင်သွၼ်မႃးၶၢဝ်းတၢင်းသၢမ်လိူၼ်ၼႆႉ တႃႇႁႂ်ႈၼၢင်းယိင်းၵူႈၵေႃႉ မေႃၶဝ်ႈဢွၵ်ႇၼႂ်းၵၢၼ်တူင်ႇဝူင်းၵူၼ်း၊ ႁႂ်ႈႁတ်းလၢတ်ႈ ၼႂ်းပၢင်ၵူၼ်းၼမ်၊ ႁႂ်ႈမီးလွင်ႈယုမ်ႇယမ်တူဝ်ၵဝ်ႇ  ၊ ႁႂ်ႈၶဝ်ႈၸႂ်ၼိူဝ်ၵၢၼ်ႁဵၼ်းလႄႈ လူဢၢၼ်ႇလိၵ်ႈၼမ်ၼမ်ဝႃႈၼႆ။

မေႃသွၼ်ၼၢင်းႁိူၼ်းၶမ်းလၢတ်ႈဝႃႈ – “ယွၼ်ႉပိူဝ်ႈၼၢင်းယိင်းႁဝ်း ၼႆႉ ပဵၼ်ၵူၼ်းလႆႈဢဝ်ပုၼ်ႈၽွၼ်း ၼမ်လိူဝ်ၽူႈၸၢႆးလႄႈ ႁဝ်းတေလႆႈမီးတၢင်းႁူႉသေ ႁပ်ႉပုၼ်ႈၽွၼ်းတူဝ်ၵဝ်ႇလႆႈလီ လီ” ဝႃႈၼႆ။

ၼၢင်းၸၢမ်ပဝ်း လုၵ်ႈႁဵၼ်း ၵေႃႉၼိုင်ႈလၢတ်ႈဝႃႈ “ ဢၼ်ႁဝ်းၶႃႈ လႆႈမႃး ႁဵၼ်းဢဝ် ၼႂ်းၶၢဝ်းတၢင်းသၢမ်လိူၼ်ၼႆႉ မီးၽွၼ်းလီတႃႇတူဝ်ၵဝ်ႇ။  ၸႂ်ဢၼ်ယၢမ်ႈၵူဝ်ၵေႃႈ မေႃႁတ်းႁၢၼ်မႃး ဝၢႆးလူင်းပၢင် သွၼ်ယဝ်ႉ ယုမ်ႇယမ်ဝႃႈ တေပဵၼ်လႆႈသၢႆႁိူဝ်ႈလႅင်းတဵၼ်းဢွၼ်ႇ ထွင်ႇပၼ်ၵူႈၵေႃႉယူႇ။သင်ဝႃႈမီးပၢင်သွၼ်ၸိူင်ႉၼႆထႅင်ႈ ႁႂ်ႈလႆႈ ဢွၼ်ၵၼ်မႃးၶဝ်ႈႁူမ်ႈလဵပ်ႈႁဵၼ်းဢဝ် ၶၢဝ်းယၢမ်းဢမ်ႇႁိုင် ထိုင်သၢမ်လိူၼ်ၵေႃႈယဝ်ႉ ႁႃႈဝၼ်းၵူၺ်းၵေႃႈ ပေႃးပဵၼ် ၵၢၼ်လဵပ်ႈႁဵၼ်းၼႆႉ မၼ်းဢမ်ႇလူႉသုမ်းသင် မၼ်းႁဵတ်းႁႂ်ႈႁဝ်းမီးၸႂ် မေႃတေႃႉသူႇၸၢတ်ႈပၢၼ်တူဝ်ၵဝ်ႇမႃးၶိုၼ်း” ဝႃႈၼႆ။

မုၵ်ႉၸုမ်းၼၢင်းယိင်းၸိုင်ႈတႆး SSWO ၼႆႉ လႆႈၶွတ်ႇၽွတ်ႈမႃး မိူဝ်ႈပီ 2013-04-18 တေႃႇထိုင် ယၢမ်းလဵဝ် ယိူင်း ဢၢၼ်းဢၼ်လႆႈၵေႃႇတင်ႈမႃး တႃႇႁႂ်ႈၼၢင်းယိင်းၵူႈၵေႃႉမီးၼမ်ႉၵတ်ႉၸုၵ်းမၼ်ႈလႆႈတူဝ်ၵဝ်ႇ၊ ႁႂ်ႈလႆႈမီးၼမ်ႉၵတ်ႉ ၶဝ်ႈႁူမ်ႈႁဵတ်းသၢင်ႈၵၢၼ်မိူင်း ၸိူဝ်ႉၸၢတ်ႈၸၢဝ်းၶိူဝ်းၽႂ်မၼ်းသေၸင်ႇလႆႈႁူမ်ႈၵၼ်ၶွတ်ႇၽွတ်ႈမႃး ဝႃႈၼႆ။

ပၢင်သွၼ်ယုၵ်ႉမုၼ်းၼမ်ႉၵတ်ႉၼၢင်းယိင်းၼုမ်ႇၼႆႉ မိူဝ်ႈဢွၼ်တင်းၵေႃႈ ယၢမ်ႈလႆႈၸတ်းႁဵတ်းမႃးယူႇ ပွၵ်ႈၵမ်းၼႆႉ ပဵၼ်ပွၵ်ႈၵမ်း 3 ။

(ၼွင်ႉယုမ်ႉ သူင်ႇၶၢဝ်ႇ)