မၢၵ်ႇတႅၵ်ႇ တီႈၼႂ်းဝၢင်းႁိူၼ်းလင်ၼိုင်ႈ ၼႂ်းပွၵ်ႉ 7 ဝဵင်းလႃႈသဵဝ်ႈ ။ ၸဝ်ႈၼႃႈတီႈပလိၵ်ႈ တိုၵ်ႉၵူတ်ႇ ထတ်း တူၺ်းယူႇ ဝႃႈၼႆ။

မိူဝ်ႈၼႆႉ ဝၼ်းတီႈ 11/10/2018 ယၢမ်းၵၢင်ၶမ်ႈ မွၵ်ႈ 9 မူင်း မၢၵ်ႇတႅၵ်ႇ  ၼႂ်းႁိူၼ်းလင်ၼိုင်ႈ မၢႆႁိူၼ်း 34 ဢၼ်မီးတီႈသဵၼ်ႈတၢင်း တၢၼ်ႇလုၼ်ႇ ပွၵ်ႉ 7 ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ တိူဝ်ႉၽႃႁိူၼ်းၽႃႁူဝ်လႄႈ မၢၼ်ႇ(ၵႅဝ်ႈ)ၽၵ်းတူႁူးလႅင်းတႅၵ်ႇ။  ၵူၼ်းႁိူၼ်း/ ၵူၼ်းႁိမ်းႁွမ်း တႄႉဢမ်ႇမီးလွင်ႈ တိူဝ်ႉမၢတ်ႇ  လူႉတၢႆ  ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ (3) ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈ တွႆႇႁွၵ်ႈဝႃႈ “ မိူဝ်ႈၵႆႈၼႆႉၵပ်းသိုပ်ႇတိတ်းတေႃႇ ၸဝ်ႈၼႃႈတီႈၶဝ် လႄႈၶဝ်ဝႃႈ ပဵၼ်လွင်ႈတႅၵ်ႇတႄႉယူႇ ယိုၼ်ႈယၼ်ဝႆႉ ၼင်ႇၼႆ။ လွင်ႈတုမ်ႉတိူဝ်ႉသႂ်ႇၵူၼ်း လူႉတၢႆ မၢတ်ႇၸဵပ်းတႄႉ ဢမ်ႇမီး။ တေႃႈလဵဝ်ၼႆႉ တိုၵ်ႉၵူတ်ႇထတ်းယူႇဝႃႈ ပဵၼ်ဢီႈသင်တႅၵ်ႇ။  ဢၼ် ပဵၼ်ၸဝ်ႈႁိူၼ်းၼၼ်ႉၵေႃႈ ၸဝ်ႈၼႃႈတီႈၶဝ် တိုၵ်ႉၵူတ်ႇထတ်း ၸႅတ်ႈထၢမ်ဝႆႉယူႇ” ဝႃႈၼႆ။

ၸဝ်ႈႁိူၼ်းၼၼ်ႉလႆႈႁူႉဝႃႈပဵၼ်ၸၢဝ်းၶႄႇ။ ၸိုဝ်ႈႁွင်ႉ ယၢၼ်ႇၶျူင်ႇသျိၼ်း ။ ႁဵတ်းၵၢၼ်သင်တႄႉတႄႉပႆႇႁူႉ ။ ယွၼ်ႉပိူဝ်ႈၼႂ်းဝၢင်းႁိူၼ်းၼၼ်ႉမီးပုင်းပွတ်းတင်းၼမ် ၼႆလႆႈႁူႉၸွမ်းၼင်ႇ ၶေႃႈမုၼ်းလႆႈတီႈၸဝ်ႈၼႃႈတီႈမွၵ်ႇလၢတ်ႈ ဝႃႈၼႆ။

ၸၢႆးဝၼ်းလႅင်းၶမ်းသိုပ်ႇလၢတ်ႈထႅင်ႈဝႃႈ- “ၵွပ်ႈၼၼ်လႄႈ ပဵၼ်ပိူၼ်ႈယူႇတၢင်းၼွၵ်ႈသေ ထိုမ်ႈၶဝ်ႈဝၢင်းႁိူၼ်းႁိုဝ်ဢမ်ႇၼၼ် တႅၵ်ႇၼႂ်းဝၢင်းႁိူၼ်းႁင်းၵူၺ်းႁိုဝ်ၼႆ ပႆႇၸၢင်ႈလၢတ်ႈ။   တိုၵ်ႉၵူတ်ႇထတ်းယူႇ။ ပေႃး တူၺ်း လွင်ႈတႅၵ်ႇၼႆႉ သဵင်မၼ်းၵေႃႈယွၼ်ႈ၊ ၾႃႁိူၼ်းၵေႃႈ တိူဝ်ႉၺႃး၊ ၽၵ်းတူႁိူၼ်း မၢၼ်ႇႁိူၼ်း ၸဵမ်ၸိူဝ်းၼႆႉၵေႃႈ လူႉၵွႆပႃးၼႆတႄႉလႅပ်ႈၼေပဵၼ်မၢၵ်ႇ ၸဝ်ႈၼႃႈတီႈၶဝ်လၢမ်းၶၢတ်ႈဝႆႉၼင်ႇၼႆ။ လွင်ႈၼႆႉတႄႉ မိူဝ်ႈၽုၵ်ႈမိူင်းလႅင်းမႃး ၸဝ်ႈၼႃႈတီႈၶဝ် လႅပ်ႈတေလၢတ်ႈ လႆႈယူႇ ဝႃႈပဵၼ်လွင်ႈသင်တႄႉတႄႉ” ဝႃႈၼႆ။

တီႈပွၵ်ႉ 7 ဝဵင်းလႃႈသဵဝ်ႈၼႆႉ ၵူၼ်းမိူင်းဢၼ်ယူႇသဝ်းၵမ်ႈၼမ် ပဵၼ်ၸၢဝ်းၶိူဝ်းတႆး၊ ၵလႃး၊ ၶႄႇလႄႈ မၢၼ်ႈ ၸဵမ်ၸိူဝ်း ၼႆႉ။

ပူၼ်ႉမႃး မိူဝ်ႈဝၼ်းတီႈ 21/02/2018 ၼၼ်ႉၵေႃႈ မၢၵ်ႇတႅၵ်ႇတီႈယေးငိုၼ်းယူဝ်းမ ဝဵင်းလႃႈသဵဝ်ႈ မႃးၵမ်းၼိုင်ႈယဝ်ႉ။ တိူဝ်ႉၺႃးၵူၼ်းမိူင်းတၢႆ 2 ၵေႃႉ မၢတ်ႇၸဵပ်းသၢဝ်းပၢႆ ။ ဝၢႆးလင်ၼၼ်ႉသေ ၸင်ႇမႃးပဵၼ်ၶိုၼ်းပွၵ်ႈၵမ်းၼႆႉ  ။