ပၢင်ၵုမ်သႅၼ်းၽူႈၼမ်းသုင်သုတ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း၊ လူင်ပွင်ၸိုင်ႈ၊ သၽႃးလႄႈ တပ်ႉမတေႃႇမၢၼ်ႈ တေႁူပ်ႉဢုပ်ႇၵၼ် ၼႂ်းၵၢင်လိူၼ်ၼႆႉ။

ဝၼ်းတီႈ 15/10/2018 တေထိုင်မႃးၼႆႉ ပဵၼ်ဝၼ်းဢၼ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 8 ၸုမ်း လူင်းလၢႆးမိုဝ်းၵိုတ်း တိုၵ်းပတ်းပိုၼ်ႉတူဝ်ႈမိူင်း NCA ၶွပ်ႈတဵမ် 3 ပီလႄႈ တေၸတ်းႁဵတ်းပႃးပၢင်ၵုမ်သႅၼ်းၽူႈၼမ်းသုင်သုတ်း ႁူပ်ႉဢုပ်ႇ ၵၼ် ဝႃႈၼႆ။

ၸဝ်ႈၶိုၼ်းသႂ် ၸႂ်ယဵၼ် ၽူႈၵွၼ်းႁွင်ႈၵၢၼ် လုမ်း PI ၽူႈၶဝ်ႈႁူမ်ႈသၢင်ႈၵၢၼ်ငမ်းယဵၼ်မႃးတႃႇသေႇ လၢတ်ႈတီႈၽူႈ တွႆႇႁွၵ်ႈဝႃႈ “ ႁူဝ်လိူၼ်ၼႆႉ ဝၼ်းတီႈ 1 တင်း 2 ၽူႈတႅၼ်းတင်း 2 ၾၢႆႇ ၊ ၾၢႆႇလႂ် 7 ၵေႃႉ။ ၶဝ်ႁူပ်ႉၵၼ်တီႈ လုမ်း NRPC တီႈတႃႈၵုင်ႈ။ ပေႃးၺႃးၵၼ်ယဝ်ႉၵေႃႈ ၶဝ် တူၵ်းလူင်းၵၼ်ဝႃႈ တေႁူပ်ႉဢုပ်ႇၵၼ် တင်းမူတ်းမီး 5 ႁူဝ်ၶေႃႈ၊ ႁူဝ်ၶေႃႈယွႆႈမၼ်းတႄႉၵေႃႈ မီးၸိူင်ႉႁိုဝ်လၢႆလၢႆၼႆ ၵေႃႈ ႁဝ်းပႆႇႁူႉ။ ၼႂ်း 5 ႁူဝ်ၶေႃႈ ဢၼ်ၶဝ်တေဢုပ်ႇၵၼ်ၼႆႉ ၼိုင်ႈၾၢႆႇလႂ် 10 ၵေႃႉ။ တေဢုပ်ႇၵၼ် တႃႇၶၢဝ်းတၢင်း 3 ဝၼ်း တေပဵၼ်ဝၼ်းတီႈ 15 ထိုင် 17” ဝႃႈၼႆ။

ၾၢႆႇလူင်ပွင်ၸိုင်ႈ ဢၼ်တေမႃးၶဝ်ႈႁူမ်ႈပၢင်ၵုမ်ၼႆႉသမ်ႉ 5 ၵေႃႉ၊ ၾၢႆႇတပ်ႉမတေႃႇမၢၼ်ႈ 3 ၵေႃႉ။ ၾၢႆႇသၽႃးသမ်ႉ 3 ၵေႃႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉ တၢင်းၾၢႆႇၸုမ်းယိပ်းၵွင်ႈၵၢင်ႇ 10 ၸုမ်းတႄႉ တေႁူပ်ႉဢုပ်ႇၵၼ် ၼႂ်းဝၼ်းတီႈ 10 ၼႆႉထႅင်ႈၵမ်း ၼိုင်ႈၵွၼ်ႇ ဝႃႈၼႆ။

ဢွင်ႈတီႈပၢင်ၵုမ်သႅၼ်းၽူႈၼမ်းသုင်သုတ်း ဢၼ်တေႁူပ်ႉဢုပ်ႇၵၼ်ၼႆႉ တေၸတ်းႁဵတ်းတီႈလႂ် ဢၼ်ဝႃႈၼၼ်ႉ ပႆႇတႅပ်းတတ်း ဢွင်ႈတီႈမၼ်း ဝႃႈၼႆ။