ၵူၼ်းဢိူင်ႇမိူင်းၵႅတ်ႈ 6 ၵေႃႉဢၼ်ၺႃး သိုၵ်းTNLA  တီႉၵႂႃႇၼၼ်ႉ ၶိုၼ်းပွႆႇမႃးၶိုၼ်း 2 ၵေႃႉ ယဝ်ႉဝႃႈၼႆသေတႃႉ ၶိုၼ်းသင်ႇႁႂ်ႈပူႇၵႄႇႁႃၵူၼ်းသူင်ႇတႅၼ်းၶိုၼ်း 2 ၵေႃႉဝႃႈၼႆ။

ၵူၼ်းဝၢၼ်ႈၼႃးယေး ဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ဢၼ်ထုၵ်ႇၸုမ်း TNLA တီႉၺွပ်း ႁွင်ႉၵႂႃႇ ၼႄတၢင်း 6 ၵေႃႉ  မိူဝ်ႈဝၼ်းတီႈ 13 ပူၼ်ႉမႃးၼႆႉၼၼ်ႉ မိူဝ်ႈဝႃး ဝၼ်းတီႈ 15/6/2021 ၼႆႉၶိုၼ်းပွႆႇတူဝ်မႃးၶိုၼ်း 2 ၵေႃႉ။   ပူင်ၵႂၢမ်းမႃးဝႃႈ ႁႂ်ႈပူႇၵႄႇဝၢၼ်ႈႁႃၵူၼ်းမႂ်ႇ တၢင်တႅၼ်းၶႃ 2 ၵေႃႉၼၼ်ႉ သူင်ႇပၼ်  ၶဝ် ၶိုၼ်းဝႃႈၼႆ။

 ပီႈၼွင်ႉၸမ်ၸႂ် ၵူၼ်းထုၵ်ႇတီႉၺွပ်းၵႂႃႇ  ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၶဝ် မႃးၺွပ်းၵႂႃႇၼၼ်ႉ ပဵၼ်သိုၵ်း TNLA ။  ၽိူဝ်ႇပွႆႇမႃးၶိုၼ်း 2 ၵေႃႉသေႉ ၶိုၼ်းၸီႉသင်ႇႁႂ်ႈပူႇၵႄႈဝၢၼ်ႈႁႃၵူၼ်းသူင်ႇတႅၼ်းၶိုၼ်းသမ်ႉပဵၼ်သိုၵ်းၵဝ်ႈၵၢင်ႉ ( MNDAA )”- ဝႃႈၼႆ။

 ၼႂ်းၶေႃႈၸီႉသင်ႇၶဝ်ၼၼ်ႉပႃးဝႆႉဝႃႈ ၼႂ်းၶၢဝ်းတၢင်း 3 ဝၼ်း ႁႂ်ႈႁႃၵူၼ်းသူင်ႇပၼ်ၶဝ်ၶိုၼ်း။ သင်ႇဢမ်ႇသူင်ႇပၼ်လႆႈၼႆ  တူဝ်မူႇၸုမ်းတေသူင်ႇၵူၼ်းလူင်းၵဵပ်းထိုင်ဝၢၼ်ႈ ၊ တေတီႉမတ်ႉပႃးပူႇၵႄႇဝၢၼ်ႈ- ၼႆ လုၵ်ႈဝၢၼ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။   

“သိုၵ်းဢၼ်ၸီႉသင်ႇမႃးၼႆႉ ပဵၼ်သိုၵ်းၵူဝ်းၵၢင်ႉ ၼႂ်းၶၢဝ်းတၢင်း 3 ဝၼ်းၼႆႉ ႁႂ်ႈသူင်ႇၵူၼ်းပၼ်ၶဝ် 2 ၵေႃႉ။ သင်ဝႃႈ ဢမ်ႇ သူင်ႇပၼ်ၸိုင် ၶဝ်တေမႃးၵဵပ်းဢဝ်ၼႂ်းဝၢၼ်ႈ ဢမ်ႇဝႃႈယိင်း ဢမ်ႇဝႃႈၸၢႆး ၊  တေတီႉမၢတ်ႇပူႇၵႄႇႁဝ်းၶႃႈၵႂႃႇထႅင်ႈ။ လွင်ႈၼႆႉ ပူႇၵႄႇတႄႉဝႃႈ ဢမ်ႇသူင်ႇပၼ် ၊ ငိုၼ်းၵေႃႈ တေဢမ်ႇပၼ်၊ ဢဝ်ၵမ်ႉမၼ်းဝႃႈ ၼႆဝႃႇ။ ယၢမ်းလဵဝ် ၵူၼ်းဝၢၼ်ႈၼႃးယေး ႁဝ်း ၶႃႈၵမ်ႈၽွင်ႈ ၵူၼ်းၼုမ်ႇ ၵူၼ်းၶၢဝ်ႉ ၸၢႆးယိင်း ဢွၼ်ၵၼ်ပၢႆႈၵႂႃႇသွၼ်ႈၼႂ်းဝဵင်း ႁိူၼ်းပီႈၼွင်ႉၽႂ်မၼ်း”-  ၵူၼ်းဝၢၼ်ႈၼႃး ယေး သိုပ်ႇလၢတ်ႈၼႄၼင်ႇၼႆ။

ၵူၼ်းဝၢၼ်ႈ 2 ၵေႃႉ ဢၼ်ထုၵ်ႇပွႆႇတူဝ်မႃးၶိုၼ်းၼၼ်ႉ ပဵၼ်ၸၢႆးလႅင် တင်း လုင်းပၢၼ်း။   ဢၼ်ၵိုတ်းဝႆႉသေပႆႇပွႆႇမႃးၶိုၼ်း တႄႉ ပဵၼ်သၢင်ႇၸၢႆး၊ ၸၢႆးငူၺ်ႇ၊ ၸၢႆးၸွႆႉလႄႈ ဢွင်ႇပၢၼ်း ၸိူဝ်းၼႆႉ။

မိူဝ်ႈဝၼ်းတီႈ 13 ယၢမ်းၵၢင်ၶမ်ႈမွၵ်ႈ 8 မူင်း ၽွင်းသိုၵ်း TNLA ၶဝ်ႈမႃးတီႉၺွပ်းဢဝ်ၵႂႃႇ ၵူၼ်းဝၢၼ်ႈၼႃးယေး 6 ၵေႃႉယဝ်ႉ ၼၼ်ႉ ထိုင်မႃး ယၢမ်းၵၢင်ၶမ်ႈ မွၵ်ႈ 9 မူင်းၼၼ်ႉ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ဢၼ်ပၵ်းတပ်ႉဝႆႉတီႈမိူင်းၵႅတ်ႈၼၼ်ႉ ယိုဝ်း ၵွင်ႈလူင် ၵႂႃႇတၢင်းလွႆ ဢၼ်မီးၾၢႆႇႁွင်ႇဝၢၼ်ႈၼႃးယေးၼၼ်ႉ 5 လုၵ်ႈ ၵူၼ်းဝၢၼ်ႈၼႃးယေးလၢတ်ႈ။

ၼွၵ်ႈလိူဝ်ၼၼ်ႉ ၸုမ်းပျီႇတူႉၸိတ်ႉမၢၼ်ႈပၢင်ႇၵေႃႈ ၵဵပ်းသိုၵ်းထႅင်ႈၼႂ်းဢိူင်ႇမိူင်းၵႅတ်ႈ ၼိုင်ႈဝၼ်းလႂ် ႁႂ်ႈသူင်ႇၵူၼ်းပၼ် 2 ၵေႃႉ ၼႆယဝ်ႉ။