ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈတင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ပဵၼ်ပၢင်တိုၵ်းၵၼ်ထႅင်ႈ တီႈၸႄႈဝဵင်းၵူတ်ႉၶၢႆ ၵူၼ်းမိူင်းဢမ်ႇၸၢင်ႈႁဵတ်းၵၢၼ်ႁႃၵိၼ်လဵင်ႉတွင်ႉ။
မိူဝ်ႈၼႆႉ ဝၼ်းတီႈ 13/5/2021 ယၢမ်းၵၢင်ၼႂ် မွၵ်ႈ 9 မူင်းၶိုင်ႈ သိုၵ်းမၢၼ်ႈ တင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ပဵၼ်ပၢင် တိုၵ်းၵၼ် ထႅင်ႈမွၵ်ႈ 20 မိၼိတ်ႉ တီႈႁိမ်းၼမ်ႉၸလၢပ်ႈ ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ။
ၵူၼ်းၵူတ်ႉၶၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ပၢင်တိုၵ်းၵၼ် သိုၵ်းမၢၼ်ႈတင်းၸုမ်း လႂ်တႄႉ ဢမ်ႇလႆႈႁူႉၶႃႈ တင်းႁိုင် မွၵ်ႈ 20 မိၼိတ်ႉၼႆႉ”- ဝႃႈၼႆ။
မိူဝ်ႈဝၼ်းတီႈ 4/5/2021 ပၢင်တိုၵ်း ပဵၼ်တီႈႁိမ်းမၢၼ်ႈပၢင်ႇ ယၢၼ်ၵႆဝဵင်းၵူတ်ႉၶၢႆမွၵ်ႈ 3 လၵ်း မၢၵ်ႇလူင်တူၵ်းသႂ်ႇ ၵူၼ်းဝၢၼ်ႈလႆႈမၢတ်ႇ ၸဵပ်း 5 ၵေႃႉ ထိုင်တီႈပေႃးလႆႈ တေႃႉသူင်ႇႁူင်းယႃလႃႈသဵဝ်ႈ။
“မိူဝ်ႈဝၼ်းတီႈ 4 ၼၼ်ႉ မၢၵ်ႇလူင်တူၵ်းသႂ်ႇၵူၼ်းမိူင်း လႆႈမၢတ်ႇၸဵပ်း 5 ၵေႃႉ။ တႃႇၵေႃႉၼိုင်ႈ လူႉတၢႆယဝ်ႉၵႂႃႇ မိူဝ်ႈ ပူၼ်ႉမႃး 2 ဝၼ်းၼႆႉ”- ၵူၼ်းမိူင်း ၵူတ်ႉၶၢႆ သိုပ်ႇလၢတ်ႈၼႄၼင်ႇၼႆ။
ပၢင်တိုၵ်းဝၼ်းၼၼ်ႉ သိုၵ်းမၢၼ်ႈတင်း သိုၵ်းတဢၢင်းလႄႈ သိုၵ်းၵဝ်ႈၵၢင်ႉ ယိုဝ်းၵၼ်ႁၢဝ်ႈႁႅင်း။ႁိူၼ်းၵူၼ်းဝၢၼ်ႈလူႉၵွႆၸွမ်း ဢမ်ႇယွမ်း 5 လင်။ ၵူၼ်းမိူင်းဢမ်ႇလႆႈပၢႆႈၽေးသိုၵ်းသေတႃႉ ဢမ်ႇၸၢင်ႈႁဵတ်းၵၢၼ်သင် လႆႈပႂ်ႉလႅၼ်ႈၶဝ်ႈလႅၼ်ႈဢွၵ်ႇလုၵ်းပဵမ်ႇလုၵ်းထင်ၵူၺ်းယဝ်ႉ ၵူၼ်းၵူတ်ႉၶၢႆၵေႃႉၼိုင်ႈလၢတ်ႈ။
ၼႂ်းၸိုင်ႈတႆးပွတ်းႁွင်ႇၼႆႉ သိုၵ်းမၢၼ်ႈတင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း၊ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းတေႃႇၸၢဝ်းၶိူဝ်း ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ၵူၼ်းမိူင်းၼႂ်းပိုၼ်ႉတီႈ လႆႈပၢႆႈၽေးသိုၵ်း ၼပ်ႉႁူဝ်ႁဵင် ႁိူၼ်းယေး ၵူၼ်းဝၢၼ်ႈလႆႈလူႉၵွႆ ၾႆးမႆႈ တင်းၼမ် ၵူၼ်းမိူင်းလႆႈလူႉတၢႆ မၢတ်ႇၸဵပ်းၸွမ်းၼႂ်းပၢင်တိုၵ်းၵေႃႈ မီးတင်းၼမ် ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ