ၵူၼ်းၼုမ်ႇ ၼႃးမၢၵ်ႇၶေႃ လုၵ်ႈၸုမ်းပရႁိတ သီႇပေႃႉ    ထုၵ်ႇယိုဝ်းတၢႆ ဢမ်ႇႁူႉလူၺ်ႈလွင်ႈတၢင်း၊ လုၵ်ႈလၢင်းၼၢင်းမေး ပဵၼ်ၼမ်ႉႁူၼမ်ႉတႃ ။

မိူဝ်ႈၼႆႉ ဝၼ်းတီႈ 18/6/2021 ယၢမ်းၵၢင်ၼႂ်ၸဝ်ႉ မွၵ်ႈ 2 မူင်း မီးၸုမ်းယိပ်းၵွင်ႈၵၢင်ႇ ၸုမ်းၼိုင်ႈ ၶဝ်ႈမႃးႁွင်ႉဢဝ်တူဝ် ၸၢႆး လၢဝ် ဢႃယု မွၵ်ႈ 30 ပီ တီႈႁိူၼ်းမၼ်းၸၢႆး ဝၢၼ်ႈၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇသေ ၵႂႃႇယိုဝ်း တၢႆ ပႅတ်ႈၸွမ်းၵၢင်တၢင်းလႆႈႁူႉၼင်ႇၼႆ။

ၸိူဝ်ႉၶိူဝ်းပီႈၼွင်ႉ ၸၢႆးလၢဝ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၸုမ်းယိပ်းၵွင်ႈၵၢင်ႇ ၸုမ်းၼိုင်ႈ ၶဝ်ႈမႃးႁွင်ႉ မၼ်းၸၢႆး တီႈၼႂ်းႁိူၼ်း မွၵ်ႈၵၢင်ၸႂ် 2 မူင်းၼႆႉ ၵႂႃႇယိုဝ်းတၢႆပႅတ်ႈ။ ၶႂ်ႈၵႆႁိူၼ်းမၼ်းဝႆႉဢိတ်းၼိုင်ႈ ဢွင်ႈတီႈၼၼ်ႈ။ ပဵၼ်ၸုမ်းလႂ် မႃးႁွင်ႉၵႂႃႇ ဢၼ်ဝႃႈၼၼ်ႉ ဢမ်ႇႁူႉၶႃႈ။ မၼ်းၸၢႆးၼႆႉ ပဵၼ်ၵူၼ်းၶဝ်ႈၸုမ်းပရႁိတ ၵေႃႉၼိုင်ႈ တီႈဝၢၼ်ႈၼႃးမၢၵ်ႇၶေႃႈၼႆႉ။ ၵွပ်ႈသင်လႄႈ ထုၵ်ႇယိုဝ်းတၢႆ ဢၼ်ဝႃႈၼၼ်ႉ ဢမ်ႇလႆႈႁူႉၸွမ်းလွင်ႈတၢင်းမၼ်း ၶႃႈ”- ဝႃႈၼႆ။

တီႈတူဝ်တၢႆၸၢႆးလၢဝ်ၼၼ်ႉ မီးႁွႆးယိုဝ်းဝႆႉလၢႆလၢႆၵမ်း၊ မီးႁွႆးပေႃႉပဵၼ်လိူတ်ႈပဵၼ်ယၢင်တင်းတူဝ် ဝႃႈၼႆ။

“ၸွမ်းၼႃႈ ၸွမ်းတူဝ်မၼ်းၸၢႆးၼႆႉ ပဵၼ်လိူတ်ႈၵူဝ်ႈမူတ်းၶႃႈ မၼ်းၸၢႆး ထုၵ်ႇယိုဝ်းတီႈၼႃႈဢူၵ်း လုၵ်ႈၼိုင်ႈ ယဝ်ႉၵေႃႈ တီႈမိုဝ်း လုၵ်ႈၼိုင်ႈ။ တၢႆထင်တီႈၼၼ်ႈၵမ်းလဵဝ်ၶႃႈ”-  ၸိူဝ်ႉၶိူဝ်းပီႈၼွင်ႉ ၸၢႆးလၢဝ် သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ် လွင်ႈၸၢႆးလၢဝ် လႆႈထုၵ်ႇယိုဝ်းတၢႆပႅတ်ႈလၢႆလၢႆၼႆႉ ပဵၼ်ၸုမ်းလႂ် ၼမ်ႉမိုဝ်းၽႂ် ႁဵတ်းဢၼ်ဝႃႈၼၼ်ႉ ပႆႇလႆႈႁူႉ ၸိူဝ်ႉၶိူဝ်းပီႈၼွင်ႉမၼ်းၸၢႆး သိုပ်ႇလၢတ်ႈၼႄထႅင်ႈၼင်ႇၼႆ။

မိူဝ်ႈၼႆႉ ဝၼ်းတီႈ 18/6/2021 ယၢမ်းၵၢင်ဝၼ်း 11 မူင်း ယူႇတီႈပေႃႈမႄႈပီႈၼွင်ႉၸိူဝ်ႉၶိူဝ်းမၼ်းၸၢႆး လႆႈႁူမ်ႈၵၼ်သေ ပူၼ်ႉၶၢပ်ႈတူဝ်တၢႆမၼ်းၸၢႆးၵႂႃႇ ၼႆယဝ်ႉ။

ၼႂ်းၸႄႈဝဵင်းသီႇပေႃႉၼႆႉ ၵႆႉမီးလွင်ႈပိုတ်းယိုဝ်းၵၼ် မိူၼ်ၼင်ႇ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ တင်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း။ ၾၢႆႇၼိုင်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ် ၵေႃႈတိုၵ်ႉပဵၼ်ပၢင်တိုၵ်း ပိုတ်းယိုဝ်းၵၼ်ယူႇ။