ၽူႈယိင်း သႅၼ်းဢႃယု 50 ပီပၢႆ ၵေႃႉၼိုင်ႈ ယူႇထုင်ႉသၢမ်ၸဵင်ႇၶမ်း ႁူၺ်ႈလိၼ်လိမ်၊ မိူင်းၽူင်း၊ ၸႄႈဝဵင်းတႃႈၶီႈလဵၵ်း ၺႃးၵူၼ်းၸုမ်းၼိုင်ႈ ပႃးၵွင်ႈၸေးမိုဝ်း ၶဝ်ႈၼႂ်းႁၢၼ်ႉသေ ၵွင်ႈၸမ်ႈတီ့ဢဝ်ၵႂႃႇ တေႃႇဝၼ်းမိူဝ်ႈၼႆ့ ယင်းပႆႇပၼ်ပွၵ်ႈၶိုၼ်းႁိူၼ်း ဝႃႈၼႆ။
ဝၼ်းတီႈ 03/10/2018 ယၢမ်းၵၢင်ၼႂ် မွၵ်ႈ 8:30 မူင်းၼၼ်ႉ ပႃႈဢီႇၼၢင်း ဢႃယု 52 ပီ ပဵၼ်ၸၢဝ်းတႆး ၺႃးၵူၼ်းၸုမ်းၼိုင်ႈ ႁႅင်းၵူၼ်း 5 ၵေႃႉ ပႃးၵွင်ႈၸေးမိုဝ်း။ ၶဝ်ႈတီ့ဢဝ်မၼ်းၼၢင်း ၼႂ်းဝၢၼ်ႈႁူၺ်ႈလိၼ်လမ် ဢိူင်ႇမိူင်းၽူင်း(ၶ) ၸႄႈ ဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း။ ၺႃးတီႉၺွပ်းႁွင်ႉတူဝ်ၵႂႃႇ ထိုင်တေႃႇလဵဝ် ပႆႇပွႆႇတူဝ်မႃး ဝႃႈၼႆ။
ၸၢႆးသုၵ်း မိူင်းၽူင်းလၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မၼ်းတိုၵ်ႉၶၢႆၶူဝ်းတီႈႁၢၼ်ႉ မၼ်းယူႇ မိူဝ်ႈၼၼ်ႉမီးၵူၼ်းၸုမ်းၼိုင်ႈ ပႃးၵွင်ႈၸေးမိုဝ်း ၶဝ်ႈတီ့ဢဝ်မၼ်းၵႂႃႇ။ ၵူၺ်း ၵႃႈ ပဵၼ်ၸုမ်းလႂ် မူႇလႂ်တႄႉ ဢမ်ႇႁူႉ။ လႆႈငိၼ်းပိူၼ်ႈလိုဝ်းၵၼ်တႄႉ ၵဵဝ်ႇလူၺ်ႈလွင်ႈၵႃႉၶၢႆလႄႈ လူဝ်ႇပၼ်ငိုၼ်း ၵၼ်ၼႆဝႃႇ။ ၵူၺ်းၵႃႈ လွင်ႈၼႆႉ ပႆႇယိုၼ်ႈယၼ်လႆႈ” ဝႃႈၼႆ။
ၵဵဝ်ႇၵပ်းလွင်ႈၼႆႉ ၽူႈမီးပုၼ်ႈၽွၼ်းၶဝ် တိုၵ်ႉၵူတ်ႇထတ်းတူၺ်းလွင်ႈတၢင်းမၼ်းယူႇဝႃႈ ပဵၼ်လွင်ႈတၢင်းသင် တႄႉတႄႉဝႃႈၼႆ။ လွင်ႈပႃႈဢီႇၼၢင်း ၺႃးၸုမ်း 5 ၵေႃႉပႃးၵွင်ႈ ၸမ်ႈတူဝ် လၢၵ်ႈဢဝ်ဢွၵ်ႇ ႁၢၼ်ႉၵႂႃႇၼၼ်ႉ ၵူၼ်းႁိူၼ်းၵူၼ်းယေး ၸႅင်ႈၵႂၢမ်းဝႆ့ တီႈႁူင်းပလိၵ်ႈ ဝၢၼ်ႈပုင်ႇ ဢိူင်ႇႁူၺ်ႈလိၼ်လမ် မိူင်းၽူင်း ၸႄႈဝဵင်းတႃႈၶီႈလဵၵ်းဝႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ