တႄႇၼႂ်းႁၢင်လိူၼ် ၵျႅၼ်ႊၼိဝ်ႊရီႊၼႆႉမႃး ၼႂ်းၶၢဝ်းတၢင်းဝူင်ႈလဵဝ် ၵူၼ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ 2 ၵေႃႉ ၺႃးတီႉၺွပ်း ယွၼ်းၵႃႈထုတ်ႇတူဝ် ဢၢၼ်ႇႁူဝ်လၢၼ်ႉ ဝႃႈၼႆ ။
မိူဝ်ႈဝႃး ဝၼ်းတီႈ 24/1/2026 ယၢမ်းၵၢင်ၼႂ် ၼၢင်းၸၢမ်တိပ်ႉဢႃယု မွၵ်ႈ 50 ပီ ယူႇပွၵ်ႉသၼ်သၢႆး(ၵ) ထုၵ်ႇ ၵူၼ်းၸၢႆး 4 ၵေႃႉပူၵ်ႉၼႃႈပူၵ်ႉတႃ ၶဝ်ႈမႃးၼႂ်းႁၢၼ်ႉ ၶၢႆၶိူင်ႈၵေႃႇသၢင်ႈ လႄႈ ႁၢၼ်ႉလႅၵ်ႈငိုၼ်း ထႆး- မၢၼ်ႈ-ၶႄႇ ၶွင်မၼ်းၼၢင်းသေ တီႉၺွပ်းဢဝ်မၼ်းၼၢင်းၵႂႃႇ ယဝ်ႉယွၼ်းၵႃႈထုတ်ႇတူဝ်ၶိုၼ်း 7 လၢၼ်ႉဝၢတ်ႇ ဝႃႈၼႆ။
ဝၢႆးၼၢင်းယိင်းထုၵ်ႇတီႉၺွပ်းၵႂႃႇၼၼ်ႉ ပလိၵ်ႈသိုၵ်းမၢၼ်ႈ ၼႂ်းပိုၼ်ႉတီႈၵူတ်ႇထတ်းတီႈၼႂ်းပွၵ်ႉၼႂ်းဝဵင်းႁၢဝ်ႈႁႅင်း ၼႆယဝ်ႉ။
မိူဝ်ႈၼႆႉ ဝၼ်းတီႈ25/1/2026 ၵူၼ်းတီႈႁိူၼ်းဢဝ်ငိုၼ်း 7 လၢၼ်ႉၵႂႃႇထုတ်ႇတူဝ်မႃးၶိုၼ်းယဝ်ႉဝႃႈၼႆသေတႃႉ ၵဵဝ်ၵပ်းလွင်ႈၼႆႉ ၸုမ်းၶၢဝ်ၽူႈတွႆႇႁွၵ်ႈ တိုၵ်ႉသိုပ်ႇတွင်ႈထၢမ် ႁူဝ်ယွႆႈဝႆႉယူႇ ။
ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ –“ပဵၼ်ႁၢၼ်ႉလႅၵ်ႈငိုၼ်းတင်းလင် ၵၢတ်ႇသၼ်သၢႆး ၵူၼ်းၸၢႆးပူၵ်ႉၼႃႈပူၵ်ႉတႃႇ မႃးဢုမ်ႈၶိုၼ်ႈၵႃးၵႂႃႇ ၊ မိူဝ်ႈဝႃးတၢင်းဝၼ်း ပလိၵ်ႈ သိုၵ်းမၢၼ်ႈၵူတ်ႇထတ်း ၊ လွင်ႈမႃးတီႉၵူၼ်းၵႂႃႇယဝ်ႉ ယွၼ်းၵႃႈထုတ်ႇတူဝ်ၶိုၼ်းၼႆႉ တီႈတၢင်းၼွၵ်ႈဝဵင်းၵေႃႈၵႆႉပဵၼ်ၼႃႇ ဢမ်ႇၸႂ်ႈပွၵ်ႈၼႆႉၵူၺ်း”-ဝႃႈၼႆ ။
မိူၼ်ၼင်ႇၼႆႉ ၼႂ်းဝၼ်းတီႈ 16/ 1/2026 ယၢမ်းၵၢင်ဝၼ်း 12 မူင်း ၵူၼ်းၸၢႆး 4 ၵေႃႉၶဝ်ႈမႃးတီႉၺွပ်းၵူၼ်းၸၢႆး ၸိုဝ်ႈႁွင်ႉၸၢႆးႁၢၼ်လႅင်း တီႈၼႂ်းပွၵ်ႉသၼ်သၢႆး(ၶ) ၵူၼ်းၶၢႆ ၼမ်ႉၶႅမ်ဝၢၼ် icecream ယွၼ်းၵႃႈထုတ်ႇတူဝ် 20 လၢၼ်ႉဝၢတ်ႇ ၊ ထိုင်ဝၼ်းမိူဝ်ႈၼႆႉ ပႆႇပွႆႇပၼ်တူဝ်ၶိုၼ်း ဝႃႈၼႆ ။
ၵူၼ်းပိုၼ်ႉတီႈဝဵင်းတႃႈၶီႈလဵၵ်း လၢတ်ႈၽူႈတွႆႇႁွၵ်ႈဝႃႈ -“ၵွၼ်ၼႃႈၼႆႉ 4-5 ဝၼ်းၵေႃႈ ပီႈႁၢၼ်လႅင်း ၵူၼ်းၶၢႆ icecream ၼူမ်းသူတ်ႇ ထုၵ်ႇတီႉၺွပ်း ယွၼ်းၵႃႈထုတ်ႇတူဝ်မၼ်း 20 လၢၼ်ႉ ၊ ၵူၼ်းတီႈႁိူၼ်းၶဝ်သမ်ႉ ပၼ်လႆႈ ၼိုင်ႈလၢၼ်ႉၵူၺ်းၼႆၵေႃႈ ထိုင်မိူဝ်ႈၼႆႉ ဢမ်ႇပႆႇပွႆႇမႃးၶိုၼ်း ၊ တေယဝ်ႉၵႂႃႇလၢႆလၢႆၸိူင်ႉၼႆၵူၺ်းယဝ်ႉယူဝ်ႉ ႁိုင်ပဵၼ်ဝူင်ႈပၢႆယဝ်ႉ”- ဝႃႈၼႆ ။
ၵဵဝ်ၵပ်းလွင်ႈၼႆႉ ၸဝ်ႈၼႃႈတီႈၼႂ်းပိုၼ်ႉတီႈၵူတ်ႇထတ်းယူႇသေတႃႉ ထိုင်ဝၼ်းမိူဝ်ႈၼႆႉ ပႂ်ႇတီႉၺွပ်းၵူၼ်းမႃးတီႉမၼ်းလႆႈ – ၵူၼ်းပိုၼ်ႉတီႈလၢတ်ႈ ။
မိူၼ်ၼႆၼင်ႇၵဝ်ႇ ၼႂ်းလိူၼ်တီၵေႃႈၼၢင်းယိင်းဢွၼ်ႇ ၵူၼ်းမိူင်းသူႈ ပိုၼ်ၽၢဝ်ႇႁႃၵၢၼ် တၢင်းဢွၼ်ႊလၢႆႊ ၺႃးၵူၼ်းႁဵတ်းၵၢၼ်ၵျႃႊၽျႅၼ်ႉလၢတ်ႈဝႃႈ မီးၵၢၼ်လီ တီႈဝဵင်းတၢင်ႉယၢၼ်းၼႆသေ လွၵ်ႇလႅၼ်တီႉၺွပ်းတၢင်ႇ ၵႃးၵႂႃႇ ယွၼ်းၵႃႈထုတ်ႇတူဝ်တီႈၵူၼ်းတၢင်းႁိူၼ်းမၼ်းၼၢင်းၶိုၼ်း500 သႅၼ်ပျႃး ၼႆယဝ်ႉ ။
ဝဵင်းတႃႈၶီႈလဵၵ်းၼႆႉ ၸွမ်းၼင်ႇပဵၼ်ဝဵင်းတိတ်းၸပ်းလႅၼ်လိၼ်လႄႈ ၵူၼ်းမိူင်းတၢင်ႇတီႈသီႇလႅၼ် မႃးယူႇသဝ်းၼမ်၊ ပၢင်တေႃႇလွင်း၊ ယႃႈမဝ်းၵမ်လႄႈ ဢွင်ႈတီႈလဵၼ်ႈၵဵမ်ႊ ဢွၼ်ႊလၢႆႊၵေႃႈ မီးၼမ်။
လိူဝ်ၼၼ်ႉ ၵူၼ်းယိပ်းၵွင်ႈ ယိပ်းမိတ်ႈယိပ်းလႅဝ်း ပႂ်ႉၸူၼ်ႁဵတ်းႁၢႆႉၶႃႈႁႅမ်ၵၼ်တၢႆၵေႃႈ မီးၼမ်လိူင်ႇ၊ ယူႇတီႈၸဝ်ႈၼႃႈတီႈ ပလိၵ်ႈ သိုၵ်းမၢၼ်ႈ ဢမ်ႇဢဝ်ပုၼ်ႈၽွၼ်းပၼ်လႆႈႁႂ်ႈ ထိုင်တီႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ