မိူဝ်ႈဝၼ်းတီႈ 21 လိူၼ်ၵျူႊလၢႆႊ တပ်ႉသိုၵ်းၸိူဝ်ႉၸၢတ်ႈယၢင်းလႅင် (KNDF) ႁုပ်ႈဢဝ်တပ်ႉၵွင်မၢႆ 8 ၸုမ်း ၾၢႆႇတႂ်ႈတပ်ႉၽႅၼ်ၵၢၼ်သိုၵ်း မၢႆ 4 မၢႆ 5 လႄႈ မၢႆ 7 မႃးႁူမ်ႈၵၼ် ၶွတ်ႇ ၽွတ်ႈပဵၼ် ၼႃႈလိၼ်သိုၵ်း မၢႆ -2 ၵႂႃႇ ၼႆႁဵတ်းလိၵ်ႈပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ။

ယိူင်းဢၢၼ်းဢၼ်လႆႈ ၶိုၼ်းၶွတ်ႇၽွတ်ႈပဵၼ် ၼႃႈလိၼ်သိုၵ်းၵႂႃႇ ပဵၼ်ၵွၼ်ႈပဵၼ်မမ်ႈၼၼ်ႉ ပိူဝ်ႈတႃႇႁႂ်ႈတပ်ႉၸုမ်းမီးၼမ်ႉၵတ်ႉတဵမ် ၼႅၼ်ႈၼႃသေ ၵေႃႇသၢင်ႈလႆႈတပ်ႉၸုမ်းဢၼ်မၼ်ႈၵႅၼ်ႇ၊ ပဵၼ်တႃႇသၢင်ႈထၢတ်ႈၸႂ်ၵူၼ်းသိုၵ်း မီးႁႅင်း လႄႈ ႁဵတ်းၸွမ်းပၵ်းပိူင် ၶေႃႈၸီႉသင်ႇ (ၶေႃႈပူင်) လႆႈတႅတ်ႈတေႃးသေ ၵိူတ်ႇပဵၼ်မႃးတပ်ႉသိုၵ်းဢၼ်ၵႅတ်ႇၶႄၵူၼ်းမိူင်းယၢင်းလႅင် – ၼႆ KNDF လၢတ်ႈ။

တပ်ႉၵွင် ဢၼ်ၶွတ်ႇၽွတ်ႈပဵၼ်ၶိုၼ်း ၼႃႈလိၼ်သိုၵ်းၵႂႃႇၼၼ်ႉ တေပၵ်းသဝ်းယူႇဝႆႉၼႂ်း ၼႃႈလိၼ်မိူင်းယၢင်းလႅင် ပဵၼ်ပိူင်ယႂ်ႇသေ ႁပ်ႉၼႃႈတီႈပုၼ်ႈၽွၼ်းၵႂႃႇၼႂ်းၶၵ်ႉၵၢၼ်သိုၵ်း ၸွမ်းၼင်ႇၵဵဝ်ႇၶွင်ႈတွၼ်ႈလႂ်တွၼ်ႈၼၼ်ႉယူႇ ၼႆယဝ်ႉ။

လႆႈႁူႉဝႃႈ ယၢမ်းလဵဝ် တပ်ႉသိုၵ်းယၢင်းလႅင် ၶွတ်ႇၽွတ်ႈၼႃႈလိၼ်သိုၵ်းဝႆႉ ထိုင် မၢႆ -3 ။ ၼႃႈလိၼ်သိုၵ်းမၢႆ 1 ၼႆႉ ႁုပ်ႉဢဝ်တပ်ႉၵွင် 8 ဢၼ် ၶွတ်ႇၽွတ်ႈဝႆႉ၊ လႆႈႁုပ်ႈဢဝ်တပ်ႉၵွင် မၢႆ 5၊ မၢႆ 6 လႄႈ မၢႆ 7 တင်း တပ်ႉၵွင် 7 ၸုမ်း ၾၢႆႇတႂ်ႈ တပ်ႉၽႅၼ်ၵၢၼ်သိုၵ်း မၢႆ 2 တင်း မၢႆ 7 ၼၼ်ႉ မႃးၶွတ်ႇၽွတ်ႈပဵၼ်ဝႆႉ ၼႃႈလိၼ်သိုၵ်းမၢႆ 2 ။

ၼႃႈလိၼ်သိုၵ်း မၢႆ 3 သမ်ႉ လႆႈႁုပ်ႈဢဝ် တပ်ႉၵွင် မၢႆ 8 ၊ မၢႆ 9 ၊ မၢႆ 10 သၢမ်ၸုမ်း လႄႈ ႁုပ်ႈဢဝ်ပႃး တပ်ႉၵွင် 5 ၸုမ်း ဢၼ်မီးၾၢႆႇတႂ်ႈတပ်ႉၽႅၼ်ၵၢၼ်သိုၵ်း မၢႆ 6 ၊ မၢႆ 3 လႄႈ မၢႆ 5 ၶွတ်ႇၽွတ်ႈဝႆႉ။

ၼႃႈလိၼ်သိုၵ်းမၢႆ -4 သမ်ႉ လႆႈႁုပ်ႈဢဝ် တပ်ႉၵွင် မၢႆ 11၊ မၢႆ 12 ၊ မၢႆ 14 သၢမ်ၸုမ်းသေ ၶွတ်ႇၽွတ်ႈပဵၼ်ဝႆႉ – ၼႆယဝ်ႉ။

ၸုမ်းသိုၵ်းယၢင်းလႅင် KNDF ၼႆႉ မိူဝ်ႈလိူၼ်ဢေႊပရႄႊလ် ပီ 2026 ပူၼ်ႉမႃးၼႆႉၵေႃႈ လႆႈၶွတ်ႇၽွတ်ႈၼႃႈလိၼ်သိုၵ်းမၢႆ -1 တင်ႈၸိုဝ်ႈဝႃႈ “ဢႄႊလ်ၾႃႊ” ဝႆႉသေ ယၢမ်းလဵဝ်ၵေႃႈ မီးၽႅၼ်ၵၢၼ်တႃႇႁုပ်ႈဢဝ်တပ်ႉၵွင် ၶွတ်ႇၽွတ်ႈပဵၼ် ၼႃႈလိၼ်သိုၵ်းၵႂႃႇထႅင်ႈယူႇ – ၼႆယဝ်ႉ။