ၼႂ်းၵၢင်လိူၼ်ၵျုၼ်ႊၼႆႉ သိုၵ်းမၢၼ်ႈတင်း သိုၵ်းယၢင်းလႅင် KNDF ယိုဝ်းၵၼ်ၶိုၼ်းႁၢဝ်ႈႁႅင်း ႁိမ်းလႅၼ်လိၼ်တႆး – ယၢင်းလႅင် တီႈဝဵင်းမိူင်းပၢႆး ၸိုင်ႈတႆးပွတ်းၸၢၼ်း ၾၢႆႇသိုၵ်းမၢၼ်ႈ ၸႂ်ႉတိုဝ်းပႃးတရူၼ်ႊလႄႈ ၶိူင်ႈၵွင်ႈလူင် ယိုဝ်းၸွႆႈ။  

ပၢင်တိုၵ်းတီႈမိူင်းပၢႆးၼႆႉ သိုၵ်းမၢၼ်ႈၸႂ်ႉတိုဝ်းႁႅင်းသိုၵ်းၼပ်ႉႁူဝ်ပၢၵ်ႇၵေႃႉမၼ်းသေ တိုၵ်းတပ်ႉသိုၵ်း ယၢင်းလႅင် KNDF ၼႆႉ တႄႇၸဵမ်မိူဝ်ႈႁူဝ်ပီ 2025 မႃး။ သၢႆသိုၵ်းမၢၼ်ႈ ၶဝ်ႈဢိူမ်ႈၸမ်မႃး ႁိမ်းဝဵင်းမိူင်း ပၢႆးႁႅင်းလႄႈ လႆႈတုမ်ႉတိူဝ်ႉၵၼ်တင်း ၸုမ်းသိုၵ်းလုၵ်ႉၽိုၼ်ႉယၢင်းလႅင်သေ ၸင်ႇပဵၼ်ပၢင်တိုၵ်းၵၼ်ၶိုၼ်း ၼႆယဝ်ႉ။

တွၼ်ႈတႃႇသိုၵ်းမၢၼ်ႈ တေၵုမ်းလႆႈၶိုၼ်း ဝဵင်းမိူင်းပၢႆးၼႆႉ ၸႂ်ႉတိုဝ်းလၢႆးတိုၵ်းၵူႈသႅၼ်းသေ ႁႅၼ်းသိုၵ်း လေႃႇတိုၵ်းသိုၵ်းယၢင်းလႅင်မႃးသေတႃႉ ႁၢၼ်ႉတေႃႇထိုင်ယၢမ်းလဵဝ် ၾၢႆႇသိုၵ်းမၢၼ်ႈ ယင်းပႆႇၶဝ်ႈထိုင်လႆႈ ၼႂ်းဝဵင်းမိူင်းပၢႆးၼႆ – ၽူႈၵွၼ်းတပ်ႉပိဝ်ႇႁႃႇ ၼႂ်းသိုၵ်းယၢင်းလႅင် ထုင်ႉၼႃႈလိၼ်သိုၵ်း မၢႆ 14 လၢတ်ႈၼႄၼင်ႇၼႆ။

“တီႈမိူင်းပၢႆးၼႆႉ ၶိုၼ်းပဵၼ်ပၢင်တိုၵ်းၵၼ်မႃးႁႅင်း မီးမွၵ်ႈ 2-3 ဝၼ်းယဝ်ႉ။ ၸူဝ်ႈၶၢဝ်းၼႆႉ ပဵၼ်ၽွင်းတင်း သွင်ၾၢႆႇ တိုၵ်းၵၼ်ႁၢဝ်ႈႁႅင်း”။

လႆႈႁူႉဝႃႈ ယွၼ်ႉသိုၵ်းမၢၼ်ႈ ၶဝ်ႈလေႃႇတိုၵ်း မိူဝ်ႈဝၼ်းတီႈ 16/06/2025 ၼႆႉသေ ၵူၼ်းသိုၵ်းၾၢႆႇၸုမ်း လုၵ်ႉၽိုၼ်ႉယၢင်းလႅင်ၶဝ် မီးလွင်ႈမၢတ်ႇၸဵပ်းလူႉတၢႆၵူၺ်းဢမ်ႇၵႃး ၾၢႆႇသိုၵ်းမၢၼ်ႈၵေႃႈ လူႉတၢႆပႃး။

တႄႇႁၢင်ပီ 2023 မႃး ၸုမ်းသိုၵ်းလုၵ်ႉၽိုၼ်ႉယၢင်းလႅင် ပဵၼ်ပၢင်တိုၵ်းၵၼ်တင်း သိုၵ်းမၢၼ်ႈသေ ၶဝ်ႈ ၵုမ်းၵမ် ဝဵင်းမိူင်းပၢႆးဝႆႉ။ သင်ၾၢႆႇသိုၵ်းမၢၼ်ႈ ၶဝ်ႈၵုမ်းၵမ်လႆႈၶိုၼ်း ဝဵင်းမိူင်းပၢႆးၸိုင် တေၸၢင်ႈတေႃႉဢဝ် ႁႅင်းသိုၵ်းလႄႈ ၶိူင်ႈၵွင်ႈၵၢင်ႇ တၢင်းမိူင်းတႆးပွတ်းၸၢၼ်း ၶဝ်ႈထိုင်ၵႂႃႇလႆႈ ၼႂ်းမိူင်းယၢင်းလႅင် ၵမ်းသိုဝ်ႈ ၵူၺ်းဢမ်ႇၵႃး တေပဵၼ်တၢင်းၵမ်ႉယၼ်တႃႇသိုၵ်းမၢၼ်ႈ ၸတ်းႁဵတ်းလႆႈ ပၢင်လိူၵ်ႈတင်ႈထႅင်ႈ ၼႆယဝ်ႉ။

တႅမ်ႈ – ၽူၺ်းၼုမ်ႇ