ၼႂ်းဝူင်ႈၼႆႉ သိုၵ်းမၢၼ်ႈယိုတ်းမိူင်း ႁူမ်ႈတင်းပျီႇတူႉၸိတ်ႉပဢူဝ်း PNO သေ ယိုဝ်းတိုၵ်းၵၼ်တင်း သိုၵ်းယၢင်းလႅင် ၸုမ်းၽွမ်ႉႁူမ်ႈ လုၵ်ႉၽိုၼ်ႉ ႁိမ်းဝၢၼ်ႈၵေႃမႆႉသၢင်း ၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း။

ၼႂ်းဝၼ်းတီႈ 7/10/2025 သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း ထႅမ်ႁႅင်းသိုၵ်းတူင်ႉၼိုင် တီႈလႅၼ်လိၼ် ပၢင်လွင်း – ၾၢႆၶုၼ်သေ ပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉ၊ ၼႂ်းဝၼ်းတီႈ 8/10/2025 ဝၼ်းပုတ်ႉၼႆႉၵေႃႈ သွင်ၾၢႆႇတိုၵ်ႉပဵၼ်လွင်ႈပိုတ်းယိုဝ်းၵၼ်၊ ၾၢႆႇသိုၵ်းမၢၼ်ႈၸႂ်ႉၶိူင်ႈၵွင်ႈလူင် လၢမ်းယိုဝ်းၼႂ်းပိုၼ်ႉတီႈလၢႆလၢႆၵမ်း ဝႃႈၼႆ။

ၸဵမ်မိူဝ်ႈၵၢင်လိူၼ် လိူၼ်ထူၼ်ႈၵဝ်ႈပူၼ်ႉမႃးၼၼ်ႉ သိုၵ်းမၢၼ်ႈ ႁူမ်ႈတင်း ပျီႇတူႉၸိတ်ႉပဢူဝ်းသေ လိုပ်ႈလမ်းလေႃႇတိုၵ်းၸုမ်းလုၵ်ႉၽိုၼ်ႉ တၢင်းဝၢၼ်ႈၵေႃမႆႉသၢင်း၊ ဝၢၼ်ႈလူင်ပႅၼ်ႈ၊ ၼမ်ႉၼဵင်ႈ ၸိူဝ်းမီးတီႈလႅၼ်ၶႅၼ်ႈ ၸႄႈဝဵင်းပၢင်လွင်းတင်း ၾၢႆၶုၼ်သေ ၵုမ်းၵမ်မႃး။

မိူၼ်ၼႆ ၼႂ်းထုင်ႉ ၾၢႆၶုၼ် မိူင်းပၢႆး လႅၼ်လိၼ် တႆး – ယၢင်းလႅင်ၼၼ်ႉၵေႃႈ သိုၵ်းမၢၼ်ႈ တင်း ၸုမ်းႁူမ်ႈႁွမ်းသိုၵ်းယၢင်းလႅင် တိုၵ်ႉမီးလွင်ႈပိုတ်းယိုဝ်းၵၼ် ပဵၼ်တီႈပဵၼ်တီႈယူႇၼႆ သိုၵ်းယၢင်းလႅင် KNDF ပိုၼ်ၽၢဝ်ႇဢွၵ်ႇမႃး ၼႂ်းဝၼ်းတီႈ 6/10/2025 ၼႆႉ ၼင်ႇၼႆ။