တႄႇႁၢင်လိူၼ်ၵျုၼ်ႊၼႆႉမႃး သိုၵ်းမၢၼ်ႈ ယိုတ်းမိူင်းတင်း ၸုမ်းပျီႇတုၸိတ်ႉပဢူဝ်း (PNA) ႁူမ်ႈၵၼ် ႁႅၼ်းသိုၵ်းလေႃႇတိုၵ်း တပ်ႉသိုၵ်းယၢင်းလႅင် ဢၢၼ်းလူမ်ႇတိုၵ်းထိုင်ၼႂ်းဝဵင်းမိူင်းပၢႆးသေ ၸတ်းငႃးသိုၵ်း လၢႆၾၢႆႇမုင်ႈၼႃႈၶဝ်ႈၸူး ထိုင်တီႈၸုမ်းလုၵ်ႉၽိုၼ်ႉၶဝ် ပိုၼ်ၽၢဝ်ႇပိၵ်ႉဢိုတ်းသဵၼ်ႈတၢင်းဝႆႉ ၸူဝ်ႈၶၢဝ်း မိူဝ်ႈဝၼ်းတီႈ 30/06/2025 ၼႆယဝ်ႉ။

ၸုမ်းသိုၵ်းမၢၼ်ႈယိုတ်းမိူင်းလႄႈ ၸုမ်းပျီႇတုၸိတ်ႉပဢူဝ်း ႁူမ်ႈၵၼ် ပွႆႇမၢၵ်ႇလူင်ၵႂႃႇတူၵ်းသႂ်ႇထိုင် ၼႂ်း ဝဵင်းမိူင်းပၢႆးသေ ႁဵတ်းႁႂ်ႈတိူဝ်ႉၵူၼ်းမိူင်းမၢတ်ႇၸဵပ်းလူႉတၢႆပႃးၼႆ ၽူႈၼမ်း ၼႂ်း 2 ၶွင်ႇသီႇၵၢၼ်ဢုပ်ႉပိူင်ႇ ၽွင်းငမ်းၸူဝ်ႈၶၢဝ်း မိူင်းယၢင်းလႅင် (IEC) လၢတ်ႈၼႄၼင်ႇၼႆ။

“ယွၼ်ႉမၢၵ်ႇလူင် ဢၼ်သိုၵ်းမၢၼ်ႈၶဝ်ယိုဝ်းၼၼ်ႉ မႃးတူၵ်းသႂ်ႇၼႂ်းဝဵင်းလႄႈ ၼၢင်းယိင်းၵေႃႉၼိုင်ႈ လႆႈတၢႆၵႂႃႇ။ မိူဝ်ႈလဵဝ်သမ်ႉ သိုၵ်းမၢၼ်ႈၶဝ် ထူဝ်းသိုၵ်းၶဝ်ႈမႃးႁႅင်းလႄႈ ၸင်ႇလႆႈဢိုတ်းသဵၼ်ႈတၢင်းဝႆႉ”။

မိူဝ်ႈပီ 2023 လိူၼ်ၼူဝ်ႊဝႅမ်ႊပိူဝ်ႊပူၼ်ႉမႃးၼႆႉ တပ်ႉသိုၵ်းယၢင်းလႅင်လႄႈ ဢူၺ်းလီၶဝ် ႁူမ်ႈၵၼ်သေ တိုၵ်းလိုပ်ႈလမ်းသိုၵ်းမၢၼ်ႈ ဢွၵ်ႇဝဵင်းမိူင်းပၢႆးၵႂႃႇလႆႈ ၼွၵ်ႈလိူဝ်တပ်ႉပႆလိၼ် ၶမယ 422 ယဝ်ႉ တပ်ႉသိုၵ်း ယၢင်းလႅင်  ၵုမ်းၵမ်ဝဵင်းမိူင်းပၢႆးဝႆႉတင်းသဵင်ႈ။

ဝဵင်းမိူင်းပၢႆးၼႆႉ ပဵၼ်ဝဵင်းႁႅၵ်ႈ ဢၼ်မီးဝႆႉတီႈၽၵ်းတူၶဝ်ႈ မိူင်းယၢင်းလႅင်ၼႆၵေႃႈဝႃႈလႆႈသေ တင်းမူတ်းမီးယူႇ 11 ပွၵ်ႉ၊ ႁူဝ်ၼပ်ႉၵူၼ်းမိူင်းမီးယူႇမွၵ်ႈသၢမ်မိုၼ်ႇၵေႃႉ ယူႇသဝ်းဝႆႉ။

လႆႈႁူႉဝႃႈ တႄႇဝၼ်းတီႈ 08/06/2025 ၼႆႉမႃး သိုၵ်းမၢၼ်ႈတင်း ၸုမ်းပျီႇတုၸိတ်ႉပဢူဝ်း ႁူမ်ႈၵၼ်သေ ဢဝ်ႁႅင်းသိုၵ်းမွၵ်ႈ 700 ပၢႆ ၵႂႃႇၸွမ်းသဵၼ်ႈတၢင်း ဝဵင်းပၢင်လွင်းလႄႈ ၾၢႆ ၶုၼ်သေ ထႅမ်ႁႅင်းသိုၵ်းၶဝ်ႈၼႂ်း ဝဵင်းမိူင်းပၢႆး ဝႃႈၼႆ။

ၾၢႆႇၸုမ်းသိုၵ်းၸၢဝ်းၶိူဝ်းယၢင်းလႅင်ၶဝ်ၵေႃႈ ဢိုတ်းဝႆႉသဵၼ်ႈတၢင်းၵႂႃႇမႃးၶဝ်ႈဢွၵ်ႇဝဵင်းမိူင်းပၢႆးသေ ၾၢႆႇသိုၵ်းမၢၼ်ႈၵေႃႈ ဢိုတ်းဝႆႉသဵၼ်ႈတၢင်းလူင် ပၢင်လွင်း၊ ၾၢႆၶုၼ်၊ မိူင်းပၢႆး ၸူဝ်ႈၶၢဝ်း တင်ႈတႄႇ ဝၼ်းတီႈ 20 လိူၼ်ၵျုၼ်ႊၼႆႉ ဝႃႈၼႆ။

ယွၼ်ႉသိုၵ်းတင်းသွင်ၾၢႆႇ ၶဵင်ႈၶႅင်ၵၢၼ်သိုၵ်းတေႃႇၵၼ်ႁၢဝ်ႈႁႅင်း ၵူႈပိုၼ်ႉတီႈ ၼႂ်းဝဵင်းမိူင်းပၢႆးလႄႈ ၵူၼ်း မိူင်း ဝဵင်းမိူင်းပၢႆး၊ ၾၢႆၶုၼ်၊ ၸႄႈဝဵင်းယွင်ႁူၺ်ႈ ၶၢႆႉဢွၵ်ႇဝဵင်းပၢႆႈၵႂႃႇ ႁၢၼ်ႉတေႃႇထိုင် မိူဝ်ႈဝႃး ဝၼ်းတီႈ 01/07/2025 ၼႆႉ ၵူၼ်းပၢႆႈၽေးသိုၵ်းတင်းသဵင်ႈ မီးယူႇသီႇမိုၼ်ႇပၢႆ ၼႆယဝ်ႉ။

တႅမ်ႈ – ၽူၺ်းၼုမ်ႇ