ၸွမ်းသိုၵ်းလူင် ယွတ်ႈသိုၵ်း ႁူဝ်ပဝ်ႈၶွင်ႇသီႇဢဝ်ၶိုၼ်းၸိုင်ႈတႆး ဢွၵ်ႇငဝ်းႁၢင်ႈသဵင်ဢွၼ်ႊလၢႆႊ ၵမ်းသိုဝ်ႈသေ တူၵ်ႇလၢတ်ႈဝႃႈ ၸၢဝ်းၶိူဝ်းၼင်ႇၵၼ် တိုၵ်းၵၼ်ၼႆႉ ဢမ်ႇမီးၽွၼ်းလီသင် တူၵ်းလွၵ်းၽူႈၶဵၼ်ၵူၺ်း ဝႃႈၼႆ။

ဝၼ်းတီႈ 17/09/2018 ၸွမ်သိုၵ်းလူင် ယွတ်ႈသိုၵ်းတူၵ်ႇလၢတ်ႈတီႈလၢႆးၵၢၼ် မႄးႁၵ်ႉၽွမ်ႉၸွႆႈ ပွႆႇငဝ်းႁၢင်ႈသဵင်ၵမ်းသိုဝ်ႈတီႈ Facebook တႆးလွတ်ႈလႅဝ်း တင်ႈတႄႇၵၢင်ဝၼ်း12 မူင်းတေႃႇထိုင်ဝၢႆးဝၼ်း 2 မူင်းပၢႆ။ တူၵ်ႇလၢတ်ႈငဝ်းလၢႆးလုမ်ႈ ၾႃႉ၊ ငဝ်းလၢႆးမိူင်းတႆး၊ မိူင်းမၢၼ်ႈၸိူဝ်းၼႆႉ။

ၼႂ်းလၢႆးၵၢၼ်ၼၼ်ႉ ၸွမ်းသိုၵ်းလူင် ယွတ်ႈသိုၵ်း လၢတ်ႈဝႃႈ “ ၸၢဝ်းၶိူဝ်းၼႂ်ႈမိူင်းတႆးၼႆႉ ယူႇႁူမ်ႈႁွမ်း ၸွမ်းၵၼ်လၢႆပၢၵ်ႇပီမိူင်းမႃး ဢမ်ႇတွၼ်ႉမီးပၼ်ႁႃသေပွၵ်ႈ ဝၢႆးမႃးၽူႈၶဵၼ်ၶဝ်ႈမိူင်းမႃး ပဝ်ႇႁူႁႂ်ႈၸၢဝ်းၶိူဝ်း ၼႂ်းမိူင်းႁဝ်းၼင်ႇၵၼ် ႁၼ်ၽိတ်းၵၼ် ထိုင်တီႈပေႃးမီးပၢင်တိုၵ်းယိုဝ်းၵၼ်မႃး။ ပေႃးႁဝ်းပီႈ ၼွင်ႉသမ်ႉ ဢဝ်မႃႇၼ တေႃးသ ဢမ်ႇဝူၼ်ႉလိုၵ်ႉလိုၵ်ႉၼႆ ႁဝ်းၵေႃႈႁၼ် ၽိတ်းၵၼ်သေ ဢမ်ႇတူၺ်းၼႃႈၵၼ်လႆႈၼႆ ႁဝ်းတူၵ်းလွၵ်ႈၵၢၼ်မိူင်းၽူႈၶဵၼ်ယဝ်ႉ၊ ၸၢဝ်းၶိူဝ်းၼႂ်းမိူင်းတႆးတိုၵ်းၵၼ် ႁဝ်းလႆႈ ၽွၼ်းလီသင် ၵူၼ်းမိူင်းတုၵ်ႉလႆႈပၢႆႈၵူၺ်း။ ၵွပ်ႈၼၼ်လႄႈ ၼႂ်းဝၼ်းမိူဝ်ႈၼႆႉ ႁဝ်းၶႃႈထုၵ်ႇလီဝူၼ်ႉၶိုၼ်းသေ ဝၢႆႇၼႃႈၶဝ်ႈ ႁႃၵၼ် ယဝ်ႉ။ ပေႃးႁဝ်းဢဝ်မႃႇၼ သေၶႄႉၶႅင်ႇၵၼ်ၼႆတႄႉ ႁဝ်းတေဢမ်ႇလႆႈၽွၼ်းလီသင် ” ဝႃႈၼႆ ။

ဢၼ်လႆႈပဵၼ်ပၢင်တိုၵ်းၵၼ်ၼႂ်းၸိုင်ႈတႆးပွတ်းႁွင်ႇၼၼ်ႉ မိူဝ်ႈပီ 2015 သိုၵ်း RCSS/SSA ၶိုၼ်ႈၵႂႃႇတၢင်းမူႇၸေႊၼမ်ႉၶမ်း ၺႃးသိုၵ်းတဢၢင်းၼႄးဝႃႈ ပူၼ်ႉပႅၼ်ၼႃႈတီႈၼႆသေ ငွႆးယိုဝ်း 2 ၾၢႆႇပဵၼ် ပၢင်တိုၵ်းၵၼ်မႃး တေႃႇဝၼ်းမိူဝ်ႈၼႆႉ။ လိူဝ် ၼၼ်ႉၾၢႆႇ SSPP/SSA ၵေႃႈဝႃႈ RCSS သူင်ႇသိုၵ်းၶဝ်ႈသၢင်ႈ ပၼ်ႁႃၼႂ်းၸိုင်ႈတႆးပွတ်းႁွင်ႇ တုၵ်းယွၼ်း RCSS ထွႆဢွၵ်ႇ ဢမ်ႇလႆႈၶေႃႈလႄႈ ၾၢႆႇ SSPP ပိုတ်ႇလၢတ်ႈ ဝႃႈႁူမ်ႈ TNLA ယိုဝ်း RCSS ၵူၼ်းမိူင်းၼပ်ႉႁူဝ်ႁဵင်ၺႃးၽေးသိုၵ်း။

မိူဝ်ႈႁူဝ်လိူၼ်သႅပ်ႊထႅမ်ႊၿိူဝ်ႊ 2018 ၼႆႉ သိုၵ်းဢူၺ်းလီပွတ်းႁွင်ႇ ဢၼ်မီးသိုၵ်း SSPP တင်းTNLA ႁူမ်ႈၵၼ်သေ တင်း သိုၵ်း RCSSတိုၵ်းယိုဝ်းၵၼ်ႁၢဝ်ႈႁႅင်း ႁဵတ်းႁႂ်ႈၵူၼ်းဝၢၼ်ႈ ႁူဝ်ၵူၼ်း 2,000 ပၢႆ ၸိူဝ်းယူႇဝူင်ႈ ၵၢင်သီႇပေႃႉၼမ်ႉတူႈ လႆႈပၢႆႈယၢၼ်ႁိူၼ်းယေးတီႈယူႇ။

လွင်ႈၼႆႉၾၢႆႇၸွမ်သိုၵ်းလူင်မိၼ်ႉဢွင်ႇလၢႆႇၵေႃႈ ပိုတ်ႇလၢတ်ႈဝႃႈ သိုၵ်းၸၢဝ်းၶိူဝ်းၼင်ႇၵၼ် ႁိမ်ၼႃႈလိၼ် ၵၼ် တိုၵ်းတေႃးၵၼ် တုမ်ႉယွၼ်ႈလွင်ႈယူႇလွင်ႈၵိၼ်ၵူၼ်းမိူင်းလႄႈ တေႁႅၼ်းသိုၵ်းၵႂၢတ်ႇလၢင်ႉ ၵႂႃႇဝႃႈၼႆ။