တႄႇဢဝ်ဝၼ်းတီႈ 20 လိူၼ်ဢေႊပရိူဝ်ႊလ် 2026 ၼၼ်ႉ မႃး ဢူးမိၼ်းဢွင်ႇလၢႆႇ ဢၼ်တႅင်ႇတင်ႈလူင်ပွင်ၸိုင်ႈႁင်းၵူၺ်း ပိုၼ်ၽၢဝ်ႇ ၽႅၼ်ၵၢၼ် 100 ဝၼ်း တႃႇၸတ်းပွင်ႁွင်ႈၵၢၼ်ဢၼ်ယူႇတႂ်ႈၽွင်းလူင်ၾၢႆႇလႂ်ၾၢႆႇၼၼ်ႉ လႄႈ တႃႇၶိုင်ပွင်လွင်ႈငမ်းယဵၼ်ၸိူဝ်းၼႆႉပႃး ။ ၸွမ်းၼင်ႇ ISP ထတ်းသၢင်ဝႆႉတႄႉ လၢႆးလၢတ်ႈလႄႈလၢႆးႁဵတ်းလူင်ပွင်ၸိုင်ႈဢၼ်သိုၵ်းမၢၼ်ႈတႅင်ႇတင်ႈ ဢမ်ႇပႆႇ မႅၼ်ႈႁွႆးလဵဝ်ၵၼ်ဝႃႈၼႆ

ၼႂ်းၽႅၼ်ၵၢၼ် 100 ဝၼ်းၼၼ်ႉ မီးပႃးဝႃႈ တေၸတ်းပွင်ၸိုင်ႈမိူင်းလၢႆၶၵ်ႉလၢႆတွၼ်ႈယူႇဝႃႈၼႆသေတႃႉ ဢမ်ႇႁၼ် ဢွၵ်ႇပၵ်းပိူင်ၼႅၼ်ႈၼႃ တႃႇပူၵ်းပွင်သင် ။ ဝၢႆးယိုတ်းဢႃႇၼႃႇယဝ်ႉ မီးပၢင်တိုၵ်းသိုၵ်းသိူဝ်ၼမ် ၵူၼ်းမိူင်းလူႉသုမ်းသၢႆၸႂ် လူႉသုမ်းတီႈယူႇတၼ်းသဝ်းတင်းၼမ်တင်းလၢႆ ႁၢမ်းၵၢၼ်ငၢၼ်းတင်းၼမ်သေတႃႉ ဢမ်ႇႁၼ်ဢွၵ်ႇပိူင်ၵမ်ႉထႅမ်သင်ၸႅင်ႈလႅင်း ။

ၶၼ်ၵုၼ်ႇဢမ်ႇၼိမ်လႄႈႁဵတ်းႁႂ်ႈ ၵၢၼ်ၵႃႉၵၢၼ်ၶၢႆၵူၼ်းမိူင်းယၢပ်ႇၽိုတ်ႇၼႆ ႁၼ်ယူႇသိုဝ်ႈၼႃႈတၼ်းတႃသေတႃႉ ဢမ်ႇၵုမ်းသင်လႆႈသေဢမ်ႇၵႃး ၽႅၼ်ၵၢၼ်ဢၼ်တေလူင်းမိုဝ်းႁဵတ်းလႆႈၵမ်းသိုဝ်ႈၵေႃႈ ဢမ်ႇမီးသင် ၼႆ ISP Myanmar တႄႉ ထတ်းသၢင်ဝႆႉၼင်ႇၼၼ်။

ပေႃးဢဝ် ၶေႃႈယၼ်ႇၸႂ် သလူဝ်ႊၵႅၼ်ႊ ဢၼ်လူင်ပွင်ၸိုင်ႈတႂ်ႈသိုၵ်းမၢၼ်ႈ ဢွၵ်ႇဝႆႉတႄႉ စိုက်ပျိးရေးကို အခြေခံမည် ၊ ပြည်တွင်းဖြစ်ကို ထုတ်လုပ်အားပေးမည် ၊ ပြည်သူလူထုက ချွေတာရမည် – တေဢိင်ၼိူဝ်ၵၢၼ်ၽုၵ်ႇသွမ်ႈ တေပၼ်ႁႅင်းၶူဝ်းဢွၵ်ႇၼႂ်းမိူင်း – တူဝ်ၵူၼ်းမိူင်းတေလႆႈၽိမ်းၵိၼ်ၽိမ်းၸၢႆႇ – ၼႆသေတႃႉတေႃႉတႄႉႁဵတ်းၼႄယူင်ႉသၢင်ႈမၼ်းၵူၺ်း ဢမ်ႇထိုင်တီႈၵႄႈလိတ်ႈပၼ်ႁႃသင် တေႉတေႉ ။

လူင်ပွင်ၸိုင်ႈတႂ်ႈသိုၵ်းမၢၼ်ႈ ၶွတ်ႇၽွတ်ႈဝႆႉ ႁွင်ႈၵၢၼ်လူင် 31 ႁွင်ႈၵၢၼ်သေတႃႉ ၽႅၼ်ၵၢၼ် 100 ဝၼ်းၼႆႉ တေႃႉတႄႉႁူမ်ႇငမ်းဝႆႉ 5 ႁွင်ႈၵၢၼ်ၵူၺ်း ။ မိူၼ်ၼင်ႇ ႁွင်ႈၵၢၼ်ၾၢႆႇၽၼ်ႇတႃႇငိုၼ်းတွင်း ၊ ၾၢႆႇပၢႆးပၺ်ႇၺႃႇ ၊ ၾၢႆႇပၢႆးယူႇလီ ၊ ႁွင်ႈၵၢၼ်ၾၢႆႇႁူမ်ႈသၢင်ႈၵၢၼ်ငၢၼ်း ( ႁွင်ႈၵၢၼ်တမဝႃႇယမ ) လႄႈ ႁွင်ႈၵၢၼ်ၾၢႆႇတေႃႉသူင်ႇ ၼႂ်းၼၼ်ႉ သွၼ်ႇပႃး ၾၢႆႇပူၵ်းပွင်တီႊၵျီႊတႄလ်ႊ ၸိူဝ်းၼႆႉ။

ႁွင်ႈၵၢၼ်ၾၢႆႇၽၼ်ႇတႃႇငိုၼ်းတွင်း ၼၼ်ႉ မီးၽႅၼ်ၵၢၼ် တႃႇပၼ်ငိုၼ်းၵူႈတႃႇၽုၵ်ႇသွမ်ႈၵူၼ်းမိူင်း ၶၵ်ႉတွၼ်ႈၼိုင်ႈ ၶၵ်ႉတွၼ်ႈသွင် ။ ၼိုင်ႈတွၼ်ႈလႂ် သႅၼ်ႁွမ်း 3000 ပျႃႊ ။ လိူဝ်ၼၼ်ႉ တႃႇၽုၵ်ႇၶဝ်ႈ ၊ ၶဝ်ႈမႅၼ်ႇ(ၵျုင်ႇ) ၊ ၵုၺ် ၊ ငႃး ၊ တူၼ်ႈဢၼ်ႁဵတ်းဢွၵ်ႇၼမ်ႉမၼ်းၸိူဝ်းၼႆႉ မီးငိုၼ်းၵူႈပၼ်ပႃးၼႆယူႇ ။

ၵဵဝ်ႇလူၺ်ႈလွင်ႈၼႆႉ ၸဝ်ႈၼႃးၼႂ်းမိူင်းတႆးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်မီးၽႅၼ်ၵၢၼ်တႃႇပၼ်ငိုၼ်းၵူႈၸဝ်ႈသူၼ်ၸဝ်ႈၼႃးယူႇသေတႃႉ ဢမ်ႇလႆႈငၢႆႈငၢႆႈ ။ တေႃႇပေႃးမႃးထိုင်ၼႂ်းမိုဝ်း ၸဝ်ႈသူၼ်ၸဝ်ႈၼႃးၵေႃႈ ပေႃးပူၼ်ႉၶိင်ႇၽုၵ်ႇသွမ်ႈမၼ်းယဝ်ႉ ။ ပေႃးၵုမ်ႇပႂ်ႉငိုၼ်းၵူႈသေၸင်ႇႁဵတ်းၵၢၼ်တႄႉ ဢမ်ႇၸၢင်ႈပၼ်ႇၵၢၼ်သင်ႇလႆႈယဝ်ႉ ” – ဝႃႈၼႆ။

မိူၼ်ၼင်ႇ ႁွင်ႈၵၢၼ်ၾၢႆႇပၢႆးပၺ်ႇၺႃႇၵေႃႈဝႃႈ တေယုၵ်ႉမုၼ်းၸၼ်ႉၸွမ်ၼေႇပျီႇတေႃႇ ဝဵင်းလိူဝ်ႇ တႃႈၵုင်ႈ ၸိူဝ်းၼႆႉ ႁႂ်ႈဝႆႉၵၢၼ်ၶူၼ်ႉၶႂႃႉပဵၼ်ယႂ်ႇ ၊ ႁူင်းႁဵၼ်းၸၼ်ႉၵၢင်ၸိူဝ်းၼႆႉၵေႃႈ ႁႂ်ႈသႂ်ႇပႃး ဝိၶျႃႊ ၽႃႇသႃႇပၢႆးၸၢၵ်ႈ ပၢႆးလဵင်ႉလူသတ်း လႄႈ ၾၢႆႇပၢႆးႁူႉတူင်ႇၵူၼ်း ပြည်သူ့နီတိ စာရိတ္တပညာရပ် ၼႆၸိူဝ်းၼႆႉ။

ႁူင်းႁဵၼ်းၼႂ်းတႃႈၵုင်ႈ ဝဵင်းလိူဝ်ႇ ဢေႇရႃႇဝတီႇ ပႃႇၵိူဝ် ပႃးၸဵမ်ၼႂ်းမိူင်းတႆး ၸိူဝ်းၼႆႉၵေႃႈ တေတႄႇ မီး Smart School Football for School ၼႆ ၸဵမ်ၸိူဝ်းၼႆႉလႄႈ တေယုၵ်ႉမုၼ်းႁူင်းႁဵၼ်းၸၼ်ႉဢွၼ်ၸိူဝ်းၼႆႉ ပႃးၼႂ်းၽႅၼ်ၵၢၼ် 100 ဝၼ်း ။ ဝႃႈၼၼ်သေ တႃႉ ၶူးသွၼ်မေႃသွၼ် ၸိူဝ်းႁဵတ်း CDM သေ ပႆႇလႆႈလွင်ႈႁပ်ႉႁွင်းတီႈၽႂ်ၵေႃႈ တိုၵ်ႉၵိုတ်းၼမ် တႃႇပၼ်ႇၵၢၼ်ၸွမ်းၼင်ႇ ၽႅၼ်ၵၢၼ် 100 ဝၼ်းယၢပ်ႇ ၼႆယဝ်ႉ။

ႁွင်ႈၵၢၼ်ၾၢႆႇႁူမ်ႈသၢင်ႈၵၢၼ်ငၢၼ်း(ႁွင်ႈၵၢၼ်တမဝႃႇယမ) ၵေႃႈဝႃႈ တေၸတ်းပွင် တႃႇမီးၼမ်ႉၵိၼ်ၼမ်ႉၸႂ်ႉၼႂ်းၵၢၼ်ၽုၵ်ႇသွမ်ႈၶႅမ်ႉလႅပ်ႈၼၼ်ႉ တေၸႂ်ႉၾႆးသႅင်လႅတ်ႇ(ၾႆးသူဝ်ႊလႃႊ) သေ တိုတ်ႉတၢင်ႇၼမ်ႉ ။

ႁွင်ႈၵၢၼ်ၾၢႆႇတေႃႉသူင်ႇၵေႃႈ ဝႃႈ တေယုၵ်ႉမုၼ်း သဵၼ်ႈတၢင်းၾၢႆႇသၢႆၵၢၼ်မိၼ် ၊ ၾၢႆႇၼိူဝ်ၼႃႈၼမ်ႉ ၊ ၾၢႆႇရူတ်ႉၾႆး ၊ ၾၢႆႇၵပ်းသိုပ်ႇတိတ်းတေႃႇၵၼ်ၼႆၸိူဝ်းၼႆႉ။

ရူတ်ႉၾႆးၼႆႉ လိူဝ်သေဝဵင်းလိူဝ်ႇတႃႈၵုင်ႈၸိူဝ်းၼၼ်ႉယဝ်ႉ မိူၼ်ၼင်ႇ ဝဵင်းၸေႊၼႃး မိူင်းၵွင် မိူင်းယၢင်း ၸိူဝ်းၼႆႉၵေႃႈ တေမႄးၵုမ်းသဵၼ်ႈတၢင်းရူတ်ႉၾႆးလႄႈ ႁူဝ်ၸၢၵ်ႈရူတ်ႉၾႆးၸိူဝ်းၼႆႉၵႂႃႇ။တႃႇၵပ်းသိုပ်ႇသၢႆၾူၼ်းသၢႆဢိၼ်ႊထိူဝ်ႊၼႅတ်ႉၸိူဝ်းၼႆႉၵေႃႈ တေယုၵ်ႉမုၼ်းႁႂ်ႈပဵၼ်မႃး 4 G LTE ဝႃႈၼႆယူႇ ။

ႁွင်ႈၵၢၼ်ၾၢႆႇပၢႆးယူႇလီၵေႃႈဝႃႈ တေထႅမ်ၽူႈႁၢပ်ႇၵၢၼ်ထႅင်ႈ ၼႆသေတႃႉ ႁႅင်းၵူၼ်းသမ်ႉ ဢမ်ႇၵုမ်ႇ ၊ ယွၼ်ႉဝႃႈ လုၵ်ႈႁဵၼ်း ၵူၼ်းၼုမ်ႇၸိူဝ်းၼႆႉ ပၢႆႈဢွၵ်ႇမိူင်းၼမ် ၼႆ ၵူၼ်းၼုမ်ႇလုၵ်ႈႁဵၼ်းၸၼ်ႉၸွမ်ၾၢႆႇပၢႆးမေႃယႃ ၵေႃႉၼိုင်ႈလၢတ်ႈ။

လိူဝ်ၼၼ်ႉ ၽႅၼ်ၵၢၼ် 100 ဝၼ်းၼႆႉ ဢမ်ႇႁူမ်ႇငမ်းလႆႈတင်းမိူင်းႁူမ်ႈတုမ်ပတ်းပိုၼ်ႉ တေႃႉတႄႉ ႁူမ်ႇငမ်းပႃး တႃႈၵုင်ႈ ဝဵင်းလိူဝ်ႇ ၼေႇပျီႇတေႃႇမွၵ်ႈၼၼ်ႉၵူၺ်း လိူဝ်ၸိူဝ်းၼၼ်ႉ တေႃႉတႄႉ ၶဝ်ႈၸိမ်လႆႈဢိတ်းဢွတ်း ။
ၼႂ်းၼႃႈတီႈ ၸိူဝ်းဢၼ်ၸုမ်းလုၵ်ႉၽိုၼ်ႉ ၵုမ်းၵမ်ဝႆႉၸိူဝ်းၼၼ်ႉတႄႉ ယိင်ႈၶႅၼ်းဢမ်ႇၸၢင်ႈၶဝ်ႈထိုင် ။

သိုၵ်းမၢၼ်ႈၼႆႉ ၾၢႆႇၼိုင်ႈၵေႃႈ ဢွၵ်ႇၼႄၽႅၼ်ၵၢၼ် 100 ဝၼ်း တႃႇပွင်ဝၢၼ်ႈသၢင်ႈမိူင်း ၊ ၾၢႆႇၼိုင်ႈသမ်ႉ တိုၵ်ႉၶဵင်ႈၶႅင်ပၵ်းပိူင် တႃႇမိပ်ႇငႅၼ်းၵူၼ်းမိူင်း ။ တိုၵ်ႉသိုပ်ႇ ပိၵ်ႉဢိုတ်းၶၢဝ်ႇငၢဝ်းမၢၼ်ႇမႅၼ်ႈၸိုဝ်ႈၸႂ်ႈ ဢမ်ႇပၼ်ၵူၼ်းမိူင်းႁူႉၸွမ်း

ႁူင်းဢိတ်ႇလိၵ်ႈလၢႆတီႈၼႂ်းမိူင်းမၢၼ်ႈၵေႃႈ ၺႃးသင်ႇပိၵ်ႉဢိုတ်း ၊ ယွၼ်ႉသိုၵ်းမၢၼ်ႈ ဢမ်ႇၶႂ်ႈႁႂ်ႈႁဵတ်းဢွၵ်ႇ လိၵ်ႈ ၊ ႁၢင်ႈ ၸိူဝ်းဢၼ်တေတုမ်ႉတိူဝ်ႉၶဝ်။

ပၵ်းပိူင်ဢၼ်ဢွၵ်ႇမႃး ၽွင်းယိုတ်းမိူင်းၼႆႉၵေႃႈ ထိုင်တႅင်ႇတင်ႈမီးမႃးလူင်ပွင်ၸိုင်ႈယဝ်ႉသေတႃႉ ပႆႇပူတ်းပႅတ်ႈ တိုၵ်ႉသိုပ်ႇၵမ်ၵိၼ်းၵူၼ်းမိူင်းမိူၼ်ၵဝ်ႇ ပႃးၸဵမ် ပိူင်ၵဵပ်းသိုၵ်းၸိူဝ်းၼႆႉ။

လူင်ပွင်ၸိုင်ႈသိုၵ်း မိၼ်းဢွင်ႇလၢႆႇ တႅင်ႇတင်ႈၼႆႉ ၾၢႆႇၼိုင်ႈၵေႃႈ ၶႂ်ႈၼႄဝႃႈ တိုၵ်ႉယူႇတႂ်ႈ ပိူင်ငဝ်ႈပိုင်းမိူင်း 2008 ၾၢႆႇၼိုင်ႈၵေႃႈ သမ်ႉၶႂ်ႈၼႄဝႃႈ ပဵၼ်လူင်ပွင်ၸိုင်ႈဢၼ်ၵူၼ်းမိူင်းလိူၵ်ႈတင်ႈ ။ ၸင်ႇၼၼ်လႄႈ ၶႂ်ႈဢဝ် ၽႅၼ်ၵၢၼ် 100 ဝၼ်းၼႆႉ ၽေႃႇၼမ်ႉၼႄတူဝ် ။

ပေႃးမႃး ၸႅၵ်ႇသေတူၺ်း ၽႅၼ်ၵၢၼ်ဢၼ်လူင်ပွင်ၸိုင်ႈတႂ်ႈသိုၵ်းမၢၼ်ႈၶိုင်ယူႇၼႆႉ ဢၼ်ၸၢင်ႈပဵၼ်လႆႈမီးယူႇသေတႃႉ လွင်ႈၶဵင်ႇတႃႉတႃႇၶဝ်ၵေႃႈမီးတင်းၼမ် ။ တေႃႇထိုင်မိူဝ်ႈလဵဝ် ပၢႆးမၢၵ်ႈမီးၸိုင်ႈမိူင်းတိုၵ်ႉတူၵ်းသုမ်း ၊ ပၼ်ႁႃၸုမ်းယိပ်းၵွင်ႈၵၢင်ႇၵေႃႈ တိုၵ်ႉမီးၼမ် ။

ၼႂ်းၶၵ်ႉတွၼ်ႈသွင် ၽႅၼ်ၵၢၼ် 100 ဝၼ်းၼၼ်ႉ ပႃးဝႆႉဝႃႈ တေၶိုၼ်းႁူပ်ႉထူပ်းၶိုၼ်း ၸုမ်း EAO ဢၼ်လူင်းလၢႆးမိုဝ်း NCA ဝႆႉၸိူဝ်းၼၼ်ႉ ။တူဝ်ယၢင်ႇမၼ်း တေၶိုၼ်း ႁူပ်ႉထူပ်းၶိုၼ်း KNU CNF ABSDF ၸိူဝ်းၼႆႉ ။

ၸုမ်း EAO ၸိူဝ်းပႆႇလူင်းလၢႆးမိုဝ်း NCA ၸိူဝ်းၼၼ်ႉၵေႃႈ တေၽိတ်ႈမွၵ်ႇပဵၼ်တၢင်းၵၢၼ်သေ ႁူပ်ႉၵၼ်။ လိူဝ်ၼၼ်ႉ တေၽိတ်ႈမွၵ်ႈႁႂ်ႈ PDF ၸိူဝ်းၼႆႉ မႃးႁူမ်ႈ ဝၢင်းၶိူင်ႈထႅင်ႈ။

ၸုမ်း PDF ၸိူဝ်းမႃးဝၢင်းၶိူင်ႈၵေႃႈ မီးၼပ်ႉႁူဝ်ပၢၵ်ႇယဝ်ႉၼင်ႇၵဝ်ႇၼႆသေ သိုၵ်းမၢၼ်ႈတႄႉ တၢင်ႇၽိုၼ်ႁၢႆးငၢၼ်းလွင်ႈၼႆႉဝႆႉ မိူဝ်ႈဝၼ်းတီႈ 21/04/2026 ၼၼ်ႉၼင်ႇၼႆ။

သိုၵ်းမၢၼ်ႈၼႆႉ တႃႇၶဝ်ႈဢွၵ်ႇလႆႈ လၢႆလၢႆၸိုင်ႈမိူင်းၵေႃႈ ပႆႇမီးမိူင်းလႂ်ဢၼ်ယွမ်းႁပ်ႉႁူဝ်ပၢၵ်ႇတဵမ် ။ ၸင်ႇၼၼ်လႄႈ ၽႅၼ်ၵၢၼ် 100 ဝၼ်းၼႆႉ ၶူင်ဢွၵ်ႇမႃးၵေႃႈ မီးၸိုဝ်ႈၵူၺ်း ။

ၽႅၼ်ၵၢၼ် 100 ဝၼ်းၼႆႉ တေမီးထိုင် လိူၼ်ၵျူႊလၢႆႊ 2026 သဵင်ႈ ၵိုတ်းလၢႆဝၼ်းၼႆႉၵူၺ်း ။ ပေႃးပႆႇပူၵ်းပွင်လႆႈ ၵွၼ်းၵိူင်ႈလႆႈ ၵူႈမူႇၵူႈၸုမ်း ၵူႈႁွင်ႈၵၢၼ်တႄႉ ပႆႇၸၢင်ႈမီးၼမ်ႉတွၼ်းၽွၼ်းလီသင်တႃႇၵူၼ်းဝၢၼ်ႈၵူၼ်းမိူင်းတေႉတေႉၼႆ ISP Myanmar ထတ်းသၢင်ႁၢႆးငၢၼ်းဝႆႉၼင်ႇၼႆ။

ယူႇတီႈတႅၼ်းၽွင်းၼႂ်းပႃႇတီႇသၢင်ႇသီႈလၢႆၵေႃႉ လၢတ်ႈတႄႉ ၶႄး တေၶႂ်ႈယိူင်းဝႃႈ ဢမ်ႇၸႂ်ႈလူင်ပွင်ၸိုင်ႈသိုၵ်းၽွင်းငမ်း၊ ပဵၼ်လူင်ပွင်ၸိုင်ႈၵူၼ်းႁိူၼ်း လႅၵ်ႈလၢႆႈၽွင်းငမ်းယဝ်ႉ ၼႆသေတႃႉ တၢမ်တူဝ်ၸွမ်ပွင်ၸိုင်ႈၼႆႉ လုၵ်ႉတီႈၸွမ်ပွင်သိုၵ်း သေ ထွတ်ႇၶူဝ်းသိုၵ်းၶိုၼ်ႈမႃးၵူၺ်း ၊မၼ်းတိုၵ်ႉၸႂ်ႉပိူင်ၵဝ်ႇပၵ်းၵဝ်ႇၵူၺ်း ၊ လိူဝ်ၼၼ်ႉ ပၼ်ႁႃလွင်ႈ ၵေႃႇၵၢၼ်ႁၢႆႉပိုတ်းယိုဝ်း ၵၼ်ၼႆႉ တိုၵ်ႉသိုပ်ႇပဵၼ် မီးယူႇမိူၼ်ၵဝ်ႇၵဝ်ႇ၊တႃႇ တေႁႃလီဢုပ်ႇဢူဝ်း ၵေႈၶႆၵၢၼ်မိူင်း တေႃႇၵၼ်ၼႆ ၵေႃႈ ၼွၵ်ႈလိူဝ်ၸုမ်းၸၢဝ်းၶိူဝ်း ၸိူဝ်းယူႇယဵၼ်မႃး ပဵၼ်ပွတ်းပဵၼ်တွၼ်ႈၼၼ်ႉယဝ်ႉ ပႆႇမီးၸုမ်းလုၵ်ႉၽိုၼ်ႉ မႂ်ႇမႂ်ႇၶဝ်ယွမ်းႁပ်ႉ၊ တေႃႈၼင်ႇ ၸိူဝ်းယၢမ်ႈလူင်းလၢႆးမိုဝ်း NCA ယင်းဝၢႆႇပၢၵ်ႇၵွင်ႈၸူးၶဝ်ယူႇၵမ်ႈၽွင်ႈ – ၼႆ ၽူႈတႅမ်ႈလိၵ်ႈ ႁိုၼ်းၵႃယၢင်း ထတ်းသၢင်လၢတ်ႈဝႆႉၼင်ႇၼႆ။

ဢၢင်ႈဢိင် – https://ispmyanmar.com/burmese/op2026-03/