မိူဝ်ႈဝႃး ဝၼ်းတီႈ 23/6/2026 တပ်ႉသိုၵ်းယၢင်းၽိူၵ်ႇ (KNA) ဢၼ်လႅၵ်ႈလၢႆႈမႃးပဵၼ် တပ်ႉပႂ်ႉလႅၼ်လိၼ် (BGF) တီႉၺွပ်းဢဝ်ၵူၼ်းၸၢႆးၸၢဝ်းၶိူဝ်းမၢၼ်ႈ သွင်ၵေႃႈ ၸိူဝ်းပိုၼ်ၽႄႈ ငိုၼ်းထႆးပွမ် မွပ်ႈဢၢပ်ႈပၼ်တီႈႁူင်းပလိၵ်ႈဝဵင်းမျႃႉဝတီႇ လႅၼ်လိၼ် မိူင်းယၢင်းၽိူၵ်ႇ-မိူင်းထႆး ဝႃႈၼႆ။
ၵူၼ်းၸၢႆးသွင်ၵေႃႉ ၸိူဝ်းၺႃးတီႉၺွပ်းၼႆႉ ပဵၼ်ၸၢဝ်းၶိူဝ်းမၢၼ်ႈ ယူႇသဝ်းဝႆႉၼႂ်းဝဵင်းမႄႈသွတ်ႇသေ ဢဝ်ငိုၼ်းထႆးမၢင်ၼိုင်ႈႁဵင် ဢၼ်ပွမ် တႃႇ 1000 မၢင် (ၵိုင်ႇၵႃႈၶၼ်ငိုၼ်း 1 လၢၼ်ႉဝၢတ်ႇ)သေ သူင်ႇၵႂႃႇတၢင်း ဝဵင်းမျႃႉဝတီႇ မိူင်းယၢင်းၽိူၵ်ႇ ဝႃႈၼႆ။
ၽူႈမီးပုၼ်ႈၽွၼ်း တပ်ႉသိုၵ်းယၢင်းၽိူၵ်ႇ KNA လၢတ်ႈဝႃႈ – “ၶဝ်သွင်ၵေႃႉၼႆႉ ၵပ်းသိုပ်ႇၵၼ်တင်း ၸုမ်းႁဵတ်းငိုၼ်းပွမ် တီႈဝဵင်းၽတ်ႉတယႃး ၼိူဝ်ဢွၼ်ႊလၢႆႊသေ ၵႂႃႇႁူပ်ႉထူပ်းဢုပ်ႇ ၵုမ်ၵၼ်။ ဝၢႆးၼၼ်ႉ ၸင်ႇတေႃႉဢဝ်ငိုၼ်းပွမ် ၸိူဝ်းၼၼ်ႉသေ လုၵ်ႉတီႈဝဵင်းမႄႈသွတ်ႇ သူင်ႇၵႂႃႇတၢင်း မျႃႉဝတီႇ” ဝႃႈၼႆ။
တႄႇဢဝ်ၼႂ်းႁူဝ်လိူၼ်ၵျုၼ်ႊမႃးၼႆႉ ငိုၼ်းထႆးပွမ် ၽႄႈလၢမ်းဝႆႉၼႂ်းဝဵင်းမျႃႉဝတီႇ။ ဝၢႆးၽူႈမီးပုၼ်ႈၽွၼ်းၶဝ် ၵူတ်ႇထတ်းယဝ်ႉ ၼႂ်းၶၢဝ်းတၢင်း 5 ဝၼ်း ၸင်ႇမႃးတီႉၺွပ်းလႆႈၵူၼ်းတေႃႉ သူင်ႇငိုၼ်းပွမ် 2 ၵေႃႉ ဢိၵ်ႇတင်းငိုၼ်းပွမ် 4 သႅၼ် 9 မိုၼ်ႇဝၢတ်ႇ။
ယၢမ်းလဵဝ် ငိုၼ်းထႆးပွမ် ဢၼ်ၵိုတ်းလိူဝ်ထႅင်ႈ 5 သႅၼ်ဝၢတ်ႇၼၼ်ႉ ၸွတ်ႇၽႄႈဝႆႉယူႇ ၼႂ်းဝဵင်းမျႃႉဝတီႇ လႄႈ ယူႇတီႈၽူႈမီးပုၼ်ႈၽွၼ်းၶဝ် တိုၵ်ႉသိုပ်ႇၶူၼ်ႉသွၵ်ႈႁႃဝႆႉ။ ၵူၼ်းသွင် ၵေႃႉ ဢၼ်ၺႃးတီႉၺွပ်းဝႆႉၼၼ်ႉၵေႃႈ တေဢဝ်လိူင်ႈၵႂႃႇ ၸွမ်းၼင်ႇပၵ်းပိူင်မၢႆမီႈမီးဝႆႉ ၼႆယဝ်ႉ။
တႅမ်ႈ – ၼၢင်းငိုၼ်းႁွမ်
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ