ၼႂ်းႁူဝ်လိူၼ်ၵျုၼ်ႊၼႆႉ ငိုၼ်းတုငိုၼ်းပွမ် ၽႄႈလိူင်ႇၼမ်မႃးၶိုၼ်းၼႂ်းဝဵင်းလႃႈသဵဝ်ႈ မိူင်းတႆးပွတ်းႁွင်ႇ ၸဝ်ႈႁၢၼ်ႉၶၢႆၵုၼ်ႇယွႆႈၵူႈသႅၼ်းသႅၼ်း လႄႈ ၵူၼ်းႁပ်ႉသူင်ႇလႅၵ်ႈငိုၼ်းၶဝ် လႆႈဢွၼ်ၵၼ်ၾၢင်ႉတူၺ်းလီလီ။

ၸဝ်ႈႁၢၼ်ႉၵုၼ်ႇၵႃႉတၢင်းၶၢႆ ၼႂ်းဝဵင်းလႃႈသဵဝ်ႈၵေႃႉၼိုင်ႈလၢတ်ႈၼႄတီႈၽူႈတွႆႇႁွၵ်ႈဝႃႈ “မိူဝ်ႈဢွၼ်တၢင်း ၵႆႉလႄႇၺႃး 2-3 မၢင်ၵူၺ်း။ မိူဝ်ႈလဵဝ်ၼႆႉပေႃးၺႃးၼိုင်ႈပွၵ်ႈၼႆႉ ဢေႇသုတ်း 5-6 မၢင်ယဝ်ႉ။ သမ်ႉပဵၼ်မၢင် 10,000 လၢႆလၢႆ။ ငိုၼ်းတေႉ လႄႈတင်း ငိုၼ်းပွမ်ၼႆႉ ၸေႈမၼ်းဢမ်ႇမိူၼ်ၵၼ် ယိပ်းတူၺ်းၵူၺ်းၵေႃႈႁူႉယဝ်ႉ။ တူဝ်လိၵ်ႈႁိမ်းၶၢင်ႈမၼ်းၵေႃႈ တေပိူင်ႈ ၵၼ်။ ငိုၼ်းပွမ်ၼႆႉ ၸေႈမၼ်းတေမိူၼ်ၸေႈယူဝ်းယူဝ်း ငၢႆးမိူၼ် ၸေႈၼႂ်းပပ်ႉလိၵ်ႈလုၵ်ႈဢွၼ်ႇၼၼ်ႉ” ဝႃႈၼႆ။

သင်ပဵၼ်ၸေႈငိုၼ်းတေႉၸိုင် မၢင်ၸေႈမၼ်း တေပဵၼ်ၾၢင်ႁၢင်ႈၸႃးၸႃးဝႆႉလႄႈ တူဝ်လိၵ်ႈ ဢၼ်ပႃးဝႆႉႁိမ်းၶၢင်ႈ ၼႂ်းမၢင်ႈၸေႈၼၼ်ႉၵေႃႈ တႅမ်ႈဝႆႉ CBM ။ ၸေႈငိုၼ်းဢၼ်ပွမ် ဢၼ်လိူင်ႇၽႄႈၸွတ်ႇတူဝ်ႈဝႆႉယၢမ်းလဵဝ်ၼႆႉ တီႈတူဝ်လိၵ်ႈထႅဝ်တႂ်ႈၼၼ်ႉ တေမီးမၢႆ ဢၼ်တႅမ်ႈဝႆႉဝႃႈ DL-7876568 ပႃးဝႆႉၼႆ – ၵူၼ်းမိူင်းပိုၼ်ႉတီႈ လၢတ်ႈၼင်ႇၼႆ။

ၵူၼ်းမိူင်းပိုၼ်ႉတီႈ ၼႂ်းၸႄႈဝဵင်းမိူင်းယႆၵေႃႉၼိုင်ႈၵေႃႈ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈလဵဝ် ၸွမ်းဝၢၼ်ႈႁဝ်းၵေႃႈ ပိူၼ်ႈဢဝ်ငိုၼ်းပွမ်မၢင်မိုၼ်ႇၼႆႉ မႃးၸႂ်ႉတိုဝ်းၵၼ်ယဝ်ႉဢေႃႈ ။ တီႈလၢၼ်ႉႁဝ်းၼႆႉ ၶႃႈပေႃးလႆႈတႅမ်ႈ မၢႆငိုၼ်းပွမ်ၼၼ်ႉႁႄ တိတ်းပႃႉဝႆႉႁႂ်ႈၸႅင်ႈဢေႃႈ။ လႆႈမႃးမၢင်လႂ်ၵေႃႈ ပဵၼ်မၢႆၼၼ်ႉတင်းသဵင်ႈဝႆႉဢေႃႈ” ဝႃႈၼႆ။

ယၢမ်းလဵဝ်ငိုၼ်းပွမ်ၼႆႉ ၵိုင်ႉၵၢင်ႉၽႄႈမႃးၶိုၼ်း ၼႂ်းၶၢဝ်းတၢင်း ႁူဝ်လိူၼ်ၵျုၼ်ႊၼႆႉသေ ၵမ်ႈၼမ် ၵူၼ်းလႅၵ်ႈငိုၼ်း လႄႈ ဢူၼ်းငိုၼ်း ၺႃးၼမ်လိူဝ်ပိူၼ်ႈၵူၺ်းဢမ်ႇၵႃး ၸဝ်ႈႁၢၼ်ႉၶၢႆသိူဝ်ႈၶူဝ်း ၊ ႁၢၼ်ႉတၢင်းၵိၼ် လႄႈ ႁၢၼ်ႉၶၢႆၾူၼ်း မႄးၾူၼ်းၸိူဝ်းၼႆႉၵေႃႈ ၺႃး ဝႃႈၼႆ။

ဝၢႆးလင်သိုၵ်းမၢၼ်ႈယိုတ်းမိူင်းသေ ၼႂ်းမိူင်းတႆးပွတ်းႁွင်ႇ ပဵၼ်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉၼႆႉ ၵၢၼ်ႁႃၵိၼ်လဵင်ႉတွင်ႉယၢပ်ႇၵိၼ်းလိူဝ်မႃးႁႅင်း ႁဵတ်းႁႂ်ႈၵူၼ်းၸူးငၢႆႈၶဝ် ႁဵတ်းၵၢၼ်ႁႃၵိၼ်လၢႆးတၢင်းလတ်း လူၺ်ႈၵၢၼ်လိင်ႉလၢႆးလႅၼ်။

ၽွင်းပီ 2023-2024 ၼၼ်ႉ ငိုၼ်းပွမ်တႄႇလိူင်ႇၽႄႈတၢင်းမိူင်းတႆးပွတ်းၸၢၼ်း ပီ 2025 မီးပႃးၵူၼ်းပိုတ်ႇဢႅၵ်ႇၶွင်ႉ TikTok Facebook ၸိူဝ်းၼႆႉသေ ပိုၼ်ၽၢဝ်ႇၶၢႆငိုၼ်းပွမ် ပဵၼ် တၢင်းၵၢၼ်ၼိူဝ်ဢွၼ်ႊလၢႆႊလႄႈ ႁဵတ်းႁႂ်ႈငိုၼ်းပွမ်ၽႄႈ လိူင်ႇၸွတ်ႇတူဝ်ႈ။

ႁဵတ်းႁႂ်ႈၵူၼ်းၵႃႉၵူၼ်းၶၢႆ ၸိူဝ်းႁဵတ်းႁႃၵိၼ်ၽိူၵ်ႇၸိုၼ်ႈၶၢဝ်သႂ်ၵေႃႈ ၺႃးပိူၼ်ႈဢဝ်ငိုၼ်းပွမ် မႃးသိုဝ်ႉၶူဝ်း လူၺ်ႈဢမ်ႇတၼ်း ၾၢင်ႉမႅၼ်ႈ – မီးတင်းၼမ်ဝႃႈၼႆ။

ယၢမ်းလဵဝ် ပီ 2026 ၵၢၼ်ၸႂ်ႉ ငိုၼ်းပွမ် မၢင် 10,000 ပျႃးၼႆႉ ၸွတ်ႇၽႄႈလၢမ်းမႃးထိုင်တၢင်း မိူင်းတႆးပွတ်းႁွင်ႇယဝ်ႉလႄႈ ႁႂ်ႈၵူႈၵေႃႉၾၢင်ႉၵူတ်ႇထတ်းတူၺ်း ငိုၼ်းၽႂ်မၼ်းၽွင်ႈၼႆ ၼၢင်းယိင်းၵေႃႉယူႇဝႆႉ ၼႂ်းဝဵင်းလႃႈသဵဝ်ႈၵေႃႉၼိုင်ႈ တူၵ်ႇတၵ်ႉပၼ်ၾၢင်ႉလၢတ်ႈၼႄဝႆႉၼင်ႇၼႆ။