ၵဵတ်ႇလၢၼ်ႇၵဝ်ႇ ဢၼ်တင်ႈဝႆႉတီႈလႅၼ်လိၼ်မိူင်းၶႄႇ-မိူင်းတႆး ၼႂ်းၼႃႈတီႈသိုၵ်းၵဝ်ႈၵၢင်ႉ MNDAA ၵုမ်းၵမ်ဝႆႉ ၼၼ်ႉ ယၢမ်းလဵဝ် ၶိုၼ်းမူၼ်ႉမႄးဝႆႉ တႃႇပိုတ်ႇၶိုၼ်းႁႂ်ႈလႆႈ ဝႃႈၼႆ။

ၼင်ႇႁိုဝ် တေတေႃႉသူင်ႇၶူဝ်းၵုၼ်ႇ ၊ ပၼ်ၵူၼ်းမိူင်းၶဝ်ႈဢွၵ်ႇ ၵႂႃႇမႃးလႆႈ မိူင်းတႆး-မိူင်းၶႄႇ ၶိုၼ်းမိူၼ်ၵဝ်ႇၼၼ်ႉ ၾၢႆႇၸုမ်းသိုၵ်းၶႄႇၵဝ်ႈၵၢင်ႉ MNDAA ႁၢင်ႈႁႅၼ်းတေပိုတ်ႇၶိုၼ်း ၵဵတ်ႉလၢၼ်ႇ ဢၼ်ၵဝ်ႇ – ဢၼ်မႂ်ႇ ၽွမ်ႉၽွမ်ႉမိူဝ်ႈလဵဝ်ၵၼ် ။

ယၢမ်းလဵဝ် ၾၢႆႇသိုၵ်းၶႄႇၵဝ်ႈၵၢင်ႉ မူၼ်ႉမႄးၶိုၼ်း ၵဵတ်ႉလၢၼ်ႇဢၼ်ၵဝ်ႇၼၼ်ႉ ႁႂ်ႈၵႂၢင်ႈလိူဝ်ၵဝ်ႇ ႁဵတ်းၶိုၼ်းပၢင်ႇပၢင်ႇ တႃႇပေႃးဝႆႉ ၵႃးလူင် ၵႃးဢွၼ်ႇၵူႈသႅၼ်းသႅၼ်းၼႆ ၵူၼ်းမိူင်း ပိုၼ်ႉတီႈ လၢတ်ႈၼင်ႇၼႆ။

“လႆႈႁူႉဝႃႈ ႁူဝ်ႉလႅၼ်လိၼ်ၵေႃႈ ၶိုၼ်းၶၢႆႉမႃးၶၢတ်ႈ ၾင်ႇတၢင်းမိူင်းမၢၼ်ႈသေ ၵေႃႇႁူဝ်ႉဢုတ်ႇဝႆႉမႂ်ႇမႂ်ႇ။ ပေႃးၵၢင်ဝၼ်းၼႆ လႆႈႁၼ်ၵူၼ်းၸိူဝ်းႁဵတ်းၵၢၼ် ၶၢတ်ႈႁူဝ်ႉမႂ်ႇ ၾၢႆႇမိူင်းၶႄႇၶဝ် မႃးလူင်းၵၢၼ်ဝႆႉယူႇ ၵူႈဝၼ်း” ၵူၼ်းပိုၼ်ႉတီႈလၢတ်ႈၼင်ႇၼႆ။

ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 ၽွင်းသိုၵ်းၶႄႇၵဝ်ႈၵၢင်ႉ MNDAA ၵုမ်းၵမ် ပၼ်ႇၵၢၼ်ၽွင်းငမ်းယူႇ တီႈ ၶျိၼ်ႊသူၺ်ႇႁေႃႇ ၊ ဝဵင်းၵၢတ်ႇၵဝ်ႇ (လၢဝ်ႇၵၢႆး) ၊ ၵိဝ်ႇၵူတ်ႇ (ပၢင်ႇသၢႆး) ၸိူဝ်းၼႆႉၵူၺ်းဢမ်ႇၵႃး တၢင်းၸႄႈဝဵင်းမူႇၸေႊ ၼႆႉၵေႃႈ ၾၢႆႇတၢင်းမိူင်းၶႄႇ လွမ်ႉႁူဝ်ႉၶၢတ်ႈၶဝ်ႈလိူဝ် မႃး ၼႂ်းလႅၼ်လိၼ်မိူင်းတႆးထႅင်ႈ။

လွင်ႈၵၢၼ်ပူၼ်ႉပႅၼ် လႅၼ်လိၼ် လွမ်ႉႁူဝ်ႉၶဝ်ႈမႃးၼႂ်းလႅၼ်လိၼ်မိူင်းတႆးထႅင်ႈၼၼ်ႉ ၾၢႆႇသိုၵ်းၶႄႇၵဝ်ႈၵၢင်ႉ ဢမ်ႇပိုၼ်ၽၢဝ်ႇဢွၵ်ႇသင်ဝႆႉ ပဵၼ်တၢင်းၵၢၼ်ၵူၺ်းဢမ်ႇၵႃး မိူၼ်ၼင်ႇ သိုၵ်းမၢၼ်ႈၵေႃႈ ဢမ်ႇတူၵ်ႇတၵ်ႉလၢတ်ႈသင်ၸွမ်း တီႈမိူင်းၶႄႇ။