ၾူၼ်းႁႂႃႊဝေႊ Huawei ဢၼ်ၶွမ်ႊပၼီႊၾူၼ်း မိူင်းၶႄႇ ႁဵတ်းဢွၵ်ႇမႂ်ႇလိုၼ်းသုတ်းၼႆႉ သျီႊၵျိၼ်ႉၽိင်ႊ ၸွမ်ၸိုင်ႈမိူင်းၶႄႇ ဢဝ်ႁဵတ်းပဵၼ်ၶူဝ်းတွၼ်ႈပၼ်မိၼ်းဢွင်ႇလၢႆႇ ဢၼ်တိုၵ်ႉ ႁွတ်ႈထိုင် ဢႅဝ်ႇယဵမ်ႈမိူင်းၶႄႇ- လူင်းလၢႆးမိုဝ်းၽွမ်ႉၸႂ်တႃႇႁူမ်ႈၶႄႇႁဵတ်းၵၢၼ်ဝႆႉယူႇတီႈ ဝဵင်းလူင်ပေႇၵျိၼ်ႊ မိူင်းၶႄႇၼၼ်ႉ ဝႃႈၼႆ။
မိူဝ်ႈဝႃး ဝၼ်းတီႈ 16 လိူၼ်ၵျုၼ်ႊ ဝၢႆးလင်ပၢင်ၵုမ်ဢုပ်ႇဢူဝ်း လူင်းလၢႆးမိုဝ်း ႁူမ်ႈၶူင်းၵၢၼ်တင်းမိူင်းၶႄႇ 18 သႅၼ်း ၼၼ်ႉယဝ်ႉတူဝ်ႈလီငၢမ်း သျီႊၵျိၼ်ႉၽိင်ႊ ဢဝ်ၾူၼ်းႁႂႃႊဝေႊ လုၼ်ႈလႃႈသုတ်းၼၼ်ႉတွၼ်ႈပၼ်မိၼ်းဢွင်ႇလၢႆႇ ၵမ်းသိုဝ်ႈ ၼႆယဝ်ႉ။
မိၼ်းဢွင်ႇလၢႆႇ ၸွမ်ၸိုင်ႈမႂ်ႇ ဢၼ်လုၵ်ႈတီႈသိုၵ်းမၢၼ်ႈယိုတ်းမိူင်းမႃးၼၼ်ႉၵေႃႈ ၼႅတ်ႈယႃႉၵွင်ႇမၼ်းသေ ပိုတ်ႇၸၢမ်းၸႂ်ႉတိုဝ်းတူၺ်း။ သျီႊၵျိၼ်ႉၽိင်ႊၵေႃႈ ၼႄႉၼမ်းၼႄလၢႆး တၢင်း ၵၢၼ်ၸႂ်ႉတိုဝ်းၾူၼ်းမႂ်ႇ ႁႂႃႊဝေႊၼၼ်ႉယူႇ ဝႃႈၼႆ။
လိူၼ်ပူၼ်ႉမႃး ၽွင်းၸွမ်ၸိုင်ႈဢမေႊရိၵၼ်ႊ ၻေႃႊၼႄႊလ်ထရမ်ႉ ၵႂႃႇဢႅဝ်ႇယဵမ်ႈမိူင်းၶႄႇၼၼ်ႉၵေႃႈ ၾၢႆႇတၢင်းမိူင်းၶႄႇတွၼ်ႈၶူဝ်းတွၼ်ႈတင်းၼမ်တင်းလၢႆ။ ဢိင်ၼိူဝ်လွင်ႈႁူမ်ႇလူမ်ႈၸိုင်ႈမိူင်းၼႆသေ ၸွမ်ၸိုင်ႈထရမ်ႉ ဢမ်ႇဢဝ်ၶူဝ်းတွၼ်ႈၼၼ်ႉပွၵ်ႈႁိူၼ်းၶိုၼ်း။ ဢဝ်ပွႆႇပႅတ်ႈတီႈတႃႈႁိူဝ်းမိၼ်မိူင်းၶႄႇၼၼ်ႉတင်းမူတ်း ၵွၼ်ႇတေၶိုၼ်ႈႁိူဝ်းမိၼ်ပွၵ်ႈၶိုၼ်း ၼၼ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ