ၶႄႇ လၢတ်ႈဝႃႈ  ၶၢဝ်းတၢင်း ၽွင်းလူင်ၾၢႆႇၼွၵ်ႈမိူင်း ၸုမ်းလူင်ပွင်ၸိုင်ႈသိုၵ်းမၢၼ်ႈယိုတ်းမိူင်း  မႃးမိူင်းၶႄႇ ပွၵ်ႈၼႆႉ  လႆႈႁၼ်ဝႃႈ ၵၢင်ၸႂ်ၵၢၼ်မိူင်း သွင်မိူင်းၶႂ်ႈႁူမ်ႈၵၼ်ယုၵ်ႉမုၼ်း  ၸႃႉႁူမ်ႈၶီလီႁူမ်ႈသိူဝ်းၵႂႃႇၸွမ်းၵၼ် ဝႃႈၼႆ။

 မဝ်ႊၼိင်ႊ ၽူႈၶၢၼ်ပၢၵ်ႇ ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းၶႄႇလၢတ်ႈၵႂႃႇ ၼႂ်းပၢင် သပ်းၸႅင်ႈၶၢဝ်ႇ ဝၼ်းတီႈ 3 လိူၼ်ၵျုၼ်ႊၼႆႉဝႃႈ ၸွမ်းၼင်ႇ မိူင်းၶႄႇ မွၵ်ႇႁွင်ႉသေ ၼႂ်းဝၼ်းတီႈ 4 – 6 လိူၼ်ၵျုၼ်ႊၼႆႉ ဢူးတိၼ်ႇမွင်ႇသူၺ်ႇ ၽွင်းလူင်ၾၢႆႇၼွၵ်ႈမိူင်း သိုၵ်းမၢၼ်ႈ တေမႃးဢႅဝ်ႇယဵမ်ႈမိူင်းၶႄႇ ပဵၼ်တၢင်းၵၢၼ် ဝႃႈၼႆ။

ၶၢဝ်းတၢင်းဢၼ်ၼႆႉ ပဵၼ်ၶၢဝ်းတၢင်းပွၵ်ႈႁႅၵ်ႈတွၼ်ႈတႃႇဢူးတိၼ်ႇမွင်ႇသူၺ်ႇ ဝၢႆးလင်လႆႈႁပ်ႉတၼ်းႁဵင်းပဵၼ်ၽွင်းလူင်ၾၢႆႇၼွၵ်ႈမိူင်း ၸုမ်းလူင်ပွင်ၸိုင်ႈသိုၵ်းမၢၼ်ႈ။

ၸူဝ်ႈသိုၵ်းမၢၼ်ႈ တင်ႈလူင်ပွင်ၸိုင်ႈမႃးၼႂ်းၶၢဝ်းတၢင်း 2-3 လိူၼ်ၼႆႉၵူၺ်း မိူင်းမၢၼ်ႈလႄႈမိူင်းၶႄႇ ၶဝ်ႈဢွၵ်ႇၵႂႃႇမႃးႁႃၵၼ် ၶိူဝ်းယႂ်းဢမ်ႇထၢတ်ႇ။ ဢုပ်ႇၵၼ်တႃႇႁူမ်ႈၵၼ်ႁဵတ်းၵၢၼ်ယုၵ်ႉမုၼ်းပၢႆးမၢၵ်ႈမီး 2 ၸိုင်ႈမိူင်း။ တႃႇၸွႆႈၵၢၼ်မၢၵ်ႈမီးၵၼ် ၸဵမ်ၸိူဝ်းၼႆႉ။  

ၾၢႆႇၼိုင်ႈၵေႃႈ ၼႂ်းဝၼ်းတီႈ 30 လိူၼ်မေႊ တေႃႇထိုင် ဝၼ်းတီႈ 3 လိူၼ်ၵျုၼ်ႊၼႆႉ ၸွမ်ၸိုင်ႈ သိုၵ်း မၢၼ်ႈ ယိုတ်းမိူင်း မိၼ်းဢွင်ႇလၢႆႇ ဢွၵ်ႇၶၢဝ်းတၢင်းၵႂႃႇမီးဝႆႉတီႈ မိူင်းၵြႃးဢိၼ်ႊတီႊယိူဝ်ႊ။

ၼႂ်းႁၢင်လိူၼ်ဢေႊပရိူဝ်ႊပူၼ်ႉမႃးၼႆႉ ဝင်ႊယိ ၽွင်းလူင်ၾၢႆႇၼွၵ်ႈမိူင်း မိူင်းၶႄႇ လႆႈဢွၵ်ႇၶၢဝ်းတၢင်း မႃးတီႈမိူင်းမၢၼ်ႈသေ ဢုပ်ႇၵုမ်တူၵ်းလူင်း တႃႇတေယုၵ်ႉမုၼ်းလွင်ႈၵပ်းသိုပ်ႇၵႄႈၵၢင်သွင်မိူင်း လႄႈ တႃႇတေႁူမ်ႈမိုဝ်းၵၢၼ်ႁဵတ်းသၢင်ႈၵၢၼ်ငၢၼ်းၵႂႃႇ ၼႂ်းလၢႆလၢႆၶၵ်ႉတွၼ်ႈ ၼႆယဝ်ႉ။