မိူဝ်ႈဝၼ်းတီႈ 28/5/2026 ယၢမ်းၵၢင်ၼႂ် ၽွင်းလူင် ႁွင်ႈၵၢၼ်ၾၢႆႇၼွၵ်ႈမိူင်း မိူင်းႁူမ်ႈတုမ် (မိူင်းမၢၼ်ႈ) လႄႈ ၽွင်းတၢင် မိူင်းၶႄႇ ၵဵဝ်ႇလူၺ်ႈမိူင်းမၢၼ်ႈ ႁူပ်ႉထူပ်းၵၼ် တီႈဝဵင်းလူင်ၼေႇပျီႇတေႃႇ M-Gallery သေ လူင်းလၢႆးမိုဝ်းတင်းသွင်မိူင်း လွင်ႈမိူင်းၶႄႇၵမ်ႉၸွႆႈငိုၼ်း တႃႇႁဵတ်းသၢင်ႈၶူင်းၵၢၼ် ပီ 2026 ၼႆႉ။
ၾၢႆႇလူင်ပွင်ၸိုင်ႈသိုၵ်းမၢၼ်ႈယိုတ်းမိူင်းတႄႉ ႁၢႆးငၢၼ်းဝႃႈ ဢၼ်မိူင်းၶႄႇ တင်း မိူင်းမၢၼ်ႈ ႁူမ်ႈၵၼ်ႁဵတ်းသၢင်ႈ ၶူင်းၵၢၼ် မႄႈၶွင်- လၢၼ်ႉၸၢင်ႉၼႆႉ လမ်ႇလွင်ႈတေႉတေႉ။ မိူဝ်ႈပီ 2017 ၼၼ်ႉ ၾၢႆႇမိူင်းမၢၼ်ႈ လႆႈႁပ်ႉငိုၼ်း တေႃႊလႃႊ 40.46 လၢၼ်ႉပၢႆ တႃႇၶူင်းၵၢၼ် 140 ဢၼ် ဝႃႈၼႆ။
ၶူင်းၵၢၼ်တႃႇပီ 2026 ဢၼ်ၾၢႆႇမိူင်းမၢၼ်ႈ တေႁူမ်ႈၵၼ်တင်း မိူင်းၶႄႇသေ ႁဵတ်းၵႂႃႇၼႆႉပဵၼ်ၵၢၼ်ၽုၵ်ႇသွမ်ႈ၊ ႁႅင်းထၢတ်ႈ၊ ၵၢၼ်ႁၵ်ႉသႃ သိင်ႇဝႅတ်ႉလွမ်ႉ၊ လွင်ႈၸတ်းၵၢၼ် မႄႈၼမ်ႉ၊ ၶူင်းၵၢၼ် MSME ၸဵမ်ၸိူဝ်းၼႆႉ ႁူမ်ႈသဵၼ်ႈတေမီးယူႇ 8 ဢၼ် ဝႃႈၼႆ။
ၶူင်းၵၢၼ် မႄႈၶွင်- လၢၼ်ႉၸၢင်ႉၼႆႉ ၸိုင်ႈမိူင်းၵမ်ႇပူးၶျႃႊ၊ မိူင်းၶႄႇ၊ မိူင်းလၢဝ်း၊ မိူင်းမၢၼ်ႈ ၊ မိူင်းထႆး လႄႈ မိူင်းဝႅတ်ႉၼၢမ်း တင်း 6 မိူင်းႁူမ်ႈၵၼ် ၶွတ်ႇၽွတ်ႈမႃး မိူဝ်ႈပီ 2016 ၼၼ်ႉသေ မိူင်းလႂ်မိူင်းၼၼ်ႉ ၸႅၵ်ႇပိုၼ်ႉတီႈ တႃႇႁဵတ်းသၢင်ႈၶူင်းၵၢၼ်ဝႆႉ ႁင်းၽႂ်မၼ်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ