ၵူၼ်းမိူင်းဝၢၼ်ႈၺွင်ႇပိၼ်ႇ ၸိူဝ်းယူႇသဝ်းဝႆႉ ၾၢႆႇၸၢၼ်းႁိမ်းၵျွင်းၼွင်တဝ်း ၸႄႈဝဵင်းႁူဝ်ပူင်း ၸိုင်ႈတႆးပွတ်းၸၢၼ်းၼၼ်ႉ ထုၵ်ႇလုမ်းၽွင်းငမ်းပဢူဝ်း ဢၼ်ယူႇတႂ်ႈသိုၵ်းမၢၼ်ႈ ၸႂ်ႉၶၢႆႉ   ဝၼ်းတီႈ 27/5/2026  ႁႂ်ႈယဝ်ႉတူဝ်ႈ ဝႃႈၼႆ။  

လင်ႁိူၼ်း ဢၼ်မီးၾၢႆႇၸၢၼ်းၵျွင်းၼွင်တဝ်း ဢၼ်တေလႆႈၶၢႆႉၼၼ်ႉ မီး 70-80 လင် ။ လွင်ႈၼႆႉ ယူႇတီႈ ႁွင်ႈၵၢၼ်ၾၢႆႇၽွင်းငမ်း သိုၵ်းမၢၼ်ႈလႄႈ ၊ မုၼ်ႇၸဝ်ႈဝၢၼ်ႈၼွင်တဝ်း ၸတ်းၵၢၼ် ပၼ်ဢွင်ႈတီႈလွၵ်းလိၼ်မႂ်ႇယူႇဝႃႈၼႆသေတႃႉ ပဵၼ်လွၵ်းလိၼ်ပဝ်ႇၵူၺ်းလႄႈ တွၼ်ႈတႃႇၵူၼ်းမိူင်း ဢမ်ႇမီးတီႈယူႇ ယၢပ်ႇၽိုတ်ႇတီႈယူႇတင်းသဝ်းဝႆႉဝႃႈၼႆ ။

ၵူၼ်းၸၢႆးဢႃယု 30 လၢတ်ႈၽူႈတွႆႇႁွၵ်ႈဝႃႈ -“ယူႇတီႈမုၼ်ၸဝ်ႈၵျွင်းၼွင်တဝ်းသေ ၶၢႆႉဝႆႉပၼ်ဢွင်ႈတီႈတၢင်းၾၢႆႇႁွင်ႇဝၢၼ်ႈၼွင်တဝ်းဝႆႉ ၊ ပၼ်ၶိုၼ်းလိၼ်ယူႇၼႆသေတႃႉ ပဵၼ်လွၵ်းလိၼ်ပဝ်ႇလဵၵ်ႉလဵၵ်ႉၵူၺ်း ၊  ႁိူၼ်းယေးတီႈယူႇဢမ်ႇမီးလႄႈ ဢမ်ႇၸၢင်ႈႁဵတ်းႁိုဝ်ယူႇ ယၢပ်ႇၽိုတ်ႇဝႆႉဢေႃႈ ”- ဝႃႈၼႆ ။ 

တႃႇတေၶၢႆႉၵႂႃႇယူႇတီႈလိၼ်မႂ်ႇၼၼ်ႉၵေႃႈ  ယူႇတီႈၵူၼ်းဝၢၼ်ႈၺွင်ႇပိၼ် လူဝ်ႇတၢင်းၸွႆႈထႅမ် တႃႇသၢင်ႈတီႈယူႇတၼ်းသဝ်း လႄႈ ၼမ်ႉ ၊ ၾႆး တႃႇၸႂ်ႉ   ။

ၵူၼ်းၸၢႆးပိုၼ်ႉတီႈသိုပ်ႇလၢတ်ႈထႅင်ႈဝႃႈ – “ ယၢပ်ႇၽိုတ်ႇဝႆႉလၢႆလွင်ႈဢေႃႈ ၊ တႃႇတေသၢင်ႈႁိူၼ်း ၼိုင်ႈလင်ၼႆႉၵေႃႈတင်းၶၼ်ၵုၼ်ႇဝၼ်းမိူဝ်ႈၼႆႉႁေၼႆ ဢမ်ႇပဵၼ်လႆႈၶႃႈ ၊ ပေႃးတေၵႂႃႇယူႇတၢင်းပွတ်းပုၼ်ႉ တေလႆႈသၢင်ႈၶိုၼ်းမႂ်ႇမႂ်ႇၵူႈဢၼ်ဢေႃႈ ၊ ၸဵမ်ဢဝ် ႁိူၼ်း ၊ ၼမ်ႉ၊ ၾႆးၸိူဝ်းၼႆႉ ဢမ်ႇငၢႆႈၶႃႈ ”- ဝႃႈၼႆ ။   

လိူဝ်ၼၼ်ႉ ၵူၼ်းဝၢၼ်ႈၺွင်ႇပိၼ် ၸႄႈဝဵင်းႁူဝ်ပူင်း  12 ၵေႃႉ ၸိူဝ်းသၢၼ်ၶတ်းၵၢၼ်ယိုတ်းတီႈလိၼ်သေ ထုၵ်ႇပလိၵ်ႈသိုၵ်းမၢၼ်ႈတီႉၺွပ်းၵႂႃႇ ၼႂ်းဝၼ်းတီႈ 30 /3/2026 ၼၼ်ႉ ထုတ်ႇတူဝ်ဢွၵ်ႇမႃးလႆႈၶိုၼ်း 6 ၵေႃႉၵူၺ်း ႁိုင်ၶၢဝ်းတၢင်းလိူၼ်ပၢႆသေတႃႉ ထႅင်ႈ 6 ၵေႃႉ ပႆႇလႆႈတၢင်းၵပ်းသိုပ်ႇၵၼ်တင်းၵူၼ်းတီႈႁိူၼ်းထိုင်ဝၼ်းမိူဝ်ႈၼႆႉ ဝႃႈၼႆ ။

ၵူၼ်းၸၢႆးဝဵင်းႁူဝ်ပူင်းလၢတ်ႈၽူႈတွႆႇႁွၵ်ႈဝႃႈ – “တိုၵ်ႉဢွၵ်ႇမႃးၶိုၼ်း 6 ၵေႃႉၵူၺ်း ၊ ထႅင်ႈ 6 ၵေႃႉၼႆႉပႆႇဢွၵ်ႇမႃးၶိုၼ်း ၊ ထိုင်ဝၼ်းမိူဝ်ႈၼႆႉ ပဵၼ်ႁိုဝ်မီးဝႆႉတီႈလႂ်ၵေႃႈဢမ်ႇႁူႉ ဢမ်ႇလႆႈတင်းၵပ်းသိုပ်ႇၽႂ်ၶႃႈ”- ဝႃႈၼႆ ။

ၼႂ်းၵူၼ်းဝၢၼ်ႈ 6 ၵေႃႉထုၵ်ႇပလိၵ်ႈသိုၵ်းမၢၼ်ႈတီႉၺွပ်းၵႂႃႇၼၼ်ႉ ပႃးၵၢင်ႉၵႄႇဝၢၼ်ႈၺွင်ႇပိၼ်ႇ ထိုင်ဝၼ်းမိူဝ်ႈၼႆႉ ဢမ်ႇလႆႈတင်းၵပ်းသိုပ်ႇၵၼ်တင်းၵူၼ်းတီႈႁိူၼ်း – ၵူၼ်းပိုၼ်ႉတီႈလၢတ်ႈ ။

တၢင်းၼမ်းတီႈလိၼ် ဢၼ်ၺႃးသိုၵ်းမၢၼ်ႈယိုတ်းဢဝ်ၶိုၼ်းၼႆႉ တင်းသဵင်ႈမီးယူႇ 625 ဢေႊၶိူဝ်ႊ ၊ လင်ႁိူၼ်း မွၵ်ႈ 200 ပၢႆ ၺႃးယႃႉလူႉၵွႆ၊ ႁူဝ်ၼပ်ႉၵူၼ်းမွၵ်ႈ 400 ၵေႃႉပၢႆ ၺႃးလိုပ်ႈၶၢႆႉဢွၵ်ႇဝၢၼ်ႈဝႆႉ ။  

တီႈလိၼ်ၸိူဝ်းၼၼ်ႉ ပဵၼ်လိၼ်ၵူၼ်းဝၢၼ်ႈ ၼမ်ႉမေႃႇႁူၼ်း (နမ့်ဗော်ဟွန်း) ၊ ၽြႃးၽိူၵ်ႇ(ဘုရားဖြူ) ၊ မဵဝ်ႉဢူး (မြို့ဉီး) ၊ ၵလႃးၵုင်း (ကုလားကုန်း) ၊ၼွင်ၶူင်း( နောင်ခုံး) ၊ ပႃပိၼ်း(ပါပင်း) ၊ ၵုင်းသလွႆး (ကုန်းသလွိုး) ၊ ၼွင်ယႃႈသႆး (နောင်ယာသုဲ) ၸိူဝ်းၼႆႉ လႆႈႁူႉၼင်ႇၼႆ ။