ၼႂ်းလိူၼ်မေႊ ပီ 2026 ၼႆႉ ၶႃႈႁၢပ်ႇၵၢၼ်လူင်ပွင်ၸိုင်ႈ ၼႂ်းႁွင်ႈၵၢၼ်ႁဵတ်းပၼ်ဝႂ်တီႈလိၼ် (မြေစာရင်းရုံး) တီႈဝဵင်းလႃႈသဵဝ်ႈ ပိုၼ်ႉတီႈမီး ၸုမ်းသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းသေ ၶွတ်ႇၽွတ်ႈၶိုၼ်းလူင်ပွင်ၸိုင်ႈမႂ်ႇၼၼ်ႉ ယွၼ်းၵိၼ်ငိုၼ်းၵူၼ်းမိူင်းၸိူဝ်းၵႂႃႇ ႁဵတ်းဝႂ်တီႈလိၼ်မႂ်ႇ၊ လႅၵ်ႈလၢႆႈၸိုဝ်ႈၸဝ်ႈၶွင်ၼႂ်းၽိုၼ်လိၵ်ႈၽိုၼ်လၢႆး ၸိူဝ်းၼႆႉ ၼိုင်ႈၵေႃႉလႂ် ၼပ်ႉႁူဝ်သိပ်းသႅၼ်ပျႃး ၼႆယဝ်ႉ။

တႃႇလႆႈၽိုၼ်လိၵ်ႈယိုၼ်ယၼ် ႁႂ်ႈပဵၼ်လၵ်းထၢၼ်လႆႈဝႃႈ ၼႆႉပဵၼ်တီႈလိၼ်ၸဝ်ႈၵဝ်ႇတေႉတေႉၼႆၼၼ်ႉ ၵူၼ်းမိူင်းပိုၼ်ႉတီႈၸိူဝ်းၵႂႃႇ ႁဵတ်းႁႂ်ႈပဵၼ်တၢင်းၵၢၼ်ၼၼ်ႉ လႆႈပၼ် ၼိုင်ႈၵေႃႉလႂ် ဢေႇသုတ်း 10 သႅၼ်ထိုင် 30 သႅၼ်ပျႃး ၼႆယဝ်ႉ။

ၸၢႆးၼုမ်ႇ ဢႃႇယု 40 ပီပၢႆ ၵူၼ်းမိူင်းဝဵင်းလႃႈသဵဝ်ႈ ၵေႃႉၵႂႃႇႁဵတ်းဝႂ်တီႈလိၼ် မူၼ်ႉမႄးၶိုၼ်းၸိုဝ်ႈၸဝ်ႈၶွင် ၼႂ်းဝႂ်တီႈလိၼ် ဢၼ်ယၢမ်ႈမီးမႃးယဝ်ႉၼၼ်ႉ လၢတ်ႈၼႄတီႈၽူႈတွႆႇႁွၵ်ႈဝႃႈ- “တေႃႈၼင်ႇႁဝ်းၶႃႈၼႆႉ မီးဝႆႉ ၽိုၼ်လိၵ်ႈၽိုၼ်လၢႆး လွင်ႈၵၢၼ်ပဵၼ်ၸဝ်ႈၶွင်တီႈလိၼ်ၼႆႉတဵမ်ထူၼ်ႈယဝ်ႉ။ ၼႂ်းၽိုၼ်လိၵ်ႈၵဝ်ႇၼၼ်ႉသမ်ႉပဵၼ်ဝႆႉ ၸိုဝ်ႈပူႇမွၼ်ႇႁဝ်းလႄႈ မိူဝ်ႈလဵဝ် ႁဝ်းၶႂ်ႈလႅၵ်ႈၶိုၼ်းပဵၼ်ၸိုဝ်ႈ မႄႈႁဝ်း။ ၵွပ်ႈၼၼ် ၸူးၵႂႃႇလၢတ်ႈတီႈလုမ်း ႁႂ်ႈမူၼ်ႉမႄးပၼ်ၶိုၼ်း။ ၵႃႈသင်လၢႆလၢႆၵေႃႈ ဢမ်ႇႁူႉ ၶဝ်ယွၼ်းၼႆႉ လႆႈပၼ်ငိုၼ်းပဵၼ် 10 သႅၼ် ဢိူဝ်ႈ။ ၼႆႉႁဝ်းပဵၼ်တႆးႁႄ ႁဝ်းသမ်ႉႁူႉၸၵ်းၵၼ်တင်း ၵူၼ်းၼႂ်းလုမ်းၶဝ်ဝႆႉဢိတ်းဢိတ်းလႄႈ ယွၼ်းၵႃႈၼၼ်ႉၼႆဝႃႇ။ ပေႃးဝႃႈ ပဵၼ်တၢင်ႇၶိူဝ်းၼႆႉ ၶဝ်ယွၼ်းမွၵ်ႈ 30 သႅၼ်ဢေႇသုတ်းၼႆဢေႃႈ။ ပၼ်ငိုၼ်းယဝ်ႉသမ်ႉ တႃႇတေလႆႈၽိုၼ်လိၵ်ႈၼၼ်ႉ မႃးၼႂ်းမိုဝ်းႁဝ်း တေလႆႈပႂ်ႉထႅင်ႈ 1 ပီၵွၼ်ႇ” – ဝႃႈၼႆ။

ယၢမ်းလဵဝ် ၶႃႈႁၢပ်ႇၵၢၼ်လူင်ပွင်ၸိုင်ႈ ၼႂ်းႁွင်ႈၵၢၼ်ၾၢႆႇ ႁဵတ်းပၼ်ဝႂ်တီႈလိၼ်၊ မၢႆၾၢင် လႄႈ ပပ်ႉၶၢမ်ႈမိူင်း ၸိူဝ်းၼႆႉၵူၺ်းဢမ်ႇၵႃး ယွၼ်းၵိၼ်ငိုၼ်းၵူၼ်းမိူင်းၼမ်ႁႅင်း မိူၼ်ၼင်ႇ ပလိၵ်ႈ ၸိူဝ်းပႂ်ႉၸွမ်းသဵၼ်ႈတၢင်းလူင် ၼၼ်ႉၵေႃႈ ပႂ်ႉၵူတ်ႇထတ်းရူတ်ႉၵႃးသေ မၢပ်ႇမႂ်ယွၼ်းငိုၼ်းတီႈ ၵူၼ်းမိူင်းႁၢဝ်ႈႁႅင်းယူႇ မိူၼ်ၵၼ်ၵူႈဝၼ်း ဝႃႈၼႆ။

ၼၢင်းယိင်းၵေႃႉယူႇၼႂ်းဝဵင်းလႃႈသဵဝ်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “တေႃႈလဵဝ် လႃႈသဵဝ်ႈၼႆႉ လဝၵ မေႃႇတေႃႇပီႇၵႄႇ လုမ်းတြႃး ႁဵတ်းၵၢၼ်တတ်းသိၼ် (တရားရုံး) လုမ်းႁဵတ်းပၼ်ဝႂ်တီႈလိၼ် (မြေစာရင်းရုံး) ၶဝ်ၸိူဝ်းၼႆႉ ဢဝ်ငိုၼ်းဝႃႈငိုၼ်းယဝ်ႉ သမ်ႉပေႃး ဢမ်ႇၵဵင်ၸႂ် ဢမ်ႇႁၼ်ထိုင်ၵၢင်ၸႂ်တေႃႇၵူၼ်းမိူင်းသေဢိတ်း။ ၶႂ်ႈႁဵတ်းသင်ၵေႃႈ ဢမ်ႇႁဵတ်းပၼ်လၢႆသေဢၼ်။ မေႃႇတေႃႇပီႇၵႄႇၵေႃႈ ၺွပ်းၵူၼ်းဢမ်ႇတိုဝ်းမၢၵ်ႇႁူဝ်ရူတ်ႉၵူႈဝၼ်း ၺွပ်းလၢႆလၢႆၵူၺ်းဢမ်ႇၸႂ်ႈ ယွၼ်းငိုၼ်းပႃး ဢေႇသုတ်း 3 မိုၼ်ႇ။ ပေႃးပဵၼ်ၵႃးၵေႃႈ သင်ဝႃႈ ဢမ်ႇႁူႉတၢင်းႁႄႁေႃႈၵႂင် ပူၵႂင်ပႃဢိတ်းၼိုင်ႈၼႆတႄႉ ႁွင်ႉၵိုတ်းႁႄ ၺွပ်းၵမ်းလဵဝ်။ မိူဝ်ႈလဵဝ် ၵူၼ်းၶဝ်ၼႆႉ ၵႂႃႇႁွင်ႉတီႈလႂ်မႃး လၢႆလၢႆၵေႃႈ ဢမ်ႇႁူႉ ပႂ်ႉၸွမ်းတၢင်းၼမ်ဝႃႈၼမ် ။ မိူဝ်ႈ ဢွၼ်တၢင်း ဢမ်ႇၼမ်တၢၼ်ႇၼႆႉ ။ ပၢင်ပၼ်ပိုၼ်ႉႁူႉသဵၼ်ႈတၢင်းၵေႃႈ ၶဝ်ဢမ်ႇႁဵတ်းပၼ်တေႉတေႉ” ဝႃႈၼႆ။

လိူဝ်ၼၼ်ႉ တီႈဝဵင်းလႃႈသဵဝ်ႈၼႆႉ ဝၢႆးလင်ပဵၼ်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉသေ သိုၵ်းမၢၼ်ႈၶဝ်ႈမႃးၵုမ်းၵမ်ပၼ်ႇၵၢၼ်ၽွင်းငမ်းၶိုၼ်းၼႆႉ ၽူႈလၵ်ႉၸၵ်ႉၶုတ်ႈ၊ ၵူၼ်းၸူၼ် ၊ ၵူၼ်းၶႃႈႁႅမ်ၵၼ်တၢႆ ၸိူဝ်းၼႆႉၵေႃႈ လိူင်ႇၼမ်ႁၢဝ်ႈႁႅင်းမႃးၵူႈမိုဝ်ႉၵူႈဝၼ်းသေတႃႉ ၾၢႆႇၸဝ်ႈၼႃႈတီႈ ပလိၵ်ႈ လႄႈ သိုၵ်းၶဝ် ဢမ်ႇၸွမ်းတီႉၺွပ်း ဢဝ်လိူင်ႈႁႂ်ႈပေႃးလႆႈတေႉတေႉ ၼႆယဝ်ႉ။