လိူၼ်မေႊ ဝူင်ႈတီႈသွင်ၼႆႉ ၾႆးၵိုင်ႉၵၢင်ႉ လုၵ်ႉႁိုၼ်ႇမႆႈ ႁၢၼ်ႉၶၢႆၵုၼ်ႇ ၵူႈသႅၼ်းသႅၼ်း ဢၼ်မီးႁိမ်းၵၢတ်ႇလူင် လွႆယဵဝ်ႈ ၼႂ်းဝဵင်းလႃႈသဵဝ်ႈ ပဵၼ်ယွၼ်ႉၾႆးသႅင်လႅတ်ႇ (Solar) ဝႃႈၼႆ။
ၵူၼ်းမိူင်းပိုၼ်ႉတီႈ ၵေႃႉယူႇဝႆႉၼႂ်းဝဵင်းလႃႈသဵဝ်ႈ ႁူႉႁၼ်ၸွမ်းပိူင်ပဵၼ်ၼႆႉ လၢတ်ႈၼႄတီႈၽူႈတွႆႇႁွၵ်ႈဝႃႈ “ႁိူၼ်းဢၼ်ၾႆးမႆႈၼၼ်ႉ ၶဝ်ၶၢႆၵုၼ်ႇၵူႈသႅၼ်းသႅၼ်း။ လႅပ်ႈတေၾႆးသူဝ်ႇလႃႇၶဝ် မႆႈႁႅင်းၼႃႇသေလႄႈ ဢဝ်ၾႆးၽုပ်ႉၶႃႈယူဝ်ႉ။ လုၵ်ႉတီႈၼၼ်ႉသေ ၾႆးလၢမ်းမႆႈၵႂႃႇပႃး ၵဵၼ်ၸေႈ လႄႈ ၶူဝ်းၶွင်ၼႂ်းလၢၼ်ႉ (ႁၢၼ်ႉ) ၶဝ်ထႅင်ႈ။ တၼ်းၶႄၾႆးၶိုတ်းတၼ်းလႄႈ ဢမ်ႇတၼ်းမႆႈၵႂႃႇၼမ်ႁႅင်း။ ၵူၼ်းၵေႃႈဢမ်ႇပဵၼ်သင်ၵႂႃႇ ၼင်ႇၵဝ်ႇၶႃႈ” ဝႃႈၼႆ။
မိူဝ်ႈပူၼ်ႉမႃးၼႂ်းလိူၼ်ၾႅပ်ႉပိဝ်ႊရီႊ ၽွင်းၵၢင်လိူၼ်ၼၼ်ႉၵေႃႈ ၾႆးမႆႈၼႂ်းၵၢတ်ႇၵၢင်ဝဵင်းလူင်ဝဵင်းလႃႈသဵဝ်ႈၵႂႃႇ ဝၼ်းလဵဝ်ၵူၺ်းသၢမ်တီႈ ။ ယွၼ်ႉၵူၼ်းၼႂ်းၵၢတ်ႇၸွႆႈၵၼ်ၶႄလႄႈ ဢမ်ႇတၼ်းလူႉသုမ်း ၶူဝ်းၶွင်ၵႂႃႇၼမ် ၼႆယဝ်ႉ။
ယွၼ်ႉၾႆးသူဝ်ႇလႃႇ လႄႈ တဝ်ႈၵႅတ်ႉသ်တႅၵ်ႇ ၾႆးၵႆႉလုၵ်ႉႁိုၼ်ႇမႆႈလၢမ်းပႃးႁိူၼ်းယေး ၶူဝ်းၶွင် ႁၢၼ်ႉၶၢႆ ၼမ်ႉမၼ်း ႁၢၼ်ႉၶၢႆၵုၼ်ႇၵူႈသႅၼ်းသႅၼ်းၵႂႃႇတင်းၼမ်။ မၢင်တီႈၶႄၾႆးဢမ်ႇတၼ်းၶိုတ်းလႄႈ ႁဵတ်းႁႂ်ႈ ၾႆးလၢမ်းမႆႈႁႅင်း ပဵၼ်ၽဝ်ႇၵႂႃႇတင်းသဵင်ႈၵေႃႈမီး။
ဝၼ်းတီႈ 26/3/2026 ၼၼ်ႉၵေႃႈသၢႆၾႆးၾႃႉသျွတ်ႉသေ ၾႆးတႄႇမႆႈ ႁွင်ႈတၢင်းၶၢႆ ၼႂ်းၵၢတ်ႇလူင်မိူင်းၶိူဝ်း ဝဵင်းသီႇပေႃႉ လူႉသုမ်းၵႂႃႇမွၵ်ႈ 10 ႁၢၼ်ႉ။ ဝၼ်းတီႈ 27/3/2026 သမ်ႉ တဝ်ႈၵႅတ်ႉသ်တႅၵ်ႇ ႁဵတ်းႁႂ်ႈၾႆးမႆႈ ႁိူၼ်းၵႂႃႇတင်းလင် ၼိူဝ်သဵၼ်ႈတၢင်း ၼိၼ်းသီႇ ပွၵ်ႉပျီႇတေႃႇတႃႇ ဝဵင်းတူၼ်ႈတီး မိူင်းတႆးပွတ်းၸၢၼ်း။
ယၢမ်းလဵဝ် ၾိင်ႈၾႃႉဢမ်ႇမႅၼ်ႈၸွမ်းၶၢဝ်း ပေႃးၶၢသ်းမႆႈၵေႃႈႁွတ်ႉႁႅင်းလူၼ်ႉလိူဝ်လႄႈ ထုၵ်ႇလီဢွၼ်ၵၼ် ၾၢင်ႉၽေးၾႆးလီငၢမ်းယူႇ။
ပိူဝ်ႈတႃႇလွတ်ႈၽေးၾႆးၼႆႉ ပေႃးတေဢွၵ်ႇႁိူၼ်းၵႂႃႇတၢင်းၼွၵ်ႈၸိုင် ၵိုင်ႇလီမွတ်ႇၾႆး၊ ထွၼ်သၢႆၾႆးၵူႈသဵၼ်ႈ ထွၼ်သၢႆႁႅင်းၾူၼ်ႊ သၢႆထႅမ်ႁႅင်းပႅတ်ႊထရီႊၸိူဝ်းၼႆႉၵူႈဢၼ် လီ ငၢမ်းယဝ်ႉၸင်ႇဢွၵ်ႇႁိူၼ်းၼႆ ၸဝ်ႈႁၢၼ်ႉၶၢႆၵုၼ်ႇယွႆႈ ၼႂ်းဝဵင်းလႃႈသဵဝ်ႈ ပၼ်ၾၢင်ႉလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ