ပေႃးထိုင်မႃး ၼႂ်းပီ 2029 မိူင်းတီႇမေႃး (Timor Leste) တေႁပ်ႉႁဵတ်းပဵၼ်ႁူဝ်ပဝ်ႈ ၸုမ်းဢႃႊသီႊယၼ်ႊ ဝႃႈၼႆ။ မိူင်းတီႇမေႃးၼႆႉ တိုၵ်ႉမႃးၶဝ်ႈႁူမ်ႈပဵၼ်လုၵ်ႈၸုမ်း ဢႃႊသီႊယၼ်ႊ မိူဝ်ႈလိူၼ် ဢွၵ်ႊထူဝ်ႊပိူဝ်ႊ ပီၵၢႆ၊ ယၢမ်းလဵဝ် ၼႂ်းဢႃႊသီႊယၼ်ႊ မိူင်းၶဝ်ႈၸုမ်းတင်းမူတ်း မီး 11 မိူင်း။

လွင်ႈ မိူင်းတီႇမေႃး တေႁပ်ႉႁဵတ်းပဵၼ် ႁူဝ်ပဝ်ႈ ဢႃႊသီႊယၼ်ႊ ၼႂ်းပီ 2029 ၼၼ်ႉ ယူႇတီႈၽူႈဢွၼ်ႁူဝ်ၸိုင်ႈမိူင်း ၼႂ်းၸုမ်းဢႃႊသီႊယၼ်ႊ လႆႈဢုပ်ႇၵုမ်တူၵ်းလူင်းၵၼ်ၵႂႃႇ ၼႂ်း ပၢင်ၵုမ်ၸၼ်ႉသုင်ဢႃႊသီႊယၼ်ႊ ပွၵ်ႈၵမ်း 48 ဢၼ်ၸတ်းႁဵတ်းတီႈ ဝဵင်းၸီႊပူႊ၊ မိူင်းၾလိပ်ႉပိၼ်း။

ယၢမ်းလဵဝ် မိူင်းၾလိပ်ႉပိၼ်း ႁပ်ႉပုၼ်ႈၽွၼ်းပဵၼ် ႁူဝ်ပဝ်ႈ ၸုမ်းဢႃႊသီႊယၼ်ႊဝႆႉ။ ပေႃးထိုင်မႃး ပီ 2027 ပီၼႃႈသမ်ႉ တေပဵၼ် မိူင်းသိင်ႊၵပူဝ်ႊ လႄႈ ပီ 2028 ပဵၼ်မိူင်းထႆး။

မိူင်းတီႇမေႃး ဢၼ်ၶဝ်ႈမႃးပဵၼ်လုၵ်ႈၸုမ်းမႂ်ႇ ၼႂ်းဢႃႊသီႊယႅၼ်ႊၼႆႉ ႁၼ်လီၵမ်ႉထႅမ်ၸွမ်း ၼႂ်းလွင်ႈ တႃႇတေဢဝ်လိူင်ႈၸွႆးတြႃး ၸွမ်ၸိုင်ႈ သိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ လႄႈ ၽူႈဢွၼ်ႁူဝ် တပ်ႉသိုၵ်းမၢၼ်ႈ လူၺ်ႈႁဵတ်းၽိတ်းပူၼ်ႉပႅၼ်ရႃႇၸဝၢတ်ႈသိုၵ်း။

တႃႇတေၸွႆးတြႃးဢဝ်လိူင်ႈသိုၵ်းမၢၼ်ႈၼၼ်ႉ ယူႇတီႈၸုမ်း သုၼ်ႇလႆႈသုၼ်ႇပဵၼ်ၶျၢင်း လႆႈတိူင်ႇၸႅင်ႈဝႆႉ။ ၼႂ်းဝၼ်းတီႈ 5 လိူၼ်မေႊၼႆႉ မိူင်းတီႇမေႃး ပိုၼ်ၽၢဝ်ႇဢွၵ်ႇမႃးဝႃႈ လိူင်ႈတၢင်းၽိတ်းၼႆႉ ယိုၼ်ႈတၢင်ႇၵႂႃႇတီႈလုမ်းတြႃးၸႄႈတွၼ်ႈ ဝဵင်းတီႊလီႊ၊ မိူင်းတီႊမေႃႊ ပဵၼ်တၢင်းၵၢၼ်လႆႈယူႇ ဝႃႈၼႆ။