“ဢမ်းၼၢၸ်ႈ(ဢႃႇၼႃႇ)” ၼႆႉ ၽႂ်ၵေႃႈၶႆႈမီး။ ၵွပ်ႈဝႃႈပေႃးမီးဢႃႇၼႃႇၼႆ တေပဵၼ်တီႇပဵၼ်ထႅၼ်ႈ တေယူႇၼိူဝ်ၵူၼ်း လႆႈ။ ပၢၵ်ႇယမ်ၵႂၢမ်းၵႃႈ ဝႃႈသင်ပဵၼ်ၼၼ်ႉ မီးဢူငဝ်းယႂ်ႇ ႁဵတ်းပၵ်းႁဵတ်းပိူင်သင်ၵေႃႈလႆႈ။ ႁဵတ်းႁႂ်ႈၵူၼ်း တင်းၼမ် ၵဵင်ၵူဝ်ၵူမ်ႈၼွမ်းဢမ်ႇၽွင်းလိူဝ်- လူၺ်ႈပႃးၸႂ်ၵေႃႈလီ ဢမ်ႇသတ်ႉထႃးပႃးၸႂ်ၵေႃႈယဝ်ႉ တၵ်းလႆႈ ၵူမ်ႈယွမ်း ႁဵတ်းၸွမ်း။ ၵူၺ်းၵႃႈ ပေႃးဢဝ်ၸႂ်ႉၼႂ်းလၢႆးတၢင်းဢမ်ႇမႅၼ်ႈၸွမ်းပိူင်ထမ်းၸိုင် ၸၢင်ႈပဵၼ်သင်လႆႈ။
ဢႃႇၼႃႇၼႆႉ မီးႁႅင်းလူင် 2 ပိူင်။ ႁႅင်းလုတ်ႇလႄႈႁႅင်းထိပ်ႇ တူင်ႇဝူင်းဢၼ်လႆႈႁူပ်ႉလႆႈႁၼ် လႆႈၵွင်ႉသၢၼ်ၵႂႃႇၸွမ်းၵၼ်။
ၾၢႆႇၼိုင်ႈ ၶတ်းၸႂ် သိူဝ်ႇတၢင်းၶဝ်ႈၸူးတူင်ႇဝူင်းၵူၼ်း ပိုင်ႈဢိင်ပႃႇရမီႇဢူငဝ်းတူင်ႇဝူင်းၵူၼ်းသေ တွၼ်ႈတႃႇႁဵတ်းၵၢၼ်သုၼ်ႇတူဝ် တႃႇၶိုၼ်ႈယႂ်ႇမၢၵ်ႈမီး ။ တႃႇႁပ်ႉပူၺ်ႈၽွၼ်းလီတႃႇတူဝ်ၵဝ်ႇလႄႈတႃႇပီႈၼွင်ႉၸိူဝ်ႉၶိူဝ်းတူဝ်ၵဝ်ႇ။
ထႅင်ႈၾၢႆႇၼိုင်ႈသမ်ႉ ၶတ်းၸႂ်ႁၢင်ႇယၢၼ်တူင်ႇဝူင်း တႃႇဝႄႈလွင်ႈတၢင်းႁၢႆႉၸႃႉ ၵၢၼ်ငၢၼ်းၸိူဝ်းၽိတ်းသိၼ်ထမ်းႁိုဝ် လွင်ႈၶီႇၼဵၵ်းတဵၵ်းတဵင်ပူၼ်ႉပႅၼ်လူလၢႆသုၼ်ႇလႆႈၵူၼ်း – ဢၼ်ဢမ်ႇမႅၼ်ႈၸွမ်းသိလ်ထမ်း။ ဢၼ်ၸၢင်ႈပဵၼ်ၽေးတေႃႇတူဝ်ၵဝ်ႇလႄႈ ပီႈၼွင်ႉၸိူဝ်ႉၶိူဝ်း။
ၵူၺ်းၵႃႈ ၼႂ်းတူင်ႇဝူင်းၵူၼ်းၼၼ်ႉ ပေႃးပဵၼ်ၽူႈမၢၵ်ႈၵူၼ်းမီး ဢမ်ႇၼၼ် ၽူႈမီးဢမ်းၼၢၸ်ႈ ဢၼ်မီးၸႂ်ၽႃႇၵၢင်ဝၢင်းၶိုင်ႈ မီးၸႂ်မဵတ်ႉတႃႇ ဝူၼ်ႉလွင်ႈတဵင်ႈထမ်း ၊ မီးၸႂ်မုၼ်ၸႂ်လီတေႃႇၵူၼ်းတင်းလၢႆ ယိုၼ်ႈမႅင်ႇၸွႆႈထႅမ် ၵူၼ်းၸိူဝ်းတုၵ်ႉၸိူဝ်းယၢၵ်ႈၸိူဝ်းၼၼ်ႉ – ၶဝ်ႈပႃးတူင်ႉၼိုင်ဝႆႉတႄႉ ထုၵ်ႇလီယွင်ႈယေႃးမၵ်းမၼ်ႈ ပဵၼ်ၽူႈလီၵူၼ်းၵႃႈ။
ၼမ်ႉၸႂ်လႄႈတၢင်းႁဵတ်းသၢင်ႈဢၼ်လီလီ ၸွမ်းၼင်ႇပႃႇရမီႇၸဝ်ႈၵဝ်ႇသေမီးမႃးၼၼ်ႉ – ႁဵတ်းၵႅင်ႈႁဵတ်းဢဝ်ဢမ်ႇလႆႈ။ မၼ်းတိုၼ်းမီးၼိူဝ်ၵၢၼ်ႁဵတ်းၵၢၼ်သၢင်ႈၵူႈဢၼ်။ လၢတ်ႈတေႃႇၽႂ်ၽူႈလႂ်ၵေႃႈမၼ်းတိုၼ်းဢွၵ်ႇမႃးၼမ်ႉသဵင်မဵတ်ႉတႃႇၵူႈၵမ်း။
ၼမ်ႉၼမ်းတၢင်းယၢမ်ႈတူဝ်ၵဝ်ႇၵူၼ်းႁဝ်းၼႆႉ မၼ်းဢိင်ၼိူဝ် ၶေႃႈတိုဝ်းၵမ်ၸဝ်ႈၵဝ်ႇ လွၼ်ႉလွၼ်ႉ။ ပေႃးပဵၼ်ၵူၼ်းမီးၸႂ်လီ မီးတၢင်းႁူႉၵေႃႈ – ႁဵတ်းၵၢၼ်သင်ၵေႃႈယဝ်ႉမီးၸႂ်ႁပ်ႉပုၼ်ႈၽွၼ်း ၼိူဝ်လွင်ႈႁဵတ်းသၢင်ႈၸဝ်ႈၵဝ်ႇၵူႈလွင်ႈလွင်ႈ။ ယွၼ်းႁပ်ႉလႆႈလွင်ႈၽိတ်းလွင်ႈထုၵ်ႇ၊ ဢမ်ႇၵႄႈတူဝ်ဝႄႈႁူဝ်ပတ်းၵူၼ်ႈသေပွၵ်ႈ။
ဢမ်းၼၢၸ်ႈ (ဢႃႇၼႃႇ)ၼႆႉ ၽူႈလႆႈႁပ်ႉပဵၼ်တၢင်းၵၢၼ်ၵူၺ်း ၸႂ်ႉတိုဝ်းလႆႈ – ဝႃႈၼႆသေတႃႉၵေႃႈ သင်ၸိူဝ်ႉတူဝ်ၸဝ်ႈဢႃႇၼႃႇဢမ်ႇတၼ်းၸိုင် မၼ်းၸၢင်းမွပ်ႈမၢႆဢႃႇၼႃႇလႄႈသုၼ်ႇႁဵတ်းပၼ်တၢင်ႇၵေႃႉႁဵတ်းတၢင်တႅၼ်း။
ၵွႆးၵႃႈၸိူင်ႉႁိုဝ်ၵေႃႈလီ ၽူႈမီးဢမ်းၼၢၸ်ႈ ႁိုဝ်ၽူႈလႆးႁပ်ႉမွပ်ႈဢမ်းၼၢၸ်ႈသေ မႃးႁဵတ်းၵၢၼ်တႅၼ်းတၢင်ၼၼ်ႉ – မၼ်းၵေႃႈတၵ်းတေလႆႈၸႂ်ႉၸွမ်းၼႂ်းၶွပ်ႇၶဵတ်ႇ ပႅင်ႈၼင်ႇၼႂ်းၼႃႈတီႈဢၼ်ႁပ်ႉမႃးၼၼ်ႉၵူၺ်း။ ဢဝ်မႃးၸႂ်ႉတီႈၵေႃႉဢၼ်ဢမ်ႇၵဵဝ်ႇ ဢဝ်ၵႂႃႇၸႂ်ႉၼွၵ်ႈၶွပ်ႇၶဵတ်ႇၼႃႈၵၢၼ်ဢၼ်လႆႈႁပ်ႉမႃးၼၼ်ႉဢမ်ႇလႆႈ။ ဢဝ်ၵႂႃႇၸႂ်ႉၶီႇၼဵၵ်းတဵၵ်းတဵင်တေႃႇတၢင်ႇၵေႃႉ လူၺ်ႈပၢႆးဝူၼ်ႉၵူတ်ႉယွၵ်းဢမ်ႇလႆႈ။ ဢဝ်ၸႂ်ႉတႃႇသုၼ်ႇတူဝ်တေလီ တိုၼ်းဢမ်ႇလႆႈ။ လွင်ႈၼႆႉၶဝ်ႈပႃးၼႂ်းဢၼ်ၽိတ်းပၵ်းပိူင် ၵမ်းသိုဝ်ႈ။
ယွၼ်ႉၼၼ်ဢမ်းၼၢၸ်ႈဢႃႇၼႃႇဢၼ်ဝႃႈၼႆႉ – ၽၢႆၶူမ်းမိူၼ်လၢပ်ႇသွင်ၶူမ်းယဝ်ႉ။ ပေႃးၵႂႃႇမီးတီႈၵူၼ်းမီးသိလ်ထမ်း မီးၸႂ်မဵတ်ႉတႃႇ ၵရုၼႃႇ မီးၸႂ်ၽိူၵ်ႇၸိုၼ်ႈၶၢဝ်သႂ်တဵင်ႈထမ်းၸိုင် ဢမ်းၼၢၸ်ႈၼၼ်ႉၵေႃႈ တေပဵၼ်ႁူမ်ႈၽူၺ်းၵတ်းယဵၼ်ပၼ်ၵူၼ်းတင်းၼမ် သိူဝ်းမူၼ်ႈယဵၼ်ၸႂ်လႆႈၸွမ်း။
သင်ဝႃႈဢႃႇၼႃႇၼၼ်ႉၵႂႃႇတူၵ်းၼႂ်းမိုဝ်း ၽူႈမီးၼမ်ႉၸႂ်မိူၵ်ႈမႂ်ႈႁၢႆႉၵျၢမ်းၵေႃႈ တေဢဝ်ၵႂႃႇၸႂ်ႉၼႂ်းလၢႆးတၢင်းၽိတ်း ၽူၼ်။ ႁဵတ်းႁႂ်ႈဝႃႇယႂ်ႇႁႅင်းၵိုၼ်းႁႃငိုၼ်းႁႃတွင်း ႁႃၼမ်ႉတွၼ်းၽွၼ်းလႆႈလီတႃႇတူဝ်ၸဝ်ႈၵဝ်ႇလႄႈ ပီႈၼွင်ႉ ၸိူဝ်ႉၶိူဝ်းၸဝ်ႈၵဝ်ႇသေ ႁဵတ်းႁႂ်ႈၵိူတ်ႇၽွၼ်းႁၢႆႉၸႃႉတေႃႇ ၵူၼ်းၼႂ်းလုမ်ႈၾႃႉဢမ်ႇမီးတီႈသုတ်းသဵင်ႈလႆႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ