ဝၢႆးလင်မိၼ်းဢွင်ႇလၢႆႇ ၶိုၼ်ႈပဵၼ်ၸွမ်ၸိုင်ႈယိုတ်းမိူင်းယဝ်ႉၼႆႉ ၶႄႇလွမ်ႉႁူဝ်ႉလႅၼ်လိၼ် ၶႂၢၵ်ႈၶၢမ်ႈၶဝ်ႈမႃးတၢင်း ၾင်ႇမိူင်းႁူမ်ႈတုမ် (မိူင်းမၢၼ်ႈ) ပွတ်းတၢင်းၼႃႈတီႈသိုၵ်းၵဝ်ႈၵၢင်ႉ (MNDAA) လႄႈ ၸုမ်းသိုၵ်းဝႃႉ (UWSA) ၵုမ်းၵမ် ပၼ်ႇၵၢၼ်ၽွင်းငမ်းဝႆႉၼၼ်ႉ ဝႃႈၼႆ။

ၸုမ်းၵူၼ်းၼုမ်ႇဝႃႉ ၸိူဝ်းတူင်ႉၼိုင်ႁဵတ်းၵၢၼ်သိုဝ်ႇယူႇ ၼႂ်းပိုၼ်ႉတီႈ ၸုမ်းယိပ်းၵွင်ႈၵၢင်ႇၵုမ်းၵမ်ၼၼ်ႉ ႁၢႆးငၢၼ်းဢွၵ်ႇမႃးဝႃႈ – လႆႈႁၼ် လူင်ပွင်ၸိုင်ႈမိူင်းၶႄႇ လွမ်ႉႁူဝ်ႉၶႂၢၵ်ႈၶဝ်ႈမႃးၼႂ်းပိုၼ်ႉတီႈ ၶျိၼ်ႊသူၺ်ႇႁေႃႇ၊ ၵိဝ်ႇၵူတ်ႉ (ပၢင်ႇသၢႆး)၊ သူၺ်ႇလီႇ လႄႈ ၸွမ်းၵဵတ်ႉလၢၼ်ႇ ၼမ်ႉတိုၵ်း (မၢၼ်ႈၶႃး) ၼၼ်ႉၵူၺ်းဢမ်ႇၵႃး မႃးတင်ႈၵဵတ်ႉလၢၼ်ႇဢၼ်မႂ်ႇထႅင်ႈ ၸွမ်းလႅၼ်လိၼ် – ဝႃႈၼႆ။

ၵူၼ်းမိူင်းၵေႃႉယူႇၼႂ်းဝဵင်းၶျိၼ်ႊသူၺ်ႇႁေႃႇ လၢတ်ႈဝႃႈ “မိူဝ်ႈလဵဝ် ၸွမ်းလႅၼ်လိၼ်ၼႆႉ မီးမႃးၵဵတ်ႉဢၼ်မႂ်ႇ၊ တႃႇႁူဝ်ႉမႂ်ႇ ။ ဝၢႆးလင်ၶဝ်လွမ်ႉ ႁူဝ်ႉမႂ်ႇၼႆႉ ႁိူၼ်းဢၼ်မီးတၢင်းၾင်ႇ မိူင်းမၢၼ်ႈၵမ်ႈၽွင်ႈၵေႃႈ ပႃးၵႂႃႇၼႂ်းလိၼ်ၶႄႇယဝ်ႉ။ ဢၼ်ၶႄႇၶဝ် ဢဝ်ၶိူင်ႈမႆႉၶိူင်ႈမိုဝ်းသေ ပူၼ်ႉပႅၼ်ၶဝ်ႈမႃးၶၢတ်ႈလွမ်ႉႁူဝ်ႉဢဝ်လိၼ်မိူင်းမၢၼ်ႈၵႂႃႇပႃးလႆႈၼႆႉ ႁဝ်းၶႃႈႁၼ်ထိုင်ဝႃႈ ၶႄႇတူၵ်းလူင်းၵၼ်တင်း ၸုမ်းယိပ်းၵွင်ႈၵၢင်ႇၶဝ်ယဝ်ႉၸင်ႇႁဵတ်းၵူၺ်း” ၼႆ တွပ်ႇဝႆႉတီႈသိုဝ်ႇၶၢဝ်ႇဝႃႉၼင်ႇၼႆ။

လႆႈႁူႉဝႃႈ ၼႂ်းႁူဝ်လိူၼ်မေႊၼႆႉၵေႃႈ ၾၢႆႇၸုမ်းသိုၵ်းဝႃႉ ပႃးၶိူင်ႈၵွင်ႈၵၢင်ႇ ဢဝ်ႁႅင်းသိုၵ်းသေ ႁွၼ်ႈထဝ်ႇ ဢဝ်လွင်ႈႁူမ်ႇလူမ်ႈ ၸွမ်းလႅၼ်လိၼ် ၸိူဝ်းတိတ်းၸပ်းၵၼ်တင်း မိူင်းၶႄႇ လႄႈ သဵၼ်ႈတၢင်းလူင် ၸိူဝ်းလမ်ႇလွင်ႈတႃႇၵၢၼ်ၵႃႉၶၢႆၼၼ်ႉဝႆႉႁၢဝ်ႈႁႅင်း။ ပိုၼ်ၽၢဝ်ႇပဵၼ်တၢင်းၵၢၼ်ဝႆႉဝႃႈ ပိူဝ်ႈတႃႇတူၺ်းလူ လွင်ႈၼိမ်တဵင်ႈ ၸွမ်းလႅၼ်လိၼ် ဝႃႈၼႆ။

ၵဵဝ်ႇၵပ်းလူၺ်ႈ ၾၢႆႇမိူင်းၶႄႇ ၶႂၢၵ်ႈတီႈလိၼ် လွမ်ႉႁူဝ်ႉၶဝ်ႈမႃးၸွမ်းလႅၼ်လိၼ်ၼၼ်ႉ ၸုမ်းသိုၵ်းၵဝ်ႈၵၢင်ႉၼႆႉ ဢမ်ႇပႆႇပိုတ်ႇပၢၵ်ႇလၢတ်ႈဢွၵ်ႇမႃးပဵၼ်တၢင်းၵၢၼ် ႁႂ်ႈပေႃးၸႅင်ႈလႅင်းသင်သေတႃႉ ဝၢႆးလင်ၶၢဝ်ႇလွင်ႈမိူင်းၶႄႇ ၶႂၢၵ်ႈလွမ်ႉႁူဝ်ႉၶဝ်ႈမႃးၼႂ်းပိုၼ်ႉတီႈၶဝ်ၵုမ်းၵမ် ႁုင်လိုဝ်းမႃးႁႅင်း ၾၢႆႇၸုမ်းသိုၵ်းဝႃႉတႄႉ ဢွၵ်ႇမႃးၸႅင်ႈဝႃႈ – ပွႆႇၵူၼ်းသိုၵ်းၶဝ် ဢဝ်လွင်ႈႁူမ်ႇလူမ်ႈ ၵူတ်ႇထတ်းဝႆႉၸွမ်းလႅၼ်လိၼ်ယူႇလႄႈ သင်ႁူပ်ႉႁၼ် လွင်ႈပႅၵ်ႇပိူင်ႈ သေလွင်ႈလွင်ႈၸိုင် ပွင်ႇၶၢဝ်ႇၸႅင်ႈၶေႃႈမုၼ်းၶၢဝ်ႇသၢၼ်တီႈၶဝ်လႆႈယူႇ ဝႃႈၼႆ။