ၼႂ်းႁူဝ်လိူၼ်တီႊသႅမ်ႊပိူဝ်ႊၼႆႉ သိုၵ်းမၢၼ်ႈၵူတ်ႇထတ်းၽဵဝ်ႈမူၺ်ႉ ဢွင်ႈတီႈမီးၵျႃႊၽျႅၼ်ႉယူႇသဝ်း ၸွမ်းလႅၼ်လိၼ် မိူင်းထႆး- မိူင်းမၢၼ်ႈတိတ်းၸပ်းၵၼ်၊ မၢၵ်ႇၵွင်ႈလူင်ၾၢႆႇတၢင်းမိူင်းမၢၼ်ႈ ၵႂႃႇတူၵ်းၼႂ်းလိၼ်ထႆး ႁဵတ်းႁႂ်ႈၵူၼ်းမိူင်းထႆး မၢတ်ႇၸဵပ်းၸွမ်း ။

လွင်ႈၼႆႉၽွင်းလူင်ၾၢႆႇၼွၵ်ႈမိူင်း မိူင်းထႆး “ သီႇႁသၵ်ႇ ၽူင်းၵဵတ်ႇၵႅဝ်ႉ” H.E. Mr. Sihasak Phuangketkeow ၵႂႃႇႁူပ်ႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ တီႈၼေႇပျီႇတေႃႇသေ ဢုပ်ႇလၢတ်ႈဝႃႈ -ၽွင်းၽဵဝ်ႈမူၺ်ႉၵျႃႊၽျႅၼ်ႉၸွမ်းလႅၼ်လိၼ် ယႃႇႁႂ်ႈမၢၵ်ႇၵွင်ႈလူင်တူၵ်းၼႂ်းလိၼ်ထႆးထႅင်ႈ ဝႃႈၼႆ။

ပၢင်ႁူပ်ႉထူပ်းၼႆႉ ၸတ်းႁဵတ်းၵႂႃႇ မိူဝ်ႈဝၼ်းတီႈ 7/12/2025 တီႈဝဵင်းလူင်ၼေႇပျီႇတေႃႇသေ ၾၢႆႇတူဝ်တႅၼ်းမိူင်းမၢၼ်ႈ မီးၸွမ်ၽွင်းလူင်၊ ၵႅမ်ၽွင်းလူင် ႁွင်ႈၵၢၼ်ၾၢႆႇၵူတ်ႇထတ်း ၵူၼ်းၶဝ်ႈဢွၵ်ႇမိူင်း လႄႈ ၽွင်းလူင်ၾၢႆႇမိူင်းၼွၵ်ႈ ဢူးတၢၼ်းသူၺ်ႇ ၊ ၸွမ်ၸိၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ၵေႃႉဢၼ်ယုၵ်ႉယွင်ႈတူဝ်ၵဝ်ႇပဵၼ်ဝႆႉ ၵႅမ်ၸွမ်ၸိုင်ႈမိူင်းႁူမ်ႈတုမ် ၸူဝ်ႈၶၢဝ်း ၼၼ်ႉၵေႃႈၶဝ်ႈႁူမ်ႈပႃးၸွမ်း။

သိုၵ်းမၢၼ်ႈယိုတ်းမိူင်း တင်း တူဝ်တႅၼ်းလူင်ပွင်ၸိုင်ႈမိူင်းထႆး ဢုပ်ႇဢူဝ်းၵၼ်ၵႂႃႇ ၵၢၼ်ဝၢင်းၽႅၼ် တႃႇၽဵဝ်ႈ မူၺ်ႉၸုမ်းၵျႃႊၽျႅၼ်ႉ၊ လွင်ႈၵၢၼ်ၵႃႉၶၢႆ လႄႈ ၵၢၼ်တေႃႉသူင်ႇ ၶူဝ်း ၵုၼ်ႇ ၶဝ်ႈဢွၵ်ႇၸွမ်းလႅၼ်လိၼ် ဢၼ် ဢမ်ႇထုၵ်ႇမႅၼ်ႈၸွမ်းပၵ်းပိူင်၊ တႃႇတပ်ႉသိုၵ်း တင်းသွင်မိူင်းႁူမ်ႈၵၼ်ႁဵတ်းၵၢၼ်ၵႂႃႇလႆႈမိူဝ်းၼႃႈ လႄႈ လွင်ႈတႃႇႁူမ်ႈၵၼ်ယုၵ်ႉမုၼ်းႁဵတ်း ၵၢၼ်ပၢႆးမၢၵ်ႈမီးၵႂႃႇ ၸဵမ်ၸိူဝ်းၼႆႉ။

ၾၢႆႇၽွင်းလူင်ၼွၵ်ႈမိူင်း မိူင်းထႆး ဢုပ်ႇဢူဝ်းၵႂႃႇဝႃႈ ၶႂ်ႈႁႂ်ႈပိုၼ်ႉတီႈၸွမ်းလႅၼ်လိၼ် မိူင်းမၢၼ်ႈ- မိူင်းထႆး မီးလွင်ႈငမ်းယဵၼ် လႄႈ မီးလွင်ႈၵၢၼ်ႁုၼ်ႈမုၼ်းၶိုၼ်ႈယႂ်ႇ၊ မုင်ႈမွင်းဝႃႈ ပၢင်လိူၵ်ႈတင်ႈၼႆႉ တေႁဵတ်းႁႂ်ႈ ၵၢၼ်မိူင်းဢၼ်လမ်ႇလွင်ႈသုတ်းၼႆႉ မီးလွင်ႈလႅၵ်ႈလၢႆႈမႃး လႄႈ တေပဵၼ်တၢင်းၵမ်ႉယၼ်တွၼ်ႈတႃႇ ႁဵတ်းသၢင်ႈ ၶၵ်ႉၵၢၼ်ငမ်းယဵၼ်ၵႂႃႇ ပွတ်းဢွၼ်ႇတွၼ်ႈၼိုင်ႈယူႇ ဝႃႈၼႆ။

မိူဝ်ႈလိူၼ်ၼူဝ်ႊဝႅမ်ႊပိူဝ်း 25 ဝၼ်းပူၼ်ႉမႃး ၽွင်းလူင်ၾၢႆႇၼွၵ်ႈမိူင်း မိူင်းထႆး H.E. Mr. Sihasak Phuangketkeow “ သီႇႁသၵ်ႇ ၽူင်းၵဵတ်ႇၵႅဝ်ႉ” ၼႆႉ ယင်းယၢမ်ႈပိုၼ်ၽၢဝ်ႇဢွၵ်ႇဝႃႈ ပေႃးပၢင်လိူၵ်ႈတင်ႈၼႂ်းမိူင်းႁူမ်ႈတုမ် (မိူင်းမၢၼ်ႈ) ယဝ်ႉၵႂႃႇ တႃႇၸုမ်း ASEAN တေၵပ်းႁႃ မိူင်းမၢၼ်ႈၼႆႉတေၸၢင်ႈမီးတၢင်းယၢပ်ႇၽိုတ်ႇ။ ယွၼ်ႉၼၼ် ထုၵ်ႇလီ ပွႆႇပၼ်ၶိုၼ်း တေႃႇဢွင်ႇသၢၼ်းၸူႉၵျီႇ ဢၼ်ၺႃးတီႉၺွပ်းဝႆႉၼၼ်ႉယူႇ ၼႆယဝ်ႉ။

တႄႇဝၼ်းတီႈ 22 လိူၼ်ဢွၵ်ႉထူဝ်ႊပိူဝ်ႊမႃး သိုၵ်းမၢၼ်ႈ တင်း တပ်ႉပႂ်ႉလႅၼ်လိၼ် မိူင်းယၢင်းၽိူၵ်ႇ (BGF) ႁူမ်ႈၵၼ် ၶဝ်ႈၵူတ်ႇထတ်း ၽဵဝ်ႈမူၺ်ႉၸုမ်းၵျႃးၽျႅၼ်ႉၸိူဝ်းတူင်ႉၼိုင်ယူႇၸွမ်း လႅၼ်လိၼ်မိူင်းမၢၼ်ႈ- မိူင်းထႆး ၼႂ်းၸႄႈဝဵင်းမျႃႉဝတီႇ တီႈ KK Park လႄႈ သူၺ်ႇၵူၵ်ႉၵူဝ်ႇဝဵင်းမႂ်ႇၼၼ်ႉမႃး။ ၸႂ်ႉတိုဝ်းပႃး မၢၵ်ႇလူင်၊ ၵွင်ႈလူင် လႄႈ ၶိူင်ႈၸၢၵ်ႈၵူႈသႅၼ်းသႅၼ်းသေ ယႃႉ ႁူင်းၵေႃႇၵၢႆႇ ၸိူဝ်းမီးၸုမ်းၵျႃးၽျႅၼ်ႉယူႇသဝ်း ၸိူဝ်းၼၼ်ႉလူႉၵွႆၵူၼ်ႇပင်းၵႂႃႇၽွင်ႈ။

မိူဝ်ႈလိူၼ်ၼူဝ်ႊဝႅမ်ႊပိူဝ်ႊ ပူၼ်ႉမႃးၼႆႉၵေႃႈ ၸုမ်းႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) ၶဝ်ႈၵႂႃႇၽဵဝ်ႈ တီႉၺွပ်း ၵူၼ်းၸိူဝ်းႁဵတ်းၵၢၼ်ၵျႃးၽျႅၼ်ႉ ၼႂ်းၼႃႈတီႈ တပ်ႉသိုၵ်းယၢင်း ၽိူၵ်ႇ (DKBA) လႄႈ ႁဵတ်းႁႂ်ႈတင်း သွင်ၾၢႆႇ ပဵၼ်ပၢင်တိုၵ်းၵၼ်ႁၢဝ်ႈႁႅင်း ၸွမ်းလႅၼ်လိၼ် ၼႆယဝ်ႉ။