မိူဝ်ႈဝၼ်းတီႈ 6 လိူၼ်ဢႄႊပရႄႊ ယၢမ်းတၢမ်းၶမ်ႈ ၽွင်းတၢင်မိူင်းၶႄႇ H.E. Ms. Ma Jia ႁွတ်ႈထိုင်မိူင်းမၢၼ်ႈ ႁူပ်ႉမိၼ်းဢွင်ႇလၢႆႇ ၸွမ်ၸိုင်ႈၵေႃႉမႂ်ႇ တီႈဝဵင်းလူင်ၼေႇပျီႇတေႃႇ ။

ဝၢႆးလင်လုမ်းသၽႃးမိူင်းႁူမ်ႈတုမ် ပိုၼ်ၽၢဝ်ႇ မိၼ်းဢွင်ႇလၢႆႇ ၸွမ်ၸိၵ်းသိုၵ်းမၢၼ်ႈ ၶိုၼ်ႈပဵၼ်ၸွမ်ၸိုင်ႈၵေႃႉမႂ်ႇ မိူင်းႁူမ်ႈတုမ်ယဝ်ႉ ယူႇတီႈၽွင်းတၢင်လူင်မိူင်းၼွၵ်ႈသေ ဢၼ်ၶဝ်ႈမႃးႁူပ်ႉထူပ်း မိၼ်းဢွင်ႇလၢႆႇ ၼႆႉ မၼ်းၼၢင်းပဵၼ်ၵေႃႉဢွၼ်တၢင်းသုတ်း။

လိူဝ်ၼၼ်ႉ ၸွမ်ၸိုင်ႈမိူင်းၶႄႇ သျီႊၵျိၼ်ႉၽိင်ႊၵေႃႈ ဝၢႆးလင်ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လႆႈႁပ်ႉၸၼ်ႉ ၸွမ်ၸိုင်ႈ ပဵၼ်တၢင်း ၵၢၼ်ယဝ်ႉ လၢႆၸူဝ်ႈမူင်းၵူၺ်း ပိုၼ်ၽၢဝ်ႇ ဢွၵ်ႇပဵၼ်တၢင်းၵၢၼ်ဝႃႈ ႁူမ်ၸူမ်းၸွမ်း မိၼ်းဢွင်ႇလၢႆႇၼႆသေ သူင်ႇလိၵ်ႈယိုၼ်ႈထိုင်မႃးၸူးဝႃႈ – မိူင်းမၢၼ်ႈ – မိူင်းၶႄႇ ပဵၼ်မိူင်းယူႇၵိၼ်ၸမ်ၵၼ် ပဵၼ်ၸိုင်ႈမိူင်းဢူၺ်းလီၵၼ်လႄႈ ယူႇတီႈမိူင်းႁူမ်ႈတုမ် (မိူင်းမၢၼ်ႈ) မီးလွင်ႈလႅၵ်ႈလၢႆႈ ၵၢၼ်မိူင်းမႃးၸိူင်ႉၼႆၵေႃႈ ၵမ်ႉထႅမ်ႁၼ်လီၸွမ်းယူႇ ၼႆယဝ်ႉ။

ၵဵဝ်ႇလူၺ်ႈ ၸွမ်ၸိုင်ႈမိူင်းၶႄႇ သူင်ႇလိၵ်ႈယိုၼ်ႈထိုင်မႃးလႄႈ တၢမ်တူဝ်ၽွင်းတၢင်လူင်မိူင်းၶႄႇ မႃးႁူပ်ႉထူပ်းၼၼ်ႉၵေႃႈ ယိၼ်းၸူမ်းၶွပ်ႈၸႂ် တေႉတေႉၼႆ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈၵႂႃႇၼႂ်းပၢင်ႁူပ်ႉထူပ်းၼၼ်ႉ ၼင်ႇၼႆ။

ၽွင်းတၢင်လူင်မိူင်းၶႄႇၵေႃႈ မွၵ်ႇလၢတ်ႈၵႂႃႇၼႂ်းပၢင်ႁူပ်ႉထူပ်းၼၼ်ႉဝႃႈ – ႁူမ်ၸူမ်းၸွမ်းလွင်ႈၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လႆႈၸၼ်ႉၸွမ်ၸိုင်ႈၵႂႃႇပဵၼ်တၢင်းၵၢၼ်လႄႈ ႁဵတ်းႁႂ်ႈ မိူင်းၶႄႇ- မိူင်းမၢၼ်ႈ (မိူင်းႁူမ်ႈတုမ်) မီးလွင်ႈၸမ်ၸႂ်ၵၼ်မႃးလိူဝ်ၵဝ်ႇလႆႈၵေႃႈ ၶွပ်ႈၸႂ်ယႂ်ႇၼမ် တေႉတေႉ။

လိူဝ်ၼၼ်ႉ မိူဝ်းၼႃႈၵေႃႈ ယုမ်ႇယမ်ဝႃႈ မိူင်းႁူမ်ႈတုမ်ၼႆႉ တေမီးလွင်ႈၼိမ်တဵင်ႈ လႄႈ ပဵၼ်မိူင်းဢၼ်ၶိုၼ်ႈယႂ်ႇလိူဝ်ၵဝ်ႇသေ ၵၢၼ်ႁူမ်ႈမိုဝ်း မိူင်းၶႄႇ-မိူင်းမၢၼ်ႈ (မိူင်းႁူမ်ႈတုမ်) ၵေႃႈ တေတိူဝ်းၼမ်မႃးလိူဝ်ၵဝ်ႇယူႇ ၼႆယဝ်ႉ။

ၼႂ်းပၢင်ႁူပ်ႉထူပ်း ၽွင်းတၢင်လူင်မိူင်းၶႄႇ တင်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၵေႃႉတိုၵ်ႉလႆႈ ႁပ်ႉၸၼ်ႉၸွမ်ၸိုင်ႈ ပဵၼ်တၢင်းၵၢၼ်ၼၼ်ႉ တင်းသွင်ၾၢႆႇ ဢုပ်ႇဢူဝ်းၵၼ်ၵႂႃႇ – လွင်ႈၵၢၼ်ႁူမ်ႈမိုဝ်း ၽွင်းတၢင်မိူင်းၼွၵ်ႈ တင်းသွင်မိူင်း၊ တႃႇႁူမ်ႈၵၼ်ႁဵတ်းသၢင်ႈၵႂႃႇ ၵၢၼ်ႁူမ်ႇလူမ်ႈ လႄႈ ၶၵ်ႉၵၢၼ်ၵူႈလွင်ႈလွင်ႈ ႁႂ်ႈၶိုၼ်ႈယႂ်ႇတိူဝ်းတွၼ်းမႃးလိူဝ်ၵဝ်ႇ၊ လွင်ႈၵၢၼ် ၼိမ်တဵင်ႈ ၸွမ်းလႅၼ်လိၼ် မိူင်းၶႄႇ-မိူင်းမၢၼ်ႈ၊ ပိူဝ်ႈတႃႇပိုတ်ႇၶိုၼ်းလႆႈ သဵၼ်ႈတၢင်းၵၢၼ်ၵႃႉၶၢႆ မိူင်းၶႄႇ-မိူင်းမၢၼ်ႈ (မိူင်းႁူမ်ႈတုမ်)၊ လွင်ႈမိူင်းမၢၼ်ႈ လႆႈႁူပ်ႉၽေးၽႅၼ်ႇလိၼ်ဝႆသေ လူႉသုမ်းၵႂႃႇယႂ်ႇၼမ်ဝႆႉၼၼ်ႉၵေႃႈ မိူင်းၶႄႇ တေသိုပ်ႇၵမ်ႉၸွႆႈၵႂႃႇ ၼႆယဝ်ႉ။