မိူဝ်ႈၼႆႉ ဝၼ်းတီႈ6/5/2026 ယၢမ်းဝၢႆးဝၼ်း ၾူၼ်လူင်လူမ်းလူင်ၵိုင်ႉၵၢင်ႉတူၵ်း ၼႂ်းဝဵင်းလႃႈသဵဝ်ႈ ႁဵတ်းႁႂ်ႈ ႁၢၼ်ႉၶၢႆၵုၼ်ႇၼႂ်းၵၢတ်ႇလူင်ၸိူဝ်းၼၼ်ႉ လူႉၵွႆ- လင်ၶႃးပိဝ် ၊ တူၼ်ႈမႆႉ လူင် လူမ်ႉတဵင်သဵၼ်ႈတၢင်းလူင် ၼႂ်းဝဵင်းလႃႈသဵဝ်ႈ။

ၵူၼ်းမိူင်းၵေႃႉယူႇဝႆႉ ၼႂ်းဝဵင်းလႃႈသဵဝ်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ၾူၼ်လူမ်းႁႅင်းၼႃႇ။ ၶႅပ်းၾႆးသႅင်လႅတ်ႇ (သူဝ်ႇလႃႇ) ၶႅပ်းယႂ်ႇၶႅပ်းလူင် ဢၼ်တၢင်ႇဝႆႉၼိူဝ် ႁၢၼ်ႉၶၢႆၵုၼ်ႇ ၼႂ်းၵၢတ်ႇၸိူဝ်းၼၼ်ႉပိဝ်။ ၼႂ်းၵၢတ်ႇလူင်ၼႆႉယိုင်ႈၶႅၼ်းၵျၢမ်းထူၼ်ႈယဝ်ႉ။ လဵၵ်းမုင်းႁၢၼ်ႉတၢင်းၶၢႆ တီႈ (ချယ်ရီရုံ) ၸိူဝ်းၼၼ်ႉ ပေႃးပိဝ်ၵႂႃႇသဵင်ႈမူတ်း။ ငိၼ်းဝႃႈ လဵၵ်းမုင်းတၢင်း ႁၢၼ်ႉတၢင်းၶၢႆတၢင်းတႅဝ်း ၽၵ်းၶဵဝ်ၼၼ်ႉပိဝ်ၵႂႃႇပၢတ်ႇ ၺႃးၶေႃးၵူၼ်းၼႆႁႄဢေႃႈ။ မိူဝ်ႈလဵဝ် သဵၼ်ႈတၢင်းၼႂ်း ဝဵင်းလႃႈသဵဝ်ႈၼႆႉ ဢိုတ်းၶမ် ၵႂႃႇၼမ်ထူၼ်ႈယဝ်ႉ။ တၢင်းပူႇတႃႇ ၼၼ်ႉၵေႃႈ ဢမ်ႇၸၢင်ႈၵႂႃႇ ” ဝႃႈၼႆ။

ယၢမ်းလဵဝ် သဵၼ်ႈတၢင်းဢၼ်ဢမ်ႇၸၢင်ႈၵႂႃႇမႃးသေဢိတ်းၼႆႉပဵၼ်သဵၼ်ႈတၢင်းႁိမ်းသူၼ်မွၵ်ႇ၊ ယွၼ်ႉပိူဝ်ႈတူၼ်ႈမွၵ်ႇၵွၼ်လူမ်ႉတဵင်ႈတၢင်း။ မိူၼ်ၼင်ႇသဵၼ်ႈတၢင်းႁိမ်းႁၢၼ်ႉ မွင်ႇ မွင်ႇမၢၼ်ႇသႅင် ၼၼ်ႉၵေႃႈတူၼ်ႈမႆႉလူမ်ႉတဵင်တၢင်းလႄႈဢမ်ႇၸၢင်ႈၵႂႃႇမႃးသေဢိတ်း။ တၢင်းသဵၼ်ႈ ပူႇတႃႇ ႁိမ်းႁၢၼ်ႉၶဝ်ႈၽၵ်းၼၢင်းၺုၼ်ႉ တၢင်းႁိမ်းလုမ်းလူင် ၸိူဝ်းၼၼ်ႉ ၵေႃႈတူၼ်ႈမႆႉလူမ်ႉၶႂၢင်တၢင်းလႄႈဢမ်ႇၸၢင်ႈၵႂႃႇမႃး။ မေႃႈၾႆးဢၼ်မီးႁိမ်းလုမ်းသၢင်ႇသီႈၼၼ်ႉၵေႃႈလူမ်ႉ ။ သဝ်လၵ်းၾႆးၸိူဝ်းၼႆႉလူမ်ႉတင်းၼမ်- ဝႃႈၼႆ။

ၾူၼ်လူမ်းလူင်ၼႆႉၶဝ်ႈမိူဝ်ႈၶၢဝ်းယၢမ်း 2 မူင်း 15 မိၼိတ်ႉ။ ၽတ်ႉပဝ်ႇႁိုင်မွၵ်ႈၶိုင်ႈၸူဝ်ႈမူင်းၵူၺ်းသေတႃႉ လွင်ႈလူႉသုမ်းႁၢၵ်းၵၢၼ်ႉ မီးၼမ်တႄႉတႄႉ- ၵူၼ်းပိုၼ်ႉတီႈလၢတ်ႈၼင်ႇ ၼႆ။

ၾၢႆႇႁွင်ႈၵၢၼ်ပၵ်းတႃပႂ်ႉတူၺ်းငဝ်းလၢႆၾူၼ်လူမ်း ၼႂ်းမိူင်းႁူမ်ႈတုမ်တႄႉ ပိုၼ်ၽၢဝ်ႇလၢတ်ႈဝႆႉဝႃႈ – ဝၼ်းတီႈ 6/5/2026 ၼႆႉ ၶၢဝ်းတၢင်း 24 ၸူဝ်ႈမူင်း ၾူၼ်ၸၢင်ႈတူၵ်းႁႅင်း ၼႂ်းမိူင်းတႆးပတ်းပိုၼ်ႉသေ ၶၢတ်ႈလၢမ်းဝႃႈ တေႃႇထိုင်ဝၼ်းမိူဝ်ႈၽုၵ်ႈ 7/5/2026 ၵေႃႈ ၾူၼ်ၸၢင်ႈတူၵ်းယူႇ တႃႇ 80% ၼႆယဝ်ႉ။

ၼွၵ်ႈလိူဝ်ၾူၼ်တူၵ်းလူမ်းပတ်ႉႁႅင်းယဝ်ႉ ၸၢင်ႈမီးၾႃႉၽႃႇ ၾႃႉလင် ၾႃႉမႅပ်ႈ မၢၵ်ႇႁဵပ်းတူၵ်းၸွမ်းထႅင်ႈလႄႈ ၶႂ်ႈႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ၾၢင်ႉသတိဝႆႉ ႁင်းၽႂ်မၼ်း ၼႆယဝ်ႉ။

မိူဝ်ႈလိူၼ်ပူၼ်ႉမႃးၼႆၵေႃႈ ယွၼ်ႉၾူၼ်လူမ်းႁႅင်းသေ ပတ်ႉထွင်းသႂ်ႇ ၸိၵ်းၸွမ်ထီးၵွင်းမူးၵဝ်ႇၵႄႇ ၼႂ်းၸႄႈဝဵင်းသီႇပေႃႉ ၵူတ်ႇပင်းတူၵ်းလူင်းမႃးလႄႈ မီးလွင်ႈလူႉသုမ်းၵႂႃႇတင်း ၼမ် ၼႆယဝ်ႉ။

ၾၢႆႇပၵ်းတႃပႂ်ႉတူၺ်းၾိင်ႈၾႃႉပိုၼ်ၽၢဝ်ႇပၼ်ၾၢင်ႉဝႆႉဝႃႈ ဝူင်ႈဝၢင်ႈၼႆႉ မိူင်းတႆးပတ်းပိုၼ်ႉ၊ မိူင်းၶၢင်၊ မိူင်းၶျၢင်း၊ တိူင်းၸႄႈၵႅင်းတွၼ်ႈၼိူဝ်၊ တိူင်းတႃႈလိူဝ်ႇ၊ တိူင်းပႃႇၵိူဝ်၊ မိူင်းမွၼ်း ၸိူဝ်းၼႆႉ တေမီးၾူၼ်လူင် မၢၵ်ႇႁဵပ်းတူၵ်း၊ ၾႃႉလင် ၾႃႉၽႃႇၸွမ်းလႄႈ ႁႂ်ႈၵူၼ်းၸိူဝ်းယူႇၸွမ်းတူၼ်းႁူၺ်ႈ ႁၢဝ်းသၼ်လွႆ ၊ ၸိူဝ်းယူႇတႂ်ႈပၢႆႉယႂ်ႇ လႄႈ ႁိမ်းတူၼ်ႈမႆႉယႂ်ႇၸိူဝ်းၼႆႉ ဢွၼ်ၵၼ်ၾၢင်ႉ ႁၢင်ႈႁႅၼ်းတူဝ် တႃႇႁႂ်ႈယူႇလွတ်ႈၽေး သၽႃႇဝ ၼႆယဝ်ႉ။