ႁူဝ်လိူၼ်မေႊမႃးၼႆႉ လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇၽႅၼ်ၵၢၼ်လွင်ႈတူင်ႉၼိုင် ၸုမ်းလူင်ပွင်ၸိုင်ႈ ၼႂ်းၶၢဝ်းတၢင်း 100 ဝၼ်းယဝ်ႉ ၶႃႈႁၢပ်ႇၵၢၼ်ၶုၼ် ၼႂ်းႁွင်ႈ ၵၢၼ်လူင်ပွင်ၸိုင်ႈ တီႈဝဵင်းလႃႈသဵဝ်ႈ တႄႇလူင်းပိုၼ်ႉတီႈ တူင်ႉၼိုင်ႁဵတ်းသၢင်ႈၵၢၼ်ငၢၼ်းၵႂႃႇ မိူၼ်ၼင်ႇပႂ်ႉၵူတ်ႇထတ်း ရူတ်ႉၵႃး ၶူဝ်းၵုၼ်ႇ လႄႈ ၵဵပ်းသဵၼ်ႈမၢႆႁူဝ်ၼပ်ႉၵူၼ်း ႁဵတ်းမၢႆၾၢင်ပၼ်ၵူၼ်းၼႂ်းပိုၼ်ႉတီႈၵႂႃႇ ၼႆယဝ်ႉ။

ဝၢႆးလင်တၢင်းမိူင်းတႆးပွတ်းႁွင်ႇ ပဵၼ်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉသေ ၸုမ်းသိုၵ်းမၢၼ်ႈ လႆႈတၢင်းၵမ်ႉၸွႆႈမိူင်းၶႄႇယဝ်ႉ ၶဝ်ႈၵုမ်းၵမ်ဢဝ်ၶိုၼ်းလႆႈ ၼႂ်းဝဵင်းလႃႈ သဵဝ်ႈၼၼ်ႉ လွင်ႈၽူႈလၵ်ႉၸၵ်ႉၶုတ်ႈ ၵၢၼ်တီႉၺွပ်းၸဝ်ႈႁၢၼ်ႉၶၢႆၵုၼ်ႇၵႂႃႇယွၼ်းငိုၼ်းၵႃႈထုတ်ႇတူဝ် လႄႈ ဢဝ်ၵွင်ႈယိုဝ်းၵၼ်တၢႆၼႂ်းၵၢင်ဝဵင်း ၸိူဝ်းၼႆႉၵေႃႈ ၵမ်းၵမ်းၵိူတ်ႇပဵၼ် မီးလိူင်ႈဢမ်ႇလီပဵၼ်ယူႇၵူႈမိုဝ်ႉၵူႈဝၼ်း ၾၢႆႇၸဝ်ႈၼႃႈတီႈပလိၵ်ႈ လႄႈ ၸုမ်းသိုၵ်းမၢၼ်ႈ ဢမ်ႇတွၼ်ႉတီႉၺွပ်းဢဝ်လႆႈ ၽူႈမီးတၢင်းၽိတ်းတေႉတေႉ။

လိူဝ်ၼၼ်ႉ ယွၼ်ႉၽႅၼ်ၵၢၼ်လွင်ႈတူင်ႉၼိုင် ၸုမ်းလူင်ပွင်ၸိုင်ႈသိုၵ်း ၼႂ်းၶၢဝ်းတၢင်း 100 ဝၼ်းၼၼ်ႉသေ ယၢမ်းလဵဝ် ၸဝ်ႈၼႃႈတီႈပလိၵ်ႈ ႁူမ်ႈၵၼ်တင်း သိုၵ်းမၢၼ်ႈ ပႂ်ႉၵူတ်ႇ ထတ်းရူတ်ႉၵႃးၸိူဝ်းဢမ်ႇမီးလၢႆႇၸိၼ်ႇ လႄႈ ၵူၼ်းၶီႇရူတ်ႉၶိူင်ႈၸိူဝ်းဢမ်ႇတိုဝ်းမၢၵ်ႇႁူဝ် ဢမ်ႇႁဵတ်းၸွမ်းပိူင်ရူတ်ႉၵႃးၼၼ်ႉ တီႈၸွမ်းသဵၼ်ႈတၢင်း လႄႈ ၵၢင်ဝဵင်းၸိူဝ်းမီးၵူၼ်းၵႂႃႇမႃးၼမ်ၼၼ်ႉယူႇ ၼႆယဝ်ႉ။

ၵူၼ်းမိူင်းပိုၼ်ႉတီႈ ၵေႃႉယူႇဝႆႉၼႂ်းဝဵင်းလႃႈသဵဝ်ႈၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “မိူဝ်ႈလဵဝ် တီႈဝဵင်းလႃႈသဵဝ်ႈၼႆႉ ၶဝ်ၵႆႉပႂ်ႉတီႉၺွပ်း ရူတ်ႉၵႃး ၸိူဝ်းဢမ်ႇမီးလၢႆႇၸိၼ်ႇ လႄႈ ၵႃးတၢင်ႇၵုၼ်ႇၶူဝ်းမိူင်းၶႄႇ ၸိူဝ်းၶဝ်ႈမႃးၼႂ်းဝဵင်းၼၼ်ႉ။ ၵူၼ်းၶီႇရူတ်ႉၶိူင်ႈၵေႃႈ ပေႃးဢမ်ႇတိုဝ်းမၢၵ်ႇႁူဝ် ဢမ်ႇသႂ်ႇၶႅပ်းမၢႆရူတ်ႉၸိုင် ၶဝ်ႁေႉႁႄတီႉၺွပ်း ႁွင်ႉၵႂႃႇတီႈလုမ်း ယွၼ်းၵိၼ်ငိုၼ်း။ ပေႃးဢမ်ႇပႆႇပၼ်ငိုၼ်းၶဝ် ၶဝ်ပႆႇပွႆႇမႃးပၼ်ၶိုၼ်း ” ဝႃႈၼႆ။

ၽွင်းသိုၵ်းမၢၼ်ႈယိုတ်းမိူင်း လႆႈၶွတ်ႇၽွတ်ႈပဵၼ်ၸုမ်းလူင်ပွင်ၸိုင်ႈပဵၼ်တၢင်းၵၢၼ်ယဝ်ႉဢမ်ႇႁိုင် ပိုၼ်ၽၢဝ်ႇ ဢွၵ်ႇမႃးၽႅၼ်ၵၢၼ်ဢၼ်ၶဝ်လူဝ်ႇႁဵတ်းသၢင်ႈ ၼႂ်းၶၢဝ်းတၢင်း 100 ဝၼ်းၼၼ်ႉယဝ်ႉ ယၢမ်းလဵဝ် တႄႇလူင်းပိုၼ်ႉတီႈ ႁဵတ်းပၼ်မၢႆၾၢင်ၵူၼ်းမိူင်းၼႂ်းပိုၼ်ႉတီႈသေ ၵူတ်ႇထတ်းၵဵပ်းသဵၼ်ႈမၢႆႁူဝ်ၼပ်ႉၵူၼ်းၶိုၼ်းယူႇ ၼႆယဝ်ႉ။

ၼၢင်းယိင်းၵေႃႉယူႇဝႆႉၼႂ်းဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈတႄႇတႄႉၶဝ်လၢတ်ႈဝႃႈ တေႁဵတ်းပၼ်လၢႆလၢႆၼႆလႄႈ ႁဝ်းၶဝ်ၵေႃႈ ႁွင်ႉလုၵ်ႈလၢင်းႁဝ်းၵႂႃႇ ႁဵတ်း။ ၽိူဝ်ႇၵႂႃႇႁဵတ်း သမ်ႉလႆႈပၼ်ငိုၼ်း ၵမ်ႉဝႃႈယွၼ်းၵႃႈဢၼ်ၼၼ်ႉဝႃႇ ဢၼ်ၼႆႉဝႃႇၼႆႁႄ တေႃႇပေႃးယဝ်ႉၼႆႉ ၼိုင်ႈၵေႃႉသဵင်ႈၵႂႃႇငိုၼ်းယူႇၸမ် 2 သႅၼ်ပျႃးၸိူဝ်းၼႆႉဢေႃႈ” ဝႃႈၼႆ။

လႆႈႁူႉဝႃႈ ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ ၶႃႈႁၢပ်ႇၵၢၼ်ၶုၼ် ၸိူဝ်းယူႇတႂ်ႈဢႃႇၼႃႇလူင်ပွင်ၸိုင်ႈသိုၵ်းမၢၼ်ႈ ႁႃလၢႆးတၢင်းယွၼ်းငိုၼ်းၵူၼ်းမိူင်းၵူႈလၢႆးတၢင်း။ မိူၼ်ၼင်ႇ ၵဵပ်းၵႃႈ ၾႆးၽိူမ်ႉၼမ်လိူဝ် ပိူင်ဢၼ်တေလႆႈၵဵပ်း၊ ၵဵပ်းၵႃႈႁဵတ်းမၢႆၾၢင် ဢၼ်ၶႃႈႁၢပ်ႇၵၢၼ်ၶုၼ် တေလႆႈႁဵတ်းပၼ်ၵူၼ်းမိူင်းလၢႆလၢႆ လူၺ်ႈဢမ်ႇလူဝ်ႇသဵင်ႈငိုၼ်းတွင်းၼၼ်ႉႁၢဝ်ႈႁႅင်းယူႇ ၼႆယဝ်ႉ။

ဝဵင်းလႃႈသဵဝ်ႈၼႆႉ ယွၼ်ႉလူင်ပွင်ၸိုင်ႈမိူင်းၶႄႇ ၶဝ်ႈယူႇၵၢင်ႁဵတ်းၶဵဝ်ပၼ်သေ သိုၵ်းမၢၼ်ႈလႆႈၶဝ်ႈၵုမ်းၵမ် ပၼ်ႇၵၢၼ်ၽွင်းငမ်းၶိုၼ်းလႆႈ မိူဝ်ႈလိူၼ်ဢေႇပရႄႊလ် ဝၼ်းတီႈ 22 ပီ 2025 ၼၼ်ႉသေ ၸုမ်းသိုၵ်းၵဝ်ႈၵၢင်ႉ လႆႈထွႆႁႅင်းသိုၵ်းႁႅင်းၵူၼ်းဢွၵ်ႇၵႂႃႇယူႇဝႆႉ ႁွပ်ႈႁွပ်ႈဝဵင်းလႃႈသဵဝ်ႈ ပၼ်ႇၵၢၼ်ၽွင်းငမ်းဝႆႉ ႁၢၼ်ႉတေႃႇထိုင်ယၢမ်းလဵဝ်။