မိူင်းၵူၼ်းလူင်ၼႆႉ တူဝ်တၢႆၵေႃႈၸိုဝ်ႈဢမ်ႇႁၢႆ တိုၵ်ႉသိုပ်ႇလၢမ်းမီးၵိုၵ်းပိုၼ်းဝႆႉၸူဝ်ႈလုၵ်ႈပၢၼ်လၢၼ်ယူႇ။ တေၶႂ်ႈၵိုၵ်းပိုၼ်းလီႁႃႉပိုၼ်းႁၢႆႉတႄႉ ယူႇတီႈတၢင်းႁဵတ်းတၢင်းသၢင်ႈၸဝ်ႈၵဝ်ႇ  ။ ၵမ်ႈၼမ် သင်ပဵၼ်ၵူၼ်းႁဵတ်းၽွၼ်းပၢင်ႈပၼ်ပုၼ်ႈၵူၼ်းၼမ် တူဝ်တၢႆၵေႃႈ ဢမ်ႇဢမ်ႇၼဝ်ႈ ။ မိူၼ်ၼင်ႇ ဝၼ်းတီႈ19/4/2026  ၼႆႉၵေႃႈ ၸဝ်ႈသိုၵ်း သုဝုၼ်ႇၼ ၵေႃႉဢၼ်ယၢမ်ႈႁၢပ်ႇၵၢၼ်တႃႇၸိူဝ်ႉၶိူဝ်းမႃးပၢၼ်သိုပ်ႇပၢၼ်ၼႆႉၵေႃႈ လူႉသဵင်ႈယဝ်ႉၼႆလႄႈ ၵူၼ်းႁူႉလွင်ႈမၼ်းၸဝ်ႈလၢတ်ႈဝႃႈ မၼ်းၸဝ်ႈၵေႃႈ ပဵၼ်ၵူၼ်းဢၼ်ဢမ်ႇၵိုင်ႇလီလိုမ်းလႆႈမိူၼ်ၵၼ်ဝႃႈၼႆ ။

လွင်ႈၵိူတ်ႇထဝ်ႈပဵၼ်တၢႆၼႆႉ ဢမ်ႇလွတ်ႈၽႂ် ။ တူဝ်ၶၼ်ႇထႃႇၵူၼ်းႁဝ်းၵေႃႈ ပဵၼ်ပဵၼ်လူႉလူႉ ၸွမ်းၶၢဝ်းယၢမ်း ဢၼ်လႅၵ်ႈလၢႆႈယူႇ 24 ၸူဝ်ႈမူင်း ။

 ဝၼ်းလိူၼ်ပီၶၢႆႉလၢႆႈၸူးဢၼ်မႂ်ႇယူႇတိၵ်းတိၵ်းသေတႃႉ ၸၢတ်ႈပၢၼ်ၽဝၵူၼ်းတႄႉ ယိင်ႈယူႇယိင်ႈၵဝ်ႇသဝ်ႈ တၵ်းလႆႈတၢႆပဵၼ်တူဝ်တူႇတူဝ်ၼဝ်ႈဢမ်ႇႁၢင်ႉ ။ ၵူၺ်းၵႃႈ ဢိင်ၼိူဝ် ပိုၼ်းဝၼ်းလင်ၸဝ်ႈၵဝ်ႇၶဵၼ်ႇႁဵတ်းဝႆႉၼၼ်ႉသေ ၵူၼ်းႁုၼ်ႈလင် တေသိုပ်ႇတွင်းမၢႆၵႂႃႇ ။

မိူဝ်ႈလဵဝ်ၵေႃႈၼင်ႇၼၼ် ၵေႃႉဢၼ်ယၢမ်ႈႁၢပ်ႇႁၢမ်ႈၵၢၼ်ၸိူဝ်ႉၸၢတ်ႈမႃး ပီယၢဝ်းၶၢဝ်းႁိုင်ၼၼ်ႉ လူႉသဵင်ႈသုတ်းမုၼ် ။ ၸိုဝ်ႈမၼ်းၸဝ်ႈ ႁွင်ႉဝႃႈ ၸဝ်ႈသိုၵ်း သုဝုၼ်ႇၼ လူႉၵႂႃႇမိူဝ်ႈဝၼ်းတီႈ 19/4/2026 ယၢမ်းၵၢင်ၼႂ် 2 မူင်း   မိူဝ်ႈဢႃယုလႆႈ 86 ပီ ။

ပၢင်ၸႃႇပၼ မၼ်းၸဝ်ႈ ၸတ်းဝႆႉ  တီႈဝၢၼ်ႈပဵင်းလူင် ဢိူင်ႇပဵင်းလူင် ၸႄႈဝဵင်းဝဵင်းႁႅင် ၸႄႈတွတ်ႈၵဵင်းမႂ်ႇ ၸိုင်ႈထႆး ။

ၸဝ်ႈသိုၵ်း သုဝုၼ်ႇၼၼႆႉ ၵိူတ်ႇႁၼ်ၼႃႈမႃး မိူဝ်ႈဝၼ်းတီႈ 13/12/1940 တီႈမိူင်းၸဝ်ႈၾႃႉတွင်ႇပႅင်ႇ ၊ မိူင်းႁူမ်ႈတုမ်ၸိုင်ႈတႆး  ။ ၸိုဝ်ႈပေႃႈ လုင်းပၺ်ႇၺႃႇ ၊ ၸိုဝ်ႈမႄႈ ပႃႈသူၺ်ႇ ၵူၼ်းဝၢၼ်ႈၵုင်းလူင် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ။

 ၸဝ်ႈသုဝုၼ်ႇၼၼႆႉ  တႄႇႁၢပ်ႇၵၢၼ်လုၵ်ႉၽိုၼ်ႉ မႃးၸဵမ်မိူဝ်ႈ ဝၼ်းတီႈ 1/6/1960 တီႈ တပ်ႉၽွမ်ႉႁူမ်ႈ SNUF ဢၼ် ၸဝ်ႈၵွၼ်းၸိူင်း ဢွၼ်ႁူဝ်။

တေႃႇထိုင် 1970 ၼႆႉ ၵၢၼ်ၵဵပ်းသိုၵ်းပႆႇမီး ၵူၼ်းၸိူဝ်းဢၼ် ၶဝ်ႈႁၢပ်ႇၵၢၼ်သိုၵ်းၽွင်းပၢၼ်ၼၼ်ႉ မီးၼမ်ႉၸႂ်ႁၵ်ႉၸိူဝ်ႉႁၵ်ႉၸၢတ်ႈၸႅတ်ႈၸၢင်ႇ ။ ၵမ်ႈၼမ်ၶႂ်ႈၸဵဝ်းပူၼ်ႉလွတ်ႈပၢၼ်ၶီႈၶႃႈသိုၵ်းမၢၼ်ႈ ၼႆ ပေႃႈၶူးပၢႆးမိူင်း ဢၼ်ပၵ်းသဝ်းယူႇတီႈ ပဵင်းလူင် ၼၼ်ႉ လၢတ်ႈၼႄၼင်ႇၼႆ-

ဢၼ်ဢဝ်ၸေႇတၼႃႇသေမႃးႁဵတ်းၼႆႉ လွင်ႈႁၵ်းလင်ၵၼ်ဢမ်ႇမီးသေပွၵ်ႈ ။ၵႂၢမ်းသႅတ်ႉၸႃႇဢၼ်ဝႃႈၼႆႉ ၶဝ်တိုၼ်းဢမ်ႇယႃႉပႅတ်ႈသေပွၵ်ႈ ။ ဢမ်ႇယွမ်းပၢႆႈ ဢမ်ႇလၵ်ႉပၢႆႈ ဢမ်ႇယွၼ်းပေႃး ။ ပဵၼ်သင်မႃးၵေႃႈၶၢမ်ႇ ။ ဢၼ်ၶၢမ်ႇၼၼ်ႉသမ်ႉဝႃႈ ဢဝ်ဢသၢၵ်ႈမၼ်းလႅၵ်ႈဢဝ်တႃႇမိူင်းတႆးၵွၼ်းၶေႃ တေႃႇထိုင်ဢသၢၵ်ႈပေႃးသဵင်ႈၼႆယဝ်ႉၼႃႇ ။ ၵွပ်ႈပိူဝ်ႈၼၼ်လႄႈ တိုၼ်းဢမ်ႇလႆႈၼွင်ႇတႃႉသင်ၵူၼ်းၵဝ်ႇၵူၼ်းမွၼ်ၸိူဝ်းၼႆႉ  

ၵူၼ်းႁုၼ်ႈလင်ၸိူဝ်းဢၼ်ယၢမ်ႈႁၢပ်ႇႁၢမ်ၵၢၼ်မႃး ၼႆႉ ယၢမ်ႈဢဝ်ၸေႇတၼႃႇသေႁဵတ်းၵၢၼ်တႃႇၸိူဝ်ႉၸၢတ်ႈဝၢၼ်ႈမိူင်းမႃးလႄႈ ပဵၼ်သင်မႃးၵေႃႈ ၶဝ်ဢမ်ႇတွၼ်ႉႁူၼ်လင် ၊ ၸင်ႇၼၼ်လႄႈ ၶႂ်ႈႁႂ်ႈၵူၼ်းၸိူဝ်းမႃးႁုၼ်ႈလင် ဢဝ်ပဵၼ်တွၼ်ႈသွၼ်တီႈၵူၼ်းႁုၼ်ႈၵဝ်ႇ ၼႆ ပေႃးၶူးပၢႆးမိူင်း သိုပ်ႇလၢတ်ႈၼင်ႇၼႆ ။

ၸပ်းၸွမ်းႁွမ်းပႆ ၸဝ်ႈၵွၼ်းၸိူင်း ၼႂ်းတပ်ႉသိုၵ်းၽွမ်ႉႁူမ်ႈလုၵ်ႉၽိုၼ့် ၸိုင်ႈတႆး (SURA) ၶွင်ႇသီႇၸိုင်ႈတႆးလုၵ်ႉၽိုၼ်ႉ (TRC/SSRC)။

ၼႃႈၵၢၼ်ဢၼ်မၼ်းၸဝ်ႈ လႆႈႁၢပ်ႇႁၢမ်မႃး – မေႃယႃသိုၵ်း ၊  ၸဝ်ႈၼႃႈတီႈဢုပ်ႉပိူင်ႇၽွင်းငမ်း ။ ၽူႈၸတ်းၵၢၼ်

ႁွင်ႈၵၢၼ်လူင်မၢႆ (5) ။

ယၢမ်ႈၶဝ်ႈပၢင်တိုၵ်း တိုၵ်းတေႃး တပ်ႉသိုၵ်းမၢၼ်ႈ ဢိၵ်ႇၶွမ်ႇမိဝ်ႇၼိတ်ႉမႃးလၢႆပၢင် ။

မၼ်းၸဝ်ႈတႄႇ ၼႃႈႁိူၼ်းၸွမ်း  ၼၢင်းလူင်ႇ (ယၢမ်းလဵဝ် ဢႃယု 70) ပဵၼ် ၵူၼ်းဝၢၼ်ႈပၢင်ႇသႃႇ၊ ၼွင်လႅဝ်၊ ၸႄႈဝဵင်းမိူင်းၵိုင်။

မၼ်းၸဝ်ႈ သဵင်ႈၵၢမ်ႇသုတ်းမုၼ်ၵႂႃႇလူၺ်ႈတၢင်းပဵၼ်ၵူၼ်းထဝ်ႈ မိူဝ်ႈဝၼ်းတီႈ 19/4/2026 ယၢမ်းၵၢင်ၼႂ် 2 မူင်း   မိူဝ်ႈဢႃယုလႆႈ 86 ပီ ။ ၸတ်းပၢင်ၸႃႇပၼ မၼ်းၸဝ်ႈ  တီႈဝၢၼ်ႈပဵင်းလူင် ဢိူင်ႇပဵင်းလူင် ၸႄႈဝဵင်းဝဵင်းႁႅင် ၸႄႈတွတ်ႈၵဵင်းမႂ်ႇ ၸိုင်ႈထႆး ။

ပူၼ်ႉၶၢပ်ႈတူဝ် ၼႂ်းဝၼ်းတီႈ 21/04/2026 ၼႆႉ ။

ယွၼ်းသူးႁႂ်ႈ ဝိၺိၼ်ႇၶႂၢၼ်ငဝ်း ၸဝ်ႈသိုၵ်းသုဝုၼ်ႇၼ ႁွတ်ႈသူႇသုၵတိ တီႈၵတ်းယဵၼ်သေၵမ်းလူၺ်ႈ …………… ။