ၵူၼ်းၸၢႆး 4 ၵေႃႉ ၸိူဝ်းၽိတ်းမေႃးၵၼ်တင်း ပေႃႈလဵင်ႉၼၢႆးၸၢင်ႈ လွင်ႈငိုၼ်းလိူၼ်သေ ၶႃႈႁႅမ်တၢႆပႅတ်ႈ ပေႃႈလဵင်ႉၼၢႆးၸၢင်ႈၶဝ်ၶိုၼ်း တီႈၸႄႈဝဵင်းမႄႈလိမ်း ဝဵင်းၵဵင်းမႂ်ႇ ၸိုင်ႈထႆး ၼၼ်ႉ ယၢမ်းလဵဝ် ၸဝ်ႈၼႃႈတီႈ ပလိၵ်ႈထႆးၶဝ် တီႉၺွပ်းၵုမ်းၶင်တူဝ်လႆႈဝႆႉယဝ်ႉ ဝႃႈၼႆ။

မိူဝ်ႈဝၼ်းတီႈ 2/5/2026 ၸဝ်ႈၼႃႈတီႈပလိၵ်ႈထႆးၶဝ် တီႉၺွပ်းဢဝ်လႆႈ ၵူၼ်းမိူင်းမၢၼ်ႈ 4 ၵေႃႉ ၸိူဝ်းပူၼ်ႉပႅၼ်တၢင်းၽိတ်း ၶႃႈႁႅမ်ၵူၼ်းတၢႆ ၽွင်းတိုၵ်ႉႁၢင်ႈႁႅၼ်း တေၶၢမ်ႈလႅၼ်လိၼ်ၵႂႃႇတၢင်း မိူင်းမၢၼ်ႈၼၼ်ႉၼႆ သိုဝ်ႇၶၢဝ်ႇထႆး ႁၢႆးငၢၼ်းဝႆႉၼင်ႇၼႆ။

ၵဵဝ်ႇလူၺ်ႈလွင်ႈၼႆႉသေ ၾၢႆႇၸဝ်ႈၼႃႈတီႈပလိၵ်ႈထႆး ပိုတ်ႇပၢၵ်ႇလၢတ်ႈပဵၼ်တၢင်းၵၢၼ်ဝႃႈ – ၵူၼ်းၸၢႆး သွင်ၵေႃႉၼၼ်ႉ ဢဝ်မိတ်ႈတႅင်းသႂ်ႇ ပေႃႈလဵင်ႉၼၢႆးၸၢင်ႈ ၸိုဝ်ႈႁွင်ႉသူမ်သျၢႆး ၽွင်းမၼ်းၸၢႆးတိုၵ်ႉၼွၼ်းလပ်းယူႇၼၼ်ႉသေ ထႅင်ႈသွင်ၵေႃႉတႄႉၵေႃႈ ပဵၼ်ၵူၼ်းၵေႃႉပႂ်ႉတူၺ်းသဵၼ်ႈ တၢင်းပၼ်။ ဝၢႆးလင်ၼၼ်ႉ ၵူၼ်းၸၢႆး 4 ၵေႃႉ ၸင်ႇပၢႆႈဢွၵ်ႇၼႂ်းၵၢၼ် ၵႂႃႇတင်းသဵင်ႈ – ၼႆယဝ်ႉ။

ၵူၼ်းၸၢႆး 4 ၵေႃႉ ၸိူဝ်းပူၼ်ႉပႅၼ်ၶႃႈႁႅမ်တၢႆ ပေႃႈလဵင်ႉၼၢႆးၸၢင်ႈၸဝ်ႈၵဝ်ႇၼၼ်ႉ ပဵၼ်ၸၢဝ်းၶိူဝ်းတႆး သႅၼ်း ဢႃႇယု 49 ပီ လႆႈၶႃႈႁႅမ်ပေႃႈလဵင်ႉၼၢႆးၸၢင်ႈၶဝ်တၢႆ ယွၼ်ႉထဵင်မေႃး ၵၼ် လွင်ႈငိုၼ်းၵႃႈၸၢင်ႈ ငိုၼ်းလိူၼ်ၸိူဝ်းၼႆႉသေ ယွမ်းႁပ်ႉတၢင်းၽိတ်း တီႈၸဝ်ႈၼႃႈတီႈပလိၵ်ႈထႆးၶဝ်ဝႃႈ လႆႈၶႃႈႁႅမ်ပေႃႈလဵင်ႉၼၢႆးၸၢင်ႈၶဝ်တၢႆတေႉတေႉယူႇၼႆ သိုဝ်ႇၶၢဝ်ႇထႆးရတ်ႉ ႁၢႆးငၢၼ်းဢွၵ်ႇဝႆႉ။

ယၢမ်းလဵဝ် ၵူၼ်းၸိူဝ်းမီးတၢင်းၽိတ်းၶႃႈႁႅမ်ၵူၼ်းတၢႆၼၼ်ႉ ထုၵ်ႇတီႉၺွပ်းၵုမ်းၶင်တူဝ်ဝႆႉ တီႈႁူင်းပလိၵ်ႈမႄႈလိမ်းသေ ထုၵ်ႇပိုတ်ႇလိူင်ႈဢဝ်တၢင်းၽိတ်းဝႆႉ ဝႃႈၼႆ။