ဝၼ်းတီႈ 02/09/2025 ယၢမ်းၵၢင်ၶမ်ႈ ႁွင်ႈၵၢၼ် ၾၢႆႇၵူတ်ႇထတ်းၵူၼ်းၶဝ်ႈဢွၵ်ႇမိူင်း (JIM) မိူင်းမလေးသျႃး တီႉၺွပ်းႁႅင်းၵၢၼ်ယၢၼ်မိူင်း ၸိူဝ်းဢမ်ႇမီးဝတ်းဝႂ် 770 ၵေႃႉ တီႈ Bukit Bintang ဝဵင်းၵူဝ်ႊလူဝ်ႊလမ်ႊပူဝ်ႊ ၼႂ်းၼၼ်ႉ ပႃးၵူၼ်းမိူင်းမၢၼ်ႈ 235 ၵေႃႉ ဝႃႈၼႆ။
ႁွင်ႈၵၢၼ် ၾၢႆႇၵူတ်ႇထတ်းၵူၼ်းၶဝ်ႈဢွၵ်ႇမိူင်း မိူင်းမလေးသျႃး ပိုၼ်ၽၢဝ်ႇဝႆႉဝႃႈ – ၼႂ်းဝၼ်းတီႈ 2 ယၢမ်းၵၢင်ၶမ်ႈ 7 မူင်းၶိုင်ႈထိုင် 9 မူင်းၶိုင်ႈၼၼ်ႉ လႆႈတႄႇၽႅၼ်ၵၢၼ် “Ops Belanja” ၽူႈမီးပုၼ်ႈၽွၼ်း 106 ၵေႃႉ လႆႈၵူတ်ႇထတ်းၵူၼ်းၼွၵ်ႈမိူင်း 1,600 ၵေႃႉ၊ ၵူၼ်းပိုၼ်ႉတီႈ 845 ၵေႃႉ ႁူမ်ႈသဵင်ႈ 2,445 ၵေႃႉ။ ၼႂ်းၼၼ်ႉ ၵူတ်ႇထတ်းႁႅင်းၵၢၼ်ယၢၼ်မိူင်း ၸိူဝ်းယူႇသဝ်းဢမ်ႇမႅၼ်ႈၸွမ်းပၵ်းပိူင် ၼႂ်းၵႄႈဢႃယု 21 – 65 ပီ 770 ၵေႃႉ – ဝႃႈၼႆ။
ၵူၼ်းၸိူဝ်းၺႃးတီႉၺွပ်းၼၼ်ႉ ပဵၼ်ၵူၼ်းမိူင်းပင်းၵလႃးတဵတ်ႉၶျ် 377 ၵေႃႉ၊ ၵူၼ်းမိူင်းမၢၼ်ႈ 235 ၵေႃႉ၊ ၵူၼ်းမိူင်းၼီႇပေႃး 72 ၵေႃႉ၊ ၵူၼ်းမိူင်းဢိၼ်ႊတီႊယိူဝ်ႊ 58 ၵေႃႉ၊ ၵူၼ်းမိူင်းဢိၼ်ႊတူဝ်ႊ ၼီႊသျႃး 19 ၵေႃႉလႄႈ ၵူၼ်းတၢင်ႇၸိုင်ႈမိူင်း ၵမ်ႈၽွင်ႈ။
ၸိူဝ်းၺႃးတီႉၺွပ်းဝႆႉၼၼ်ႉ ၽူႈမီးပုၼ်ႈၽွၼ်းၶဝ် တေသိုပ်ႇၵူတ်ႇထတ်း ဢဝ်လိူင်ႈၵႂႃႇၸွမ်းၼင်ႇ ပၵ်းပိူင်မၢႆမီႈ ၵူၼ်းၶဝ်ႈဢွၵ်ႇမိူင်းမီးဝႆႉၼၼ်ႉ – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ