ၵူၼ်းမိူင်းႁူမ်ႈတုမ်ဢၼ်ၵႂႃႇႁဵၼ်းၵၢၼ်ၼွၵ်ႈမိူင်းသေ ယွၼ်းၶႂၢင်ႉပွၵ်ႈဢႅဝ်ႇၶိုၼ်းႁိူၼ်း ၽွင်းၶၢဝ်းလိူၼ်ႁႃႈသွၼ်းၼမ်ႉၼၼ်ႉ ဝၢႆးသွၼ်းၼမ်ႉယဝ်ႉၵေႃႈ ယၢပ်ႇၽိုတ်ႇတႃႇၵႂႃႇၶဝ်ႈႁၢပ်ႇၼႃႈၵၢၼ်ၶိုၼ်း ၶၢင်ႉၶမ်ဝႆႉတီႈၶူင်ႇႁိူဝ်းမိၼ်ဝဵင်းတႃႈၵုင်ႈ ၊ တႃႇဢွၵ်ႇၵႂႃႇၶိုၼ်းၼႆႉ လႆႈပၼ်ငိုၼ်းၼပ်ႉႁူဝ်သိပ်းသႅၼ်ပျႃးဝႃႈၼႆ။

ၵူၼ်းတေဢွၵ်ႇမိူင်း တႃႇၵႂႃႇၶဝ်ႈၵၢၼ်ၶိုၼ်းၼၼ်ႉ တီႈတႃႈႁိူဝ်းမိၼ်တႃႈၵုင်ႈၵူတ်ႇထတ်းထဵတ်ႈထၢမ်လၢႆလွင်ႈလၢႆတၢင်း- မိူၼ်ၼင်ႇ – ၼႃႈၵၢၼ်ဢၼ်ႁဵတ်းယူႇၼၼ်ႉဢမ်ႇၸႂ်ႈတီႈလဵဝ်ၵၼ်တင်း ၸိုဝ်ႈပေႃႈလဵင်ႉဢၼ်ပႃးၼႂ်းဝႂ်ႁဵတ်းၵၢၼ် OWIC ၊ တေလႆႈယွၼ်းဝႂ်ၵမ်ႉတီႈလုမ်းတၢင်မၢၼ်ႈဢၼ်ၵႂႃႇပၵ်းဝႆႉတီႈၸိုင်ႈမိူင်းဢၼ်ၸဝ်ႈၵဝ်ႇၵႂႃႇႁဵတ်းၵၢၼ်- ၸဵမ်ၸိူဝ်းၼႆႉ။ လွင်ႈၼႆႉသိုၵ်းမၢၼ်ႈဢွၵ်ႇၶေႃႈပိုၼ်ၽၢဝ်ႇဝႆႉမိူဝ်ႈဝႃး ဝၼ်းတီႈ 28/04/2026 ။

သင်ဝႃႈ မီးတၢင်းယၢပ်ႇၽိုတ်ႇ- ၵူၺ်းၵႃႈသမ်ႉတၵ်းတေလႆႈဢွၵ်ႇၵႂႃႇႁဵတ်းၵၢၼ်ၶိုၼ်းၸိုင် ၽူႈႁၢပ်ႇၵၢၼ်တီႈတႃႈႁိူဝ်းမိၼ်ၶဝ် ထၢမ်ၶၢႆပၼ် VIP Pass။ ယွၼ်းငိုၼ်း  30 ထိုင်  60 သႅၼ်ပျႃးၸိူဝ်းၼႆႉ။

ၶႂ်ႈဝႃႈမီးၽိုၼ်လိၵ်ႈၽိုၼ်လၢႆး ဢၼ်တၢင်းမိူင်းၼွၵ်ႈသူင်ႇမႃးၵႃႈႁိုဝ်ၵေႃႈယဝ်ႉ ပေႃးဢမ်ႇသိုဝ်ႉ VIP Pass တိုၼ်းဢမ်ႇပၼ်ဢွၵ်ႇ ၵူၼ်းၼုမ်ႇဢၼ်ၶၢင်ႉၶမ်ဝႆႉတီႈၶူင်ႇႁိူဝ်းမိၼ်တႃႈၵုင်ႈလၢတ်ႈၼင်ႇၼႆ။

ယူႇတီႈသိုၵ်းမၢၼ်ႈယိုတ်းမိူင်းသေ ပိုၼ်ၽၢဝ်ႇဝႆႉမိူဝ်ႈႁူဝ်ပီ 2026 ၼႆႉဝႃႈ – ၵူၼ်းၵႂႃႇႁဵတ်းၵၢၼ်ၼွၵ်ႈမိူင်းၸိူဝ်းၼႆႉ သင်ပွၵ်ႈမႃးဢႅဝ်ႇႁိူၼ်းယေးသေ တေဢွၵ်ႇၵႂႃႇႁဵတ်းၵၢၼ်ၶိုၼ်းၸိုင် တၵ်းတေလႆႈယိုၼ်ႈတၢင်ႇလၢႆးငၢၼ်းတီႈ ႁွင်ႈၵၢၼ်ၽွင်းလူင်ၾၢႆႇႁႅင်းၵၢၼ် ၼႂ်းမိူင်းမၢၼ်ႈသေ ယွၼ်းဝႂ်ဢၼုယၢတ်ႈဢွၵ်ႇၵႂႃႇႁဵတ်းၵၢၼ်ၶိုၼ်း။  ႁွင်ႈၵၢၼ်ၽွင်းလူင်ႁႅင်းၵၢၼ် ပၼ်ဢၼုယၢတ်ႈဝၼ်းလႂ်ၵေႃႈ ၸင်ႇတေလႆႈဢွၵ်ႇၶိုၼ်းဝၼ်းၼၼ်ႉဝႃႈၼႆဝႆႉ။

ၵူၼ်းၸိူဝ်းတေၵႂႃႇႁဵတ်းၵၢၼ်တၢင်းဝၼ်းဢွၵ်ႇၵၢင်ၸိူဝ်းၼႆႉၵေႃႈတႄႇဢဝ်ဝၼ်းတီႈ 1/04/2026 ၼႆႉမႃး ၵူၼ်းၸိူဝ်းတေၵႂႃႇႁဵတ်းၵၢၼ်တၢင်းဝၼ်းဢွၵ်ႇၵၢင်ၵေႃႈ သိုၵ်းမၢၼ်ႈဝႃႈ ဢမ်ႇမီးလွင်ႈႁူမ်ႇလူမ်ႈၼႆသေ ဢမ်ႇပၼ်ၵႂႃႇၶိုၼ်း။

တီႈတႃႈႁိူဝ်းမိၼ် ဝဵင်းတႃႈၵုင်ႈၼႆႉ သိုၵ်းမၢၼ်ႈသင်ႇပလိၵ်ႈမၢၼ်ႈဝႆႉ ႁႂ်ႈၵူတ်ႇထတ်းၵူၼ်းသႅၼ်း ပၢႆႈ 4 ပၢႆႈႁၢဝ်ႈႁႅင်း။ မိူၼ်ၼင်ႇ ၵူၼ်းပၢႆႈသိုၵ်း၊ ပၢႆႈပလိၵ်ႈ၊ ပၢႆႈတပ်ႉလႄႈ ပၢႆႈတူတ်ႈတၢမ်ႇၸိူဝ်းၼႆႉ။ ၵူၺ်းၵႃႈ လွင်ႈၸိူဝ်းၼႆႉၵေႃႈ ပဵၼ်တူၼ်ႈတေႃပၼ်ႁႃ ဢၼ်ႁဵတ်းႁႂ်ႈၸဝ်ႈၼႃႈတီႈတီႈၶူင်ႇႁိူဝ်းမိၼ် ႁႃလွၵ်းလၢႆး ၵိၼ်သူးၵိၼ်လၢပ်ႈၵူၺ်း – ၵူၼ်းၸိူဝ်းတေဢွၵ်ႇၼွၵ်ႈမိူင်းၶဝ်ဢွၼ်ၵၼ်လၢတ်ႈၼင်ႇၼႆ။