ၼႂ်းႁူဝ်ပီ 2026 ၼႆႉ ၸဝ်ႈၼႃႈတီႈပလိၵ်ႈ ၼႂ်းမိူင်းထႆး လူင်းပိုၼ်ႉတီႈ ၵူတ်ႇထတ်း ႁႅင်းၵၢၼ်ၸိူဝ်းဢမ်ႇမီးဝတ်းဝႂ်တဵမ်ထူၼ်ႈသေ ယူႇဝႆႉၼႂ်းမိူင်းထႆး လႄႈ ၵူၼ်းမိူင်းၼွၵ်ႈႁၢဝ်ႈႁႅင်း။ ၼႂ်းၶၢဝ်းတၢင်းဝူင်ႈဝၢင်ႈၼႆႉ ႁႅင်းၵၢၼ်ၸိူဝ်းလုၵ်ႉတၢင်းမိူင်းႁူမ်ႈတုမ် (မိူင်းမၢၼ်ႈ) မႃးယူႇၼႂ်းမိူင်းထႆး ၺႃးတီႉၺွပ်းၵႂႃႇၼမ်တေႉတေႉ ဝႃႈၼႆ။

မိူဝ်ႈဝၼ်းတီႈ 15 လိူၼ်ၵျႅၼ်ႊၼိဝ်ႊရီႊ ႁွင်ႈၵၢၼ်ၽွင်းလူင်ၾၢႆႇႁႅင်းၵၢၼ်မိူင်းၼွၵ်ႈ ႁဵတ်းလိၵ်ႈပိုၼ်ၽၢဝ်ႇဢွၵ်ႇဝႆႉပဵၼ်တၢင်းၵၢၼ် ပိူဝ်ႈတႃႇလူင်းၵူတ်ႇထတ်း ၵူၼ်းမိူင်းၼွၵ်ႈ လႄႈ ႁႅင်းၵၢၼ်ၸိူဝ်းလၵ်ႉယူႇ၊ လၵ်ႉႁဵတ်းၵၢၼ်ၽိတ်းပၵ်းပိူင် ၼႂ်းမိူင်းထႆးပတ်းပိုၼ်ႉၼၼ်ႉ။

ဝၢႆးလင်ပိုၼ်ၽၢဝ်ႇလိၵ်ႈဢွၵ်ႇၵႂႃႇယဝ်ႉဢမ်ႇႁိုင် ၵူၼ်းၼွၵ်ႈမိူင်း ၸိူဝ်းဢမ်ႇမီးဝတ်းဝႂ်တဵမ်ထူၼ်ႈသေ လၵ်ႉယူႇ၊ လၵ်ႉႁဵတ်းၵၢၼ် ၸိူဝ်းဢမ်ႇထုၵ်ႇမႅၼ်ႈၸွမ်းပၵ်းပိူင်မၢႆမီႈၼႆႉ ၺႃးပလိၵ်ႈထႆး တီႉၺွပ်းၵႂႃႇတင်းၼမ်လႄႈ ႁႅင်းၵၢၼ်ၸိူဝ်းလုၵ်ႉတၢင်းမိူင်းမၢၼ်ႈ ၶဝ်ႈမႃးႁဵတ်းၵၢၼ်ၼႂ်းမိူင်းထႆးၵေႃႈ ထုၵ်ႇလီၾၢင်ႉယူႇၾၢင်ႉၵႂႃႇမႃးပႆၵၼ် ၼႆယဝ်ႉ။

ၸၢႆးၵွင်း ၽူႈႁပ်ႉပုၼ်ႈၽွၼ်း ၾၢႆႇပၢႆးပၺ်ႇၺႃႇ ၸုမ်း HRDF လၢတ်ႈၼႄတီႈၽူႈတွႆႇႁွၵ်ႈဝႃႈ “ဢၼ်လမ်ႇလွင်ႈတႄႉ ယႃႇၵႂႃႇႁဵတ်းမႅၼ်ႈၺႃးၵၢၼ်တီႈဢၼ်လူင်ပွင်ၸိုင်ႈမိူင်းထႆး ႁၢမ်ႈဝႆႉဢမ်ႇပၼ်ႁႅင်းၵၢၼ်ၵူႈမိူင်းမိူင်းႁဵတ်းၼၼ်ႉၵူၺ်း။ တေလႆႈႁဵတ်းၵၢၼ် ဢၼ်လူင်ပွင်ၸိုင်ႈထႆး မၵ်းမၼ်ႈဝႆႉပၼ်ၼၼ်ႉၵူၺ်းဢေႃႈ။ လမ်ႇလွင်ႈသုတ်းတႄႉ ႁႅင်းၵၢၼ်ၼႆႉ ပိုတ်ႇလၢၼ်ႉသေ ၶၢႆတၢင်းၶၢႆဢမ်ႇလႆႈၶႃႈ။ ပေႃးဢမ်ႇၸႂ်ႈၸိူင်ႉၼၼ်ၼႆ ၸၢင်ႈၺႃးၸဝ်ႈၼႃႈတီႈပလိၵ်ႈၶဝ် မႃးၵူတ်ႇထတ်းႁႄ တီႉၺွပ်းဢဝ်ၵႂႃႇၶႃႈဢေႃႈ” ဝႃႈၼႆ။

မိူဝ်ႈဝၼ်းတီႈ 11 လိူၼ်ၵျႅၼ်ႊၼိဝ်ႊရီႊၼၼ်ႉ ႁႅင်းၵၢၼ်မိူင်းမၢၼ်ႈၵေႃႉၼိုင်ႈ ပဵၼ်ပၼ်ႁႃ ၽိတ်းၽႅၵ်ႇၵၼ် တင်း ၵူၼ်းသူင်ႇၶူဝ်းမိူင်းထႆးၵေႃႉၼိုင်ႈသေ မီးၵူၼ်းၵႂႃႇတိူင်ႇၸႅင်ႈတီႈ ၸဝ်ႈၼႃႈတီႈပလိၵ်ႈၶဝ်ဝႃႈ ၵူၼ်းမိူင်း မၢၼ်ႈ ဢဝ်ၸိုဝ်ႈၵူၼ်းမိူင်းထႆး ႁဵတ်းၼႃႈတိူဝ်ႈသေ ပိုတ်ႇႁၢၼ်ႉတၢင်းၶၢႆဝႆႉၼႆ ၾၢႆႇႁွင်ႈၵၢၼ်ၽွင်းလူင်ႁႅင်း ၵၢၼ်မိူင်းထႆး ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ။

ၵူၼ်းၵေႃႉႁဵတ်းၵၢၼ်ၸွႆႈထႅမ်ႁႅင်းၵၢၼ်မိူင်းမၢၼ်ႈၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ပၼ်ႁႃၼႆႉ တႄႇမႃးတီႈ ၸုမ်းႁႅင်းၵၢၼ်မိူင်းမၢၼ်ႈၸုမ်းၼိုင်ႈ ႁူမ်ႈၵၼ်ပေႃႉထုပ်ႉႁႅမ် ၵူၼ်းသူင်ႇၶူဝ်း (Grab) ၵူၼ်းထႆး ၼၼ်ႉ။ တႄႇတီႈၼၼ်ႉမႃးႁႄ ပလိၵ်ႈၶဝ် ၵူတ်ႇထတ်းၵူၼ်းၸိူဝ်းဢမ်ႇမီးဝတ်းဝႂ်တဵမ်ထူၼ်ႈ၊ ၵူၼ်းၸိူဝ်းႁဵတ်း ၵၢၼ်ၽိတ်းပၵ်းပိူင်ဝႆႉၼၼ်ႉၼႃႇ” ဝႃႈၼႆ။

ပူၼ်ႉမႃးဝၼ်းတီႈ 14 လိူၼ်ၵျႅၼ်ႊၼိဝ်ႊရီႊၼၼ်ႉ ၸဝ်ႈၼႃႈတီႈပလိၵ်ႈ လူင်းၵူတ်ႇထတ်းၼႂ်းၵၢတ်ႇတီႈၼိုင်ႈ ၼႂ်းဝဵင်းၽတ်ႉတယႃး တီႉၺွပ်းလႆႈ ၵူၼ်းႁဵတ်းၵၢၼ် 6 ၵေႃႉ ၸိူဝ်း ႁဵတ်းၵၢၼ်ဢမ်ႇထုၵ်ႇမႅၼ်ႈၸွမ်းပိူင်။ ၼႂ်းၼၼ်ႉ ပႃးၵူၼ်းမိူင်းမၢၼ်ႈ 2 ၵေႃႉ ၼႆယဝ်ႉ။

မိူၼ်ၼႆ ဝၼ်းတီႈ 15 -16 လိူၼ်ၵျႅၼ်ႊၼိဝ်ႊရီႊၼႆႉၵေႃႈ ၸဝ်ႈၼႃႈတီႈပလိၵ်ႈထႆး လူင်းၵူတ်ႇထတ်းၼႂ်းၵၢတ်ႇဝဵင်းမႄႈသွတ်ႇသေ တီႉၺွပ်းလႆႈ ၵူၼ်းမိူင်းမၢၼ်ႈ 8 ၵေႃႉ၊ ၵူၼ်းမိူင်းမၢၼ်ႈ ၸိူဝ်းလၵ်ႉၶဝ်ႈမိူင်းထႆးသေ ႁဵတ်းၵၢၼ်ဢမ်ႇမႅၼ်ႈၸွမ်းပၵ်းပိူင်မိူင်းထႆးၼၼ်ႉ 8 ၵေႃႉလႄႈ ၵူၼ်းမိူင်းမၢၼ်ႈ ၵေႃႉလုတ်ႈႁၢမ်း ၵၢၼ်ၸႅင်ႈသဵၼ်ႈမၢႆၶႅၵ်ႇၼၼ်ႉ 1 ၵေႃႉ ႁူမ်ႈသဵၼ်ႈ 17 ၵေႃႉ ၼႆယဝ်ႉ။

ၵၢၼ်ငၢၼ်းၸိူဝ်းႁႅင်းၵၢၼ်ယၢၼ်မိူင်း ဢမ်ႇႁဵတ်းလႆႈၼႂ်းမိူင်းထႆးၼႆႉ ပဵၼ်ၵၢၼ်ၵႅတ်းၶူၼ်ႁူဝ်၊ ၵၢၼ်ႁၢင်ႈၶိူင်ႈတူဝ်ၶိင်း ႁဵတ်းတၢင်းႁၢင်ႈလီ၊ ပိုတ်ႇႁၢၼ်ႉတၢင်းၶၢႆၵူႈလွင်ႈလွင်ႈႁင်း ၵူၺ်း၊ ၵၢၼ်ႁေႃႈလူတ်ႉၵႃး၊ ၼၢႆးၼႃႈ လႄႈ ၵၢၼ်လုမ်းၵၢၼ်ၸႆး ၸဵမ်ၸိူဝ်းၼႆႉ ၼႆယဝ်ႉ။