မိူဝ်ႈဝႃးဝၼ်းတီႈ 3/5/2026 ပဵၼ်ဝၼ်းသိုဝ်ႇလုမ်ႈၾႃႉလွတ်ႈလႅဝ်းၼႆလႄႈ ၸုမ်းႁဵတ်းၵၢၼ်သိုဝ်ႇၸွမ်း လႅၼ်လိၼ် ႁၢႆးငၢၼ်းဢွၵ်ႇဝႆႉဝႃႈ ၵၢၼ်လွတ်ႈလႅဝ်းသိုဝ်ႇၸုမ်းမိူင်းမၢၼ်ႈ (မိူင်ႈ ႁူမ်ႈတုမ်) ၼႆႉ တိုၵ်ႉပဵၼ် ၸၼ်ႉႁၢႆႉၸႃႉႁႅင်းဝႆႉယူႇ ဝႃႈၼႆ။

ၸိုင်ႈမိူင်းၸိူဝ်းဢမ်ႇပၼ်ၸုမ်းသိုဝ်ႇ ႁဵတ်းၵၢၼ်လႆႈလွတ်ႈလႅဝ်းၼၼ်ႉ တင်းလုမ်ႈၾႃႉၼႆႉ တေမီးယူႇ 180 ၸိုင်ႈမိူင်း ၼႂ်းၼၼ်ႉမိူင်းမၢၼ်ႈ (မိူင်းႁူမ်ႈတုမ်) ပဵၼ်ဝႆႉၸၼ်ႉ 166 ။ ၵွၼ်ႇသိုၵ်းမၢၼ်ႈပႆႇယိုတ်းသိမ်းဢဝ်ဢႃႇ ၼႃႇၸိုင်ႈမိူင်း မိူဝ်ႈပီ 2020 ၼၼ်ႉ မိူင်းႁူမ်ႈတုမ် ပဵၼ်ဝႆႉၸၼ်ႉ 139 ၵူၺ်းလႄႈ လႆႈဝႃႈ ငဝ်းလၢႆးလွင်ႈလွတ်ႈ လႅဝ်းသိုဝ်ႇမိူင်းႁူမ်ႈတုမ် ႁၢႆႉၸႃႉမႃးလိူဝ်ၵဝ်ႇတေႉတေႉ ၼႆယဝ်ႉ။

ဢူးတူဝ်းၸေႃႇလတ်ႉ ၽူႈၼမ်းၼႂ်း ၶွင်ႇသီႇၸုမ်းသိုဝ်ႇလွတ်ႈလႅဝ်းမိူင်းမၢၼ်ႈ (မိူင်းႁူမ်ႈတုမ်) ၵေႃႈ လၢတ်ႈဝႃႈ – ယၢမ်းလဵဝ်း မိူင်းႁူမ်ႈတုမ် (မိူင်းမၢၼ်ႈ) ၼႆႉ ပႃးၼႂ်းသဵၼ်ႈမၢႆဢၼ် ႁၢႆႉၸႃႉလိူဝ်ႁႅင်း 20 ၸိုင်ႈမိူင်းၼၼ်ႉၶိုၼ်းယဝ်ႉ – ဝႃႈၼႆ။

ဝၢႆးလင်သိုၵ်းမၢၼ်ႈယိုတ်းဢဝ်ဢႃႇၼႃႇၸိုင်ႈမိူင်းမႃး ပီ 2021 ၼႆႉ ၽူႈသိုဝ်ႇၶၢဝ်ႇ ၼႂ်းမိူင်းမၢၼ်ႈ 220 ၵေႃႉပၢႆ ၺႃးတီႉၺွပ်းၵႂႃႇသေ ႁၢၼ်ႉတေႃႇထိုင်ယၢမ်းလဵဝ် ၽူႈသိုဝ်ႇၶၢဝ်ႇ ၸိူဝ်းပႆႇလႆႈဢွၵ်ႇၶွၵ်ႈၶင်မႃး တိုၵ်ႉၵိုတ်းယူႇ 47 ၵေႃႉၼႆ လုမ်းၽွင်းတၢင်းမိူင်း UK ၵေႃႈႁၢႆးငၢၼ်းဝႆႉၼင်ႇၼႆ။

ၼႂ်းဝၼ်းသုၼ်ႇလႆႈလွတ်ႈလႅဝ်းၵၢၼ်သိုဝ်ႇၼႆႉ ၸုမ်းသိုဝ်ႇၶၢဝ်ႇတင်းလုမ်ႈၾႃႉ ယင်းတိုၵ်ႉၺႃးလွၵ်ႇငိုတ်ႈ ႁူပ်ႉၵၢၼ်ယႃႉၵဝ်း ၽူႈသိုဝ်ႇၶၢဝ်ႇထုၵ်ႇတီႉၺွပ်း လႆႈႁူပ်ႉၽေးၶဵၼ်ထိုင်သၢႆ ၸႂ် ၸိူဝ်းၼႆႉသေ ႁဵတ်းၵၢၼ်ယၢပ်ႇႁႅင်းယူႇလႄႈ တိုၵ်ႉတူၵ်းယူႇၼႂ်းငဝ်းလၢႆးဢၼ်ႁၢႆႉၸႃႉလိူဝ်ႁႅင်းယူႇ။ ပိူဝ်ႈတႃႇ တေဢဝ်ၶေႃႈမုၼ်းၶၢဝ်ႇသၢၼ် ဢၼ်မၢၼ်ႇမႅၼ်ႈၸိုဝ်ႈၸႂ်ႈ သူင်ႇ ထိုင်လႆႈတီႈၵူၼ်းမိူင်းၼၼ်ႉၵေႃႈ လႆႈတေႃႇသူႈပၼ်ႁႃၵူႈလွင်ႈလွင်ႈဝႆႉယူႇၼႆ ၸုမ်း UK in Myanmar လၢတ်ႈဝႆႉၼင်ႇၼႆ။

ၼင်ႇႁိုဝ် ၵူၼ်းမိူင်းတေလႆႈႁပ်ႉၶေႃႈမုၼ်းဢၼ်ၸိုဝ်ႈၸႂ်ႈ ၶိုတ်းတၼ်းၸွမ်းၶၢဝ်းယၢမ်းၼၼ်ႉ ထုၵ်ႇလီလူတ်းယွၼ်ႇပၼ် ၵၢၼ်တီႉၺွပ်းၵုမ်းၶင် ၽူႈသိုဝ်ႇၶၢဝ်ႇသေ ထုၵ်ႇလီႇပွႆႇပၼ် ၶိုၼ်း ၽူႈသိုဝ်ႇၶၢဝ်ႇ ၸိူဝ်းတူၵ်းၶွၵ်ႈၶင်ဝႆႉၼၼ်ႉ ဝႆးဝႆး ၼႆယဝ်ႉ။