မိူဝ်ႈၼႆႉ ဝၼ်းတီႈ 30/4/2026 လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း ဢွၵ်ႇၶေႃႈပူင် ပွႆႇပၼ်ၵူၼ်းတူၵ်းၶွၵ်ႈ ၵၢၼ်မိူင်း လႄႈ ၸိူဝ်းႁဵတ်းၽိတ်းပၵ်းပိူင်မၢႆမီႈသေ ထုၵ်ႇတီႉၺွပ်းယဵတ်ႈသႂ်ႇထွင်ႇ (ၶွၵ်ႈ) ၸိူဝ်းၼၼ်ႉ ၵူႈတီႈ တႃႇ 1508 ၵေႃႉ ၼႆယဝ်ႉ။
ၵၢၼ်ပွႆႇၵူၼ်းမီးတၢင်းၽိတ်း ၸိူဝ်းတူၵ်းၶွၵ်ႈၶင်ပွၵ်ႈၼႆႉဢွၵ်ႇ ပဵၼ်တႃႇမၢႆတွင်း ဝၼ်းလိူၼ်ႁူၵ်းမူၼ်း ပီသႃႇသၼႃႇ 1388 ၼႆသေ ပိူင်းၸႅင်ႈလၢတ်ႈပႃးဝႆႉဝႃႈ “ပေႃးႁဵတ်းပူၼ်ႉပႅၼ်မႅၼ်ႈ တၢင်းၽိတ်းထႅင်ႈၸိုင် တေလႆႈႁပ်ႉတူတ်ႈတၢမ်ႇၵဝ်ႇလႄႈတူတ်ႈတၢမ်ႇမႂ်ႇတင်းသွင်ဢၼ်ၸွမ်းၵၼ်” ၼႆယဝ်ႉ။
ၼႂ်းၵူၼ်းတူၵ်းၶွၵ်ႈ တႃႇ 1508 ၵေႃႉ ၸိူဝ်းတေလႆႈဢွၵ်ႇၼၼ်ႉ ၾၢႆႇလူင်ပွင်ၸိုင်ႈသိုၵ်းယိုတ်းမိူင်း လူတ်းယွမ်းပၼ် တူတ်ႈတၢမ်ႇ ဢၼ်တေလႆႈႁပ်ႉၼၼ်ႉသေ ပွႆႇပၼ်ပႃး ၵူၼ်းမိူင်း ၼွၵ်ႈ တႃႇ 11 ၵေႃႉ။ တီႈၽိုၼ်လိၵ်ႈ ၶေႃႈပိုၼ်ၽၢဝ်ႇၼၼ်ႉ တၢမ်တူဝ် ၸွမ်ၸိုင်ႈယိုတ်းမိူင်း မိၼ်းဢွင်ႇလၢႆႇ ၵေႃႉလူင်းလၢႆးမိုဝ်း ၸီႉသင်ႇဝႆႉ ပဵၼ်တၢင်းၵၢၼ်။
ၵူၼ်းၵေႃႉယၢမ်းတူၵ်းၶွၵ်ႈယွၼ်ႉၵၢၼ်မိူင်းၵေႃႉၼိုင်ႈလၢတ်ႈဝႃႈ – ၶဝ်ဢမ်ႇပွႆႇပၼ်ၵူၼ်းၸိူဝ်းတူၵ်းၶွၵ်ႈ ယွၼ်ႉၵၢၼ်မိူင်းသေ ပွႆႇၵူၼ်းၸိူဝ်းတၢင်းယၢမ်ႈဢမ်ႇလီ ၽူႈလၵ်ႉၸၵ်ႉၶုတ်ႈ ၵူၺ်းတႄႉ တေၵႂႃႇလၢၵ်ႇလၢႆးသင်။ ၼႂ်းမိူင်းၼႆႉ ယိုင်ႈၶႅၼ်းတေသုၵ်ႉထႅင်ႈၵူၺ်းဢိူဝ်ႈ – ဝႃႈၼႆ။
မိူဝ်ႈပူၼ်ႉမႃး ဝၼ်းတီႈ 17/4/2026 ပီမႂ်ႇသွၼ်းၼမ်ႉ ၼိုင်ႈဝၼ်း ဝၢႆးလင် မိၼ်းဢွင်ႇလၢႆႇ လႆႈတိူင်ႇၵၢဝ်ႇ ၵတိသႅတ်ႉၸႃႇ ပဵၼ်ၸွမ်ၸိုင်ႈယဝ်ႉဢမ်ႇႁိုင် ပွႆႇပၼ်ၵူၼ်းတူၵ်းၶွၵ်ႈ တင်း မိူင်းႁူမ်ႈတုမ်ပတ်းပိုၼ်ႉ တႃႇ 4300 ၵေႃႉပၢႆ ၼႂ်းၼၼ်ႉ ပႃးမႃး ဢူးဝိၼ်းမျိၼ်ႉ ၸွမ်ၸိုင်ႈၵေႃႉၵဝ်ႇ ၵေႃႉၺႃးတီႉၺွပ်း ၵုမ်းၶင်တူဝ်ဝႆႉၼၼ်ႉသေတႃႉ ၵူၼ်းတူၵ်းၶွၵ်ႈယွၼ်ႉၵၢၼ်မိူင်းတေႉတေႉတႄႉ ဢမ်ႇႁၼ်လႆႈပူၼ်ႈလွတ်ႈဢွၵ်ႇမႃးၼမ်သင်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ