မိူဝ်ႈၼႆႉ ဝၼ်းတီႈ 26 ယၢမ်းၵၢင်ၶမ်ႈမွၵ်ႈ 8 မူင်း သိုၵ်းမၢၼ်ႈ ပိုၼ်ၽၢဝ်ႇ ပဵၼ်တၢင်းၵၢၼ်ဝႃႈ ၸွမ်းၼင်ႇ ၶေႃႈပူင် 11/2025 သေ ပၵ်းပိူင်ၾိင်ႈမိူင်း မတ်ႉတႃ 401 တွၼ်ႈၽႄ (1) မီးဝႆႉၼၼ်ႉ ၸင်ႇလႆႈလူတ်းယွၼ်ႇ တူတ်ႈတၢမ်ႇ တၢင်းၽိတ်း ၵူၼ်းၸိူဝ်းၺႃးတီႉၺွပ်းဝႆႉ လူၺ်ႈမတ်ႉတႃ 505 ၼၼ်ႉၶိုၼ်းၼႆသေ ဢွၵ်ႇမႃးၶေႃႈပိုၼ်ၽၢဝ်ႇ 3 ၽိုၼ် ။

ၼႂ်းလိၵ်ႈပိုၼ်ၽၢဝ်ႇဝႆႉ 3 ၽိုၼ်ၼႂ်းၼၼ်ႉတိုၼ်းတႅမ်ႈဝႆႉပႃးဝႃႈ – ၸမ်ထိုင် ဝၼ်းပၢင်လိူၵ်ႈတင်ႈယဝ်ႉလႄႈ ၼင်ႇႁိုဝ် ၵူၼ်းမိူင်းၵူႈၵေႃႉတေမီးသုၼ်ႇပၼ်သဵင်ၵၢင်ၸႂ်လႆႈၼၼ်ႉ ၸင်ႇလႆႈလူတ်းယွၼ်ႇတူတ်ႈတၢမ်ႇ ၵူၼ်းၸိူဝ်းၺႃးတီႉၺွပ်းယဵတ်ႈၶွၵ်ႈဝႆႉ လူၺ်ႈတၢင်းၽိတ်းယႃႉသလေႇၼႃႈတႃၸိုင်ႈမိူင်း (မတ်ႉတႃ 505 (က)) ၸိူဝ်းၼၼ်ႉ – ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇ 3 ၽိုၼ်ၼၼ်ႉ တႃႇၽိုၼ်ၼိုင်ႈသိုၵ်းမၢၼ်ႈပွႆႇပၼ်ၵူၼ်းတူၵ်းၶွၵ်ႈ 724 ၵေႃႉ ။

ထႅင်ႈၽိုၼ်ၼိုင်ႈသမ်ႉလူတ်းယွၼ်ႇတူတ်ႈတၢမ်ႇ ပၼ် 2361 ၵေႃႉလႄႈ ထႅင်ႈၽိုၼ်ၼိုင်ႈတႄႉတႅမ်ႈဝႆႉဝႃႈ ၵိုတ်းလွင်ႈၵူတ်ႇထတ်းဢမုၶၻီး 505 ၸိူဝ်းတိုၵ်ႉၺႃးၵူတ်ႇထတ်းယူႇၸိူဝ်း ၼၼ်ႉဝႃႈၼႆဝႆႉ။(ၸိူဝ်းၶဝ် 2 သႅၼ်းၼႆႉတႄႉ ၸွင်ႇတေပူၼ်ႉလွတ်ႈဢွၵ်ႇၶွၵ်ႈမႃးတႄႉ ဢမ်ႇပႆႇႁူႉလႆႈတႅတ်ႈတေႃး။ တိုၵ်ႉၸွပ်ႇတူၺ်းယူႇ)

သိုၵ်းမၢၼ်ႈပူတ်းပွႆႇတူတ်ႈတၢမ်ႇၵူၼ်းၺႃးဢဝ်လိူင်ႈဝႆႉလူၺ်ႈ 505 ၵမ်းၼႆႉတင်းမူတ်းပဵၼ် 8665 ၵေႃႉ။ ပဵၼ်ၵူၼ်းၸိူဝ်းတူၵ်းဝႆႉယူႇၸွမ်းၶွၵ်ႈၶင်ဢွၼ်ႇ၊ ထွင်ႇလူင်၊ ႁူင်းပလိၵ်ႈ ၵူႈတီႈ ပတ်းပိုၼ်ႉတူဝ်ႈမိူင်း။

မတ်ႉတႃ 505 (က) ၼႆႉ မၢႆထိုင်ၽူႈမီးၸိုဝ်ႈသဵင်လိုဝ်းလင်ၼၼ်ႉ ဢၢင်ႈၸိုဝ်ႈသဵင်ၸဝ်ႈၵဝ်ႇသေ ဢမ်ႇၼပ်ႉယမ်ၼႃႈတီႈပုၼ်ႈၽွၼ်း တပ်ႉလိၼ်၊ ၼမ်ႉ၊ လူမ်း ၶွင်လူင်ပွင်ၸိုင်ႈမိူင်း ႁူမ်ႈတုမ်၊ ယႃႉၸိုဝ်ႈသဵင် ဢမ်ႇၼၼ်ႁဵတ်းႁၢႆႉ ပၢႆႉ သီတေႃႇ တပ်ႉသိုၵ်း လိၼ်၊ၼမ်ႉ၊လူမ်း ၶွင်လူင်ပွင်ၸိုင်ႈမိူင်းႁူမ်ႈတုမ်၊ ႁဵတ်းႁႂ်ႈၼႃႈတီႈ ၵၢၼ်ငၢၼ်း တပ်ႉသိုၵ်း လိၼ်၊ ၼမ်ႉ၊ လူမ်း ၶွင်လူင်ပွင်ၸိုင်ႈမိူင်းႁူမ်ႈတုမ်ၼၼ်ႉၸိူင်ႉၵၢတ်ႈၵိုတ်းလူႉၵႂႃႇ ၸဵမ်ၸိူဝ်းၼႆႉ။

ၵူၼ်းၸိူဝ်းၼႆႉပဵၼ်ၵူၼ်းၸိူဝ်းဢၼ်ၺႃးတီႉၺွပ်းၵုမ်းၶင်ၽွင်းပၢင်ၼႄၵၢင်ၸႂ်တေႃႇသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်း တင်ႈတႄႇ ပီ 2021 မႃးတေႃႇထိုင်ယၢမ်းလဵဝ်။