ၼႂ်းပီ 2025 ၶၢဝ်းတၢင်း 6 လိူၼ်ပူၼ်ႉမႃးၼႆႉ ၵူၼ်းတူၵ်းၶွၵ်ႈ တီႈၶွၵ်ႈဢူဝ်းပူဝ်ႇ ဝဵင်းလိူဝ်ႇ လူႉတၢႆ ၵႂႃႇ 56 ၵေႃႉ ၸုမ်းၾၢႆႇသၢၵ်ႈသေႇၶွၵ်ႈ မိူင်းမၢၼ်ႈ Myanmar Prison Witness ပိုၼ်ၽၢဝ်ႇဢွၵ်ႇမႃး ၼႂ်းဝၼ်းတီႈ 27/06/2025 ပူၼ်ႉမႃးၼႆႉ ၼင်ႇၼႆ။
တီႈၶွၵ်ႈဢူဝ်းပူဝ်ႇ ဝဵင်းလိူဝ်ႇၼႆႉ ၽူႈၵုမ်းၶွၵ်ႈလႄႈ မေႃယႃၼႂ်းၶွၵ်ႈ ဝႆႉမဝ်မၢင်တေႃႇၵူၼ်းတူၵ်းၶွၵ်ႈ၊ လွင်ႈလုမ်းလႃးတူၺ်းထိုင်ၾၢႆႇပၢႆးယႃႈယႃ ၺၢမ်ႉၶုၺ်ႈ၊ ၽွင်းမိူဝ်ႈပဵၼ်တၢင်းပဵၼ်ႁၢဝ်ႈႁႅင်း ဢမ်ႇ ဢွၼ်သူင်ႇၵူၼ်းပဵၼ်ထိုင်ႁူင်းယႃ ႁႂ်ႈၶိုတ်းတၼ်းၶၢဝ်းယၢမ်း၊ ႁႄႉႁၢမ်ႈယႃႈယႃ ၸိူဝ်းပေႃႈမႄႈပီႈ ၼွင်ႉ သူင်ႇပၼ်၊ လွင်ႈၸတ်းၵၢၼ်တူၺ်းထိုင်ၵူၼ်းတူၵ်းၶွၵ်ႈ ၺၢမ်ႉၶုၺ်ႈႁႅင်းလႄႈ ၵူၼ်းတူၵ်းၶွၵ်ႈ လႆႈလူႉတၢႆ ၼမ်လိူဝ်ၶွၵ်ႈတၢင်ႇတီႈ ဝႃႈၼႆ။
တီႈၶွၵ်ႈဢူဝ်းပူဝ်ႇ ဝဵင်းလိူဝ်ႇၼၼ်ႉ ပူၼ်ႉမႃး ဝၼ်းတီႈ 27 လိူၼ်ၵျုၼ်ႊၼႆႉ ဢူးဢွင်ႇၵျေႃႇဢူး ဢႃယု 69 ပီ ႁူဝ်ပဝ်ႈသၽႃးဝဵင်းလိူဝ်ႇ ၵိုင်ႉၵၢင်ႉထူၺ်ႈၸႂ်ၵပ်ႉသေ လူႉတၢႆ၊ ပူၼ်ႉမႃး ဝၼ်းတီႈ 7 လိူၼ်မေႊၼၼ်ႉၵေႃႈ ၶူးသွၼ် တေႃႇမျိၼ်ႇမျိၼ်ႉတၢၼ်း ယိုၼ်ႈယွၼ်း တႃႇလႆႈၶၢမ်ႇယူတ်းယႃ တၢင်းပဵၼ်တီႇပီႇ ၼွၵ်ႈၶွၵ်ႈသေတႃႉ ၽူႈမီးပုၼ်ႈၽွၼ်းၾၢႆႇၵုမ်းၶွၵ်ႈ ဢမ်ႇပၼ်ၶႂၢင်ႉလႄႈ လႆႈလူႉတၢႆၵႂႃႇထႅင်ႈ။
မိူၼ်ၼႆ မိူဝ်ႈဢိင်ႇသၼ်ႇ (ၽႅၼ်ႇလိၼ်ဝႆ) ႁၢဝ်ႈႁႅင်း ႁၢင်လိူၼ်မၢတ်ႊၶျ်ပူၼ်ႉမႃးၼၼ်ႉ ၵူၼ်းတူၵ်းၶွၵ်ႈ ၼႂ်းၶွၵ်ႈဢူဝ်းပူဝ်ႇ ဝဵင်းလိူဝ်ႇ မီးလွင်ႈမၢတ်ႇၸဵပ်းလူႉတၢႆၼမ်သုတ်း၊ ၵူၼ်းတူၵ်းၶွၵ်ႈမၢင်ၵေႃႉ ထိုင်တီႈလႆႈတတ်းပႅတ်ႈ တိၼ်မိုဝ်းသေတႃႉ ၾၢႆႇၵုမ်းၶွၵ်ႈ ဢမ်ႇတူၺ်းထိုင်ပၼ်လႆႈႁႂ်ႈထိုင်တီႈ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ