ၵူၼ်းၶၢႆလွၵ်းလိၼ်လႄႈႁိူၼ်းယေးၵေႃႉၼိုင်ႈတီႈဝဵင်းတူၼ်ႈတီး ၺႃးၵူၼ်းၶႂ်ႈသိုဝ်ႉလွၵ်းလိၼ်မႃးဢုပ်ႇၵုမ် ၸူဝ်းၵႂႃႇတူၺ်းလွၵ်းလိၼ်ၼႆသေ  လၵ်ႉဢဝ်ရူတ်ႉၶိူင်ႈမၼ်းၼၢင်းၵႂႃႇ။

ဝၼ်းတီႈ 28/04/2026 ၵူၼ်းယူႇဝဵင်းဢွင်ႇပၢၼ်း 3 ၵေႃႉ (ယိင်း 2 ၵေႃႉလႄႈ ၸၢႆးၵေႃႉၼိုင်ႈ) မႃးၸူးၵူၼ်းၶၢႆလွၵ်းလိၼ်တီႈဝဵင်းတူၼ်ႈတီး။

လုၵ်ႉတီႈႁိူၼ်းၼၢင်းယိင်းၵူၼ်းၶၢႆလွၵ်းလိၼ်ၼၼ်ႉသေ တေၵႂႃႇတူၺ်းလွၵ်းလိၼ်ၼၼ်ႉ  ၵူၼ်းၶၢႆလွၵ်းလိၼ် ႁွင်ႉဢဝ်ၼၢင်းယိင်းဢၼ်လုၵ်ႉဢွင်ႇပၢၼ်းမႃးၵေႃႉၼိုင်ႈၶီႇၵႂႃႇၸွမ်းမၼ်း။

ၽိူဝ်ႇထိုင်တီႈၵၢတ်ႇ 212 ၼၼ်ႉ ၼၢင်းယိင်းဢၼ်ၶီႇမႃးၸွမ်းလင်ရူတ်ႉၶိူင်ႈၼၼ်ႉ ဝႃႈတေၵႂႃႇသိုဝ်ႉၵူၼ်ၼႂ်းၵၢတ်ႇၼႆသေ လၵ်ႉဢဝ်ရူတ်ႉၶိူင်ႈၵူၼ်းၶၢႆတီႈလိၼ်လႄႈႁိူၼ်းယေးၼၼ်ႉၵႂႃႇဝႃႈၼႆ။

ၼၢင်းယိင်းၵေႃႉၶၢႆလွၵ်းလိၼ်ၼၼ်ႉလၢတ်ႈဝႃႈ -“ မၼ်းလၢတ်ႈဝႃႈ တေၵႂႃႇသိုဝ်ႉၵူၼ်ၼႂ်းၵၢတ်ႇၼႆသေ မၼ်းလူင်းရူတ်ႉၵႂႃႇ။ မိူၼ်တူဝ်ႉသေးဝႆႉ – ၽိူဝ်ႇၶႃႈႁူႉတူဝ်ထႅင်ႈၵမ်းၼိုင်ႈၵေႃႈ – ရူတ်ႉၵေႃႈဢမ်ႇမီးယဝ်ႉ – ၼၢင်းၼၼ်ႉၵေႃႈဢမ်ႇမီးယဝ်ႉ” -ၼႆ သိုဝ်ႇၶၢဝ်ႇ ၵမ်ႇပေႃးၸ ထၢႆးမ် တႅမ်ႈတၢင်ႇပိုၼ်ၽၢဝ်ႇဝႆႉၼင်ႇၼႆ။

ၵဵဝ်ႇလူၺ်ႈလွင်ႈတူဝ်ႉသေး ယႃဢမ် ၼႆႉသေ ယူႇတီႈၽူႈတွႆႇႁွၵ်ႈတႄႉ ပႆႇၸၢင်ႈယိုၼ်ယၼ်လႆႈ။

 မိူၼ်ၼႆၼင်ႇၵဝ်ႇ ပူၼ်ႉမႃးလၢႆဝၼ်းၼႆႉၵူၺ်း တီႈဝဵင်းတူၼ်ႈတီးၼႆႉ ရူတ်ႉၶိူင်ႈမေႃယႃမႂ်ႇ ၵိုတ်းဝႆႉၼႂ်းႁူင်းယႃၼၢင်းယိင်းလႄႈလုၵ်ႈဢွၼ်ႇၼၼ်ႉ ၺႃးလၵ်ႉၼင်ႇၵဝ်ႇ။

တီႈဝဵင်းတူၼ်ႈတီးၼႆႉ ပလိၵ်ႈသိုၵ်းမၢၼ်ႈ ၵႆႉၵူတ်ႇထတ်းတီႉၺွပ်း ရူတ်ႉၶိူင်ႈဢမ်ႇမီးဝႂ်လၢႆႊသိၼ်ႊ၊ ဢမ်ႇၸွမ်းမၢႆမီႈ ဝၼ်းၵိၵ်ႈဝၼ်းၵူႈ ၼႆသေတႃႉ လွင်ႈၽူႈလၵ်ႉၸၵ်ႉၶုတ်ႈၼမ်လိူင်ႇ ရူတ်ႉၶိူင်ႈၵမ်းၵမ်းႁၢႆၼႆႉတႄႉ ဢမ်ႇဢဝ်ပုၼ်ႈၽွၼ်းတီႉၺွပ်းပၼ်လႆႈ ႁႂ်ႈထိုင်တီႈ။

ၵွပ်ႈၼႆပေႃးဢဝ်ရူတ်ႉၶိူင်ႈၵႂႃႇတၢင်းၼွၵ်ႈ ႁဵတ်းၵၢၼ်ႁဵတ်းငၢၼ်းၸိုင် ႁႂ်ႈလႆႈၾၢင်ႉႁင်းၸဝ်ႈၵဝ်ႇလီလီ – ယွၼ်ႉဝႃႈပေႃးမီးလွင်ႈလၵ်ႉၸၵ်ႉၶုၼ်ႈမႃးၸိူင်ႉၼႆ ဢမ်ႇၸၢင်ႈၵႂႃႇၸႂ်ယႂ်ႇၽႂ် တႃႇႁႂ်ႈလႆႈၶိုၼ်းၶူဝ်းၸဝ်ႈၵဝ်ႇၼၼ်ႉ- ဝႃႈၼႆ။