ၼႂ်းၶၢဝ်းတၢင်းလိူၼ်လဵဝ် ၵူၼ်းမိူင်းဝဵင်းလွႆၶေႃ မိူင်းယၢင်းလႅင် 4 ၵေႃႉ ယဵပ်ႇၺႃး မၢၵ်ႇမႅင်းဢၼ်ၵိုတ်းၶင်ႉၽွင်းပၢင်တိုၵ်းၼၼ်ႉသေ မၢတ်ႇၸဵပ်းႁၢဝ်ႈႁႅင်း ဝႃႈၼႆ ။
ၵူၼ်းမိူင်းဝဵင်းလွႆၶေႃၼႆႉဢမ်ႇၸၢင်ႈယူႇသဝ်းယွၼ်ႉပၢင်တိုၵ်း ၸဵမ်မိူဝ်ႈပီ 2023။ လႆႈဢွၼ်ၵၼ်ပၢႆႈၽေးသိုၵ်းၵႂႃႇယူႇတၢင်ႇတီႈ။
ဝၢႆးပၢင်တိုၵ်းၶိုၼ်းယဵၼ်ၵႂႃႇ ႁၢင်ပီပီၵၢႆ သိုၵ်းမၢၼ်ႈ သင်ႇႁႂ်ႈၵူၼ်းပၢႆႈၽေးသိုၵ်းပွၵ်ႈယူႇၶိုၼ်းဝၢၼ်ႈၵိူတ်ႇမိူင်းၼွၼ်း။ တဵၵ်းယွၼ်းငိုၼ်းတီႈၵူၼ်းမိူင်းၸိူဝ်းပွၵ်ႈႁိူၼ်းၶိုၼ်း- ဝႃႈတႃႇၽဵဝ်ႈမၢၵ်ႇမႅင်းၸိူင်းၶၢင်ႉၶမ်ဝႆႉၽွင်းပၢင်တိုၵ်း။
ဝႃႈၼၼ်သေတႃႉၵေႃႈ ၵူၼ်းပိုၼ်ႉတီႈၸိူဝ်းပွၵ်ႈၶိုၼ်းႁိူၼ်း ၵႆႉယဵပ်ႇၺႃးမၢၵ်ႇသေ မၢတ်ႇၸဵပ်းလူႉတၢႆယူႇၶိူဝ်းယႂ်း။
ဝၼ်းတီႈ 19/04/2026 သိုၵ်းမၢၼ်ႈၶၢၼ်းၵူၼ်းဝၢၼ်ႈလႄႈႁွင်ႈၵၢၼ်ၾၢႆႇၽွင်းငမ်း ႁဵတ်းလွင်ႈမူတ်းသႂ် ၽဵဝ်ႈယုၵ်းယၢၵ်းၼႂ်းပွၵ်ႉ ဢွင်ႇတေႇၸ (အောင်တေဇ ) ဝဵင်းလွႆလႅမ်ဢွၼ်ႇ ၸႄႈဝဵင်းလွႆၶေႃ။ ၵႂႃႇတိူဝ်ႉမႅၼ်ႈမၢၵ်ႇဢၼ်ၵိုတ်းၶၢင်ႉဝႆႉၽွင်းပၢင်တိုၵ်းသေ ႁဵတ်းႁႂ်ႈမၢၵ်ႇတႅၵ်ႇ။ ၸၢၵ်ႇမၢၵ်ႇၽူင်ႉသႂ်ႇ ၵူၼ်းမိူင်းၵေႃႉၼိုင်ႈလႄႈ ၵူၼ်းႁၢပ်ႇၵၢၼ်တႂ်ႈ သိုၵ်းမၢၼ်ႈၵေႃႉၼိုင်ႈ မၢတ်ႇၸဵပ်းႁၢဝ်ႈႁႅင်း ဝႃႈၼႆ ။
ၸၢႆးဢၢႆႈၸၢႆး ဢႃယု 30 ပၢႆ ယူႇဝဵင်းလွႆၶေႃ လၢတ်ႈၽူႈတွႆႇႁွၵ်ႈဝႃႈ- “ မီးၵူၼ်းၵႆႉယဵပ်ၺႃးမၢၵ်ႇၼႃႇ ၊ ပဵၼ်မၢၵ်ႇဢၼ်ၵိုတ်းဝႆႉၽွင်းပၢင်တိုၵ်းၼၼ်ႉဢေႃႈ ၊ ဝူင်ႈပူၼ်ႉမႃးၼႆႉၵေႃႈ မီးၵူၼ်းယဵပ်ႇၺႃး မၢၵ်ႇလႄႈ လႆႈႁၢမ်သူင်ႇယူတ်းယႃဝႆႉ ၊ သိုၵ်းမၢၼ်ႈၼႆႉ ဝႃႈၽဵဝ်ႈမၢၵ်ႇမႅင်းယဝ်ႉမူတ်းယဝ်ႉ ၼႆ သေတႃႉ ၵူၼ်းမိူင်းတင်းတိုၵ်ႉၵႆႉၽႃႇၺႃးမၢၵ်ႇတႅၵ်ႇသႂ်ႇယူႇတိၵ်းတိၵ်း။ မၢၵ်ႇၼႆႉ တေမီးၼမ် ထႅင်ႈပဵၼ်ၵႃႈႁိုဝ်” – ဝႃႈၼႆ။
ၼႂ်းဝၼ်းတီႈ 13/04/2026 ၼၼ်ႉၵေႃႈ ၼၢင်းယိင်းဢႃယု 40 ပၢႆၵေႃႉၼိုင်ႈ ၵူၼ်းပွၵ်ႉၼွင်ယႃး ၸႄႈဝဵင်းလွႆၶေႃ- ပၢႆႈၽေးသိုၵ်းယဝ်ႉသေ ၽွင်းပွၵ်ႈမိူဝ်းႁဵတ်းလွင်ႈမူတ်းသႂ်တီႈႁိူၼ်းၼၼ်ႉ ယဵပ်ႇၺႃးမၢၵ်ႇလႄႈ ၵူၼ်းပိုၼ်ႉတီႈလႆႈႁၢမ်ႇသူင်ႇႁူင်းယႃ ။ ဝၼ်းၼၼ်ႉၵူၺ်းၼင်ႇၵဝ်ႇ လုၵ်ႈဢွၼ်ႇဢႃယု 9 ၶူပ်ႇ ၵူၼ်းဝၢၼ်ႈတိုဝ်ႉၸၢႆးၶႃး (ထီးစဲခါး) ယဵပ်ႇၺႃးမၢၵ်ႇၼႂ်းဝၢင်းႁိူၼ်းၶဝ်ၶိုၼ်း ။
တီႈဝဵင်းလွႆၶေႃၼႆႉ ၼႂ်းၶၢဝ်းတၢင်း 4 လိူၼ်ၵူၺ်း မီးၵူၼ်းယဵပ်ႇၺႃးမၢၵ်ႇမႅင်း ၼႂ်းသူၼ်ၼႂ်းႁႆႈ ၊ ၸွမ်းတႃႈၸွမ်းတၢင်း ၊ ၼႂ်းပွၵ်ႉယွမ်ႇ ၼႂ်းဝၢင်းႁိူၼ်းၸဝ်ႈၵဝ်ႇသေ လူႉတၢႆ /မၢတ်ႇၸဵပ်းမီး 10 ပၢႆယဝ်ႉ။ ပဵၼ်ၵူၼ်းပၢႆႈၽေးသိုၵ်းသေပွၵ်ႈၶိုၼ်းႁိူၼ်းယေးလွၼ်ႉလွၼ်ႉ- ၵူၼ်းပိုၼ်ႉတီႈလၢတ်ႈ ။
တီႈဝဵင်းလွႆၶေႃၼႆႉ မီး 13 ပွၵ်ႉ ။ ၵူၼ်းမိူင်းဝဵင်းလွႆၶေႃ ဢၼ်ပၢႆႈၽေးသိုၵ်းဝႆႉ ၼၼ်ႉ ပွၵ်ႈၶိုၼ်း ႁိူၼ်း 3 ပုၼ်ႈ 2 ပုၼ်ႈ ယဝ်ႉ။ ၵူၺ်းၵႃႈ ၶူဝ်းၵုၼ်ႇၵိၼ်ယမ်ႉ ၵႃႈယႂ်ႇႁႅင်း၊ ၵၢၼ်ငၢၼ်းၵေႃႈဢမ်ႇမီး ၵူၼ်းဝၢၼ်ႈၵူၼ်းမိူင်းပဵၼ်ဢၼ်ယၢပ်ႇၽိုတ်ႇဝႆႉ ။ ယၢမ်းလဵဝ် သိုၵ်းမၢၼ်ႈပၵ်းတပ်ႉယူႇဝႆႉတီႈတၢင်းၶဝ်ႈတၢင်းဢွၵ်ႇဝဵင်းသေ ၵူတ်ႇ ထတ်း ၵူၼ်းၵႂႃႇမႃးဝႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ