ဝၼ်းတီႈ 26/04/2026 ၼႆႉ ၵူၼ်းမိူင်းမၢၼ်ႈဢၼ်ႁွတ်ႈထိုင် ဝဵင်း ဝႅၼ်ႊၶူႊဝႃႊၸိုင်ႈမိူင်းၶၼေႊတႃႊ ၶွၼ်ႈတုမ်ၵၼ်တီႈသူၼ်မွၵ်ႇ ပီႊၶွၼ်ႊသၾီႊယ် Beaconsfielသေ ၼႄၵၢင်ၸႂ်လွင်ႈတူင်ႉၼိုင် Proof of Life ဝႃႈ သင်ဝႃႈ ဢွင်ႇသၢၼ်းၸူႉၵျီႇ တိုၵ်ႉယူႇလီလိပ်းၶီးယူႇၸိုင် ႁႂ်ႈသိုၵ်းမၢၼ်ႈၼႄပၼ်သၢၵ်ႈသေႇလၵ်းထၢၼ်မႃး- ဝႃႈၼႆ။

ၵူၼ်းမိူင်းမၢၼ်ႈၸုမ်းၼၼ်ႉ ယိပ်းတင်းပၢႆႉဢၼ်တႅမ်ႈဝႆႉဝႃႈ “Proof of Life” ၊ “Free Aung San Su Kyi” ၊ “Stand Up For Freedom” ၼႆၸိူဝ်းၼႆႉလႄႈသင် ယိပ်းတင်းၶႅပ်းႁၢင်ႈဢွင်ႇသၢၼ်းၸူႉၵျီႇသေလႄႈသင် တုၵ်းယွၼ်းႁႂ်ႈလုမ်ႈၾႃႉလႆႈႁၼ်သေပၼ်ႁႅင်းဢီးသိုၵ်းမၢၼ်ႈ ႁႂ်ႈသိုၵ်းမၢၼ်ႈဢဝ်ဢွင်ႇသၢၼ်းၸူႉၵျီႇ ဢွၵ်ႇမႃးၼႄၵူၼ်းမိူင်းဝႆးဝႆး ဝႃႈၼႆ။

ၼွၵ်ႈလိူဝ်ၼၼ်ႉၵူၼ်းၸုမ်းၼၼ်ႉတုၵ်းယွၼ်းထႅင်ႈဝႃႈ – ႁႂ်ႈၶိုၼ်းမၵ်းမၼ်ႈ ၸွမ်ၸိုင်ႈ ၸိုင်ႈမိူင်းၼႆႉ ပဵၼ်ဢူးဝိၼ်းမျိၼ်ႉ ၵူၺ်း။ ႁႂ်ႈပွႆႇပၼ်ဢွင်ႇသၢၼ်းၸူႉၵျီႇလႄႈ ၵူၼ်းႁဵတ်းၵၢၼ်မိူင်း ၸိူဝ်းၺႃးတီႉၺွပ်းဝႆႉၸိူဝ်းၼၼ်ႉတင်းမူတ်း။ သၢၼ်ၶတ်းၸဝ်ႈဢႃႇၼႃႇသိုၵ်း ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ဢၼ်ယိုတ်းဢႃႇၼႃႇၸိုင်ႈမိူင်းဝႆႉလိပ်းလိပ်းလႅင်လႅင် ၸိူဝ်းၼႆႉ။

ၶူင်းၵၢၼ် Proof of life ၼႆႉ တႄႇႁဵတ်းမႃးဝၼ်းတီႈ 21/04/2026။ ၵူၼ်းၼုမ်ႇၸိူဝ်းၶႂ်ႈႁႂ်ႈဢွင်ႇသၢၼ်းၸူႉၵျီႇပူၼ်ႉလွတ်ႈၼၼ်ႉ ဢွၼ်ၵၼ်ဢွၵ်ႇမႃးၼႄၵၢင်ၸႂ်။ ဢမ်ႇၵႃးတီႈမိူင်းၶၼေႊတႃႊၵူၺ်း။ မိူၼ်ၼင်ႇမိူင်းၵဝ်ႊရီႊ ၵျပၼ်ႊ ဢမေႊရိၵၼ်ႊ ၸိူဝ်းၼႆႉၵေႃႈဢွၼ်ၵၼ်ႁဵတ်း။

ဝၼ်းပီမႂ်ႇသၢင်းၵျၢၼ်ႇၼႆႉ သိုၵ်းမၢၼ်ႈပွႆႇၵူၼ်းတူၵ်းၶွၵ်ႈ 4000 ။ ၼႂ်းၼၼ်ႉပႃးမႃးၸွမ်ၸိုင်ႈ ဢူးဝိၼ်းမျိၼ်ႉ ပႃႇတီႇၼူၵ်ႉလႅင် NLD ၼၼ်ႉယူႇသေတႃႉ ဢၼ်ပဵၼ်ၽူႈၵိူဝ်းၵုမ်ၸိုင်ႈမိူင်း ၻေႃႇဢွင်ႇသၢၼ်းၸူႉၵျီႇ တႄႉ ဢမ်ႇပႃးမႃး။ ၵူၼ်းၸုမ်းသိုၵ်းမၢၼ်ႈ ပိုၼ်ၽၢဝ်ႇဝႃႈ တေဢဝ်မၼ်းၼၢင်းၶၢႆႉမႃးၵုမ်းၶင်ၵိုၵ်းႁိူၼ်းတီႈဝဵင်းလူင်တႃႈၵုင်ႈ ဝႃႈၼႆသေတႃႉ တေႃႇထိုင်ဝၼ်းမိူဝ်ႈၼႆႉ ဢမ်ႇႁၼ်မၼ်းၼၢင်းဢွၵ်ႇမႃး။

ၾၢႆႇၼိုင်ႈ ၵေႃႉပဵၼ်လုၵ်ႈၸၢႆးမၼ်းၼၢင်း ၶိမ်ႊဢႄႊရိတ်ႉသ် ၵေႃႈယူႇယူႇဢွၵ်ႇမႃးလၢတ်ႈဝႃႈ – ဢမ်ႇလႆႈႁူႉၶၢဝ်ႇငၢဝ်းၵေႃႉပဵၼ်မႄႈသေဢိတ်း။ မၼ်းၸၢႆးထၢင်ႇတႄႉ မႄႈမၼ်းၼႆႉ တၢႆၼႂ်းၶွၵ်ႈယဝ်ႉ- ဝႃႈၼႆလႄႈႁဵတ်းႁႂ်ႈၵူၼ်းၼႂ်းလုမ်ႈၾႃႉ ၶႂ်ႈႁူႉၶႂ်ႈႁၼ်လႄႈၶႂ်ႈငိၼ်းၶၢဝ်ႇ ဢွင်ႇသၢၼ်းၸူႉၵျီႇ ဢႃယု 80 ပၢႆ ဢၼ်ထုၵ်ႇသိုၵ်းမၢၼ်ႈတီႉၺွပ်းၵုမ်းၶင်ဝႆႉ လူၺ်ႈပူၼ်ႉပႅၼ်သုၼ်ႇလႆႈၵူၼ်း မိူဝ်ႈဝၼ်းတီႈ 1/2/2021 ။