ၵူၼ်းၼုမ်ႇဝဵင်းယႂႃႇငၢၼ်ႇ 5 ၵေႃႉဢၼ်ၵႂႃႇၾိုၵ်းၵၢၼ်သိုၵ်း ၸွမ်းသိုၵ်းမၢၼ်ႈ ၸုပ်ႈတီႈၼိုင်ႈ ၸဵမ်မိူဝ်ႈ 3 ပီပူၼ်ႉမႃးၼၼ်ႉ ၸင်ႇႁႃလႆႈပွၵ်ႈႁိူၼ်းၶိုၼ်းယၢမ်းလဵဝ် – ပွၵ်ႈမႃးၶိုၼ်း 3 ၵေႃႉၵူၺ်း 2 ၵေႃႉတႄႉတၢႆၼႃႈသိုၵ်းယဝ်ႉဝႃႈၼႆ။  

ၼႂ်းလိူၼ်ၾႅပ်ႊပိဝ်ႊရီႊ ပီ 2024 ဝၢႆးသိုၵ်းမၢၼ်ႈ ပိုၼ်ၽၢဝ်ႇ မၢႆမီႈႁၢပ်ႇၵၢၼ်သိုၵ်းယဝ်ႉ ၵၢင်ႉၵႄႇ ၼႂ်းၸႄႈဝဵင်းဝၢၼ်ႈငႂ်ႈ(ယႂႃႇငၢၼ်ႇ) လူင်းၵဵပ်းသဵၼ်ႈမၢႆၵူၼ်းၼုမ်ႇ တႃႇ ႁၢပ်ႇၵၢၼ်သိုၵ်း ၊ ၸႂ်ႉၸူၵ်း မႄး သေ သူင်ႇၵႂႃႇၾိုၵ်း 5 ၵေႃႉဢွၼ်တၢင်းသုတ်း ၼႂ်းၸုပ်ႈတီႈၼိုင်ႈ။  

 ႁိုင်မႃးၶၢဝ်းတၢင်း 3 ပီ ၸင်ႇလႆႈပွၵ်ႈႁိူၼ်းၶိုၼ်း ၼႂ်းလိူၼ်ဢေႊပရိူဝ်ႊလ် ၼႆႉ၊  တႃႇ 2 ၵေႃႉတႄႉ  တၢႆၼႃႈသိုၵ်း ၽွင်းပၢင်တိုၵ်း  ယဝ်ႉဝႃႈၼႆ။

ၵူၼ်းၸၢႆးဢႃယု 30 ပီ ၵူၼ်းဝဵင်းဝၢၼ်ႈငႂ်ႈလၢတ်ႈ ၽူႈတွႆႇႁွၵ်ႈဝႃႈ –“ၵူၼ်းၵႂႃႇႁၢပ်ႇၵၢၼ်သိုၵ်း တႃႇၸုပ်ႈၼိုင်ႈ 5 ၵေႃႉၼၼ်ႉပွၵ်ႈမႃးၶိုၼ်း 3 ၵေႃႉ ၊ ထႅင်ႈသွင်ၵေႃႉတႄႉ ၵႂႃႇတူၵ်းၼႃႈသိုၵ်းယဝ်ႉ ၊ လႆႁူႉဝႃႈ ၵူၼ်းၵႂႃႇၼႃႈသိုၵ်းၸုပ်ႈၼၼ်ႉ 1 ႁဵင်ၵေႃႉၼႆႉ  ပွၵ်ႈႁိူၼ်းၶိုၼ်း 300  ၵူၺ်း ၊  လိူဝ်ၼၼ်ႉတႄႉ ၵႂႃႇတၢႆၼႃႈသိုၵ်းမူတ်း ”– ဝႃႈၼႆ ။

ၵူၼ်းဢၼ်ၵႂႃႇၾိုၵ်းၵၢၼ်သိုၵ်းတင်းသဵင်ႈ  ၽွင်းၵႂႃႇၼႃႈသိုၵ်းၼၼ်ႉ  ၶဝ်ဢမ်ႇပၼ်ၸႂ်ႉၾူၼ်း ၊ ဢမ်ႇပၼ်တိတ်းတေႃႇၵပ်းသိုပ်ႇၵၼ်တင်းၵူၼ်းတီႈႁိူၼ်းလႄႈ ႁဵတ်းႁႂ်ႈၵူၼ်းႁိူၼ်းမႆႈၸႂ်ၸွမ်း- ၵူၼ်းပိုၼ်ႉတီႈလၢတ်ႈၼင်ႇၼႆ ။

 ၵူၼ်းၸၢႆး 3 ၵေႃႉဢၼ်ၵႂႃႇၼႃႈသိုၵ်းသေ ပွၵ်ႈမႃးၶိုၼ်းၼၼ်ႉၵေႃႈ တုမ်ႉတိုဝ်ႉပၢႆးတူဝ် ၊ ပၢႆးၸႂ် လႆႈ ႁပ်ႉလွင်ႈယူတ်းယႃဝႆႉ- ဝႃႈၼႆ ။

ၵူၼ်းၼႂ်းမုင်ႉႁေႃႁိူၼ်း ၸိူဝ်းၵႂႃႇႁၢပ်ႇၵၢၼ်သိုၵ်းလၢတ်ႈၽူႈတွႆႇႁွၵ်ႈဝႃႈ –“ၽွင်းမၼ်းပွၵ်ႈမႃးၶိုၼ်း ၼၼ်ႉ ႁႆႈလူင်မႃးဢေႃႈ ၊ ၶႃႈၵေႃႈထၢင်ႇဝႃႈတေဢမ်ႇလႆႈႁၼ် လုၵ်ႈၶႃႈ ၶိုၼ်းယဝ်ႉၼႆ ၊ ၽွင်းၵႂႃႇႁၢပ်ႇၵၢၼ်သိုၵ်း 3 ပီၼႆႉ ဢမ်ႇလႆႈတင်းၵပ်းသိုပ်ႇလီလီသေပွၵ်ႈ ၊ လႆႈမႆႈၸႂ်ႁႅင်းၼႃႇ တလဵဝ်ၵေႃႈ ပေႃးၵၢင်ၶမ်ႈၵၢင်ၶိုၼ်း မၼ်းၵႆႉတူၵ်းၸႂ်တိုၼ်ႇသေ လုၵ်ႉႁႆႈတိၵ်းတိၵ်း မိူၼ်တုမ်ႉတိူဝ်ႉပၢႆးၸႂ်ဝႆႉ ၊ လႆႈယူတ်းယႃပၼ်ႁႅင်းၸႂ်မၼ်းဝႆႉ”– ဝႃႈၼႆ ။

ယွၼ်ႉသိုၵ်းမၢၼ်ႈလႄႇလမ်းႁႃ တီႉၺွပ်းၵူၼ်းၵႂႃႇႁၢပ်ႇသိုၵ်းလႄႈ ၵူၼ်းၼုမ်ႇၼႂ်းၸႄႈဝဵင်းယႂႃႇငၢၼ်ႇ ၵမ်ႈၼမ် ဢွၼ်ၵၼ်ပၢႆႈဢွၵ်ႇဝၢၼ်ႈဢွၵ်ႇဝဵင်း ၊ တီႈဝဵင်းယႂႃႇငၢၼ်ႇၼႆႉ ယၢမ်းလဵဝ် ၵဵပ်းၵူၼ်းသိုၵ်းမႂ်ႇၼႆႉ ပဵၼ်ၸုပ်ႈထီႉ 21 ယဝ်ႉ ။

ၼႂ်းပၵ်းပိူင်မၢႆမီႈၵူၼ်းမိူင်းႁၢပ်ႇၵၢၼ်သိုၵ်းၼၼ်ႉတႅမ်ႈဝႆႉဝႃႈ ပေႃးပဵၼ်ၵူၼ်းမိူင်း ၽူႈၸၢႆး ဢႃယု တၵ်းတေလႆႈမီး ၼႂ်းၵႄႈ 18 ထိုင် 35။ ၼၢင်းယိင်းသမ်ႉ ဢႃယုတေလႆႈမီး 18 ထိုင် 27 ပီ ။ ပေႃးပဵၼ်ၵူၼ်းမီးတၢင်းႁူႉ ႁဵၼ်းလိၵ်ႈသုင်ၸိုင် ပေႃးပဵၼ်ၵူၼ်းၸၢႆး တေႃႇထိုင်ဢႃယု 45 ပီ ၼၢင်းယိင်း 35 ပီ။ သင်ၸိူဝ်ႉပၢႆႈတႃႇႁၢပ်ႇၵၢၼ်သိုၵ်းၸိုင် သင်တီႉလႆႈ တေလႆႈႁပ်ႉတူတ်ႈၶွၵ်ႈ 3 ပီထိုင် 5 ပီ ပႃးဝႆႉၼင်ႇၼႆ။

ၸွမ်းၼင်ႇၼႂ်းသဵၼ်ႈမၢႆႁူဝ်ႁိူၼ်းၵူၼ်းမိူင်း ဢၼ်ၵဵပ်းဝႆႉၼႂ်းပီ 2019 ၼၼ်ႉတႄႉ သိုၵ်းမၢၼ်ႈပိုၼ်ၽၢဝ်ႇဝႆႉဝႃႈ ၵူၼ်းၸၢႆးဢၼ်ၶဝ်ႈပႃးၼႂ်းသဵၼ်ႈမၢႆႁၢပ်ႇၵၢၼ်သိုၵ်း မီး 6 လၢၼ်ႉပၢႆ (6.3 လၢၼ်ႉ) လႄႈၼၢင်းယိင်းမီး 7 လၢၼ်ႉပၢႆ (7.7 လၢၼ်ႉ) ။ တင်းမူတ်းမီးမွၵ်ႈ 14 လၢၼ်ႉ ၸွမ်သိုၵ်းၸေႃႇမိၼ်းထုၼ်း ပိုၼ်ၽၢဝ်ႇလၢတ်ႈဝႆႉၼင်ႇၼႆ။